އެއްބާރުލުން ދީފައިނުވާކަމަށް ބުނެ މޭޔަރު މުއިއްޒު ހަދާފައިވަނީ ދޮގެއް – ފަހި ދިރިއުޅުން ކޯޕަރޭޝަން

މާލޭ ސިޓީ ކައުންސިލްއަށް ފަހި ދިރިއުޅުން ކޯޕަރޭޝަނުން އެއްބާރުލުން ދީފައިނުވާކަމަށް މޭޔަރ ޑރ. މުހައްމަދު މުއިއްޒު ވިދާޅުވެފައިވާތީ އެކަން އެ ކޯޕަރޭޝަނުން ދޮގުކޮށްފިއެވެ.

ފަހި ދިރިއުޅުން ކޯޕަރޭޝަނުން ބުނީ އެ ކޯޕަރޭޝަންގެ ފަރާތުން ކުރިއަށްގެންދާ މަޝްރޫއުތަކަކީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ސަރުކާރުގެ ކަމާބެހޭ ވުޒާރާތަކާއި ގުޅިގެން ކުރިއަށްގެންދާ މަޝްރޫއުތަކެއްކަމަށެވެ.

advertisement

ތަކުރާރުކޮށް އެދިވަޑައިގަތުމުންވެސް އެ ކޯޕަރޭޝަނުން އެކި ކަންކަމުގައި ފުރުސަތު ދީފައިނުވާކަމަށާއި އެއްބާރުލުން ދީފައިނުވާކަމަށް ނޫސްވެރިންގެ ބައްދަލުވުންތަކުގައި މާލޭ ސިޓީގެ މޭޔަރ ޑރ. މުޙައްމަދު މުއިއްޒު ވިދާޅުވުމަކީ އެކަން ހިނގާދިޔަގޮތް ނޫންކަމަށް އެ ކޯޕަރޭޝަނުން ވަނީ ބުނެފައެވެ.

މިއަހަރުގެ އެޕްރީލް މަހުގެ 24 ވަނަ ދުވަހު މުއިއްޒުގެ ފަރާތުން އެ ކޯޕަރޭޝަނަށް ސިޓީއެއް ލިބިފައިވާކަމަށް އެ ކޯޕަރޭޝަނުން ބުނެއެވެ. ނަމަވެސް މި ސިޓީގައި ވަނީ އިލްތިމާސްތަކެއްކަމަށް ވަނީ ބުނެފައެވެ. މި ސިޓީގައި އެއްވެސް މައުލޫމާތަކަށްވެސް އަދި އެއްވެސް ރައްދަކަށްވެސް އެދިވަޑައިގަނެފައި ނުވާކަމަށް އެ ކޯޕަރޭޝަނުން ބުނެއެވެ. މީގެއިތުރުން މާލޭ ސިޓީ ކައުންސިލުން މިހާތަނަށް އެއްވެސް ކަމަކާއި ގުޅޭގޮތުން މައުލޫމާތަކަށް އެދި މި ކޯޕަރޭޝަނަށް މުއާމަލާތެއްކޮށްފައިނުވާކަމަށާއި އެއްވެސް ކަމަކަށް އެދިގެން އެ ކޯޕަރޭޝަނުން އެކަމަށް އިންކާރުކޮށްފައި ނުވާނެކަމަށްވެސް އެ ކޯޕަރޭޝަނުން ވަނީ ބުނެފައެވެ.