އައިޖީއެމްއެޗް ސައިކޭޓްރީ ޑިޕާޓްމަންޓުގެ ވެއިޓިންގ ލިސްޓްގައި 2000 ރައްޔިތުން

އައިޖީއެމްއެޗް ސައިކޭޓްރީ ޑިޕާޓްމަންޓުގެ ވެއިޓިންގ ލިސްޓްގައި 2000 ރައްޔިތުން ހިމެނޭކަމަށް އައިޖީއެމްއެޗް ޑޮކްޓަރސް އެޕޮއިންޓްމަންޓް ޑިޕާޓްމަންޓުން މަޢުލޫމާތު ދެއްވައިފިއެވެ. އަދި މިހުރިހާ ރައްޔިތުންނަށް ހިދުމަތް ދިނުމަށް އެންމެ މަދުވެގެން އެއް އަހަރު ދުވަސް ނަގާނެކަމަށް އަންދާޒާ ކުރެވޭކަމަށާއި ހިދުމަތަށް އެދޭ ފަރާތްތަކުން މަދުވެގެން 1 އަހަރު ދުވަހު މަޑުކުރަންޖެހޭނެ ކަމަށްވެސް މަޢުލޫމާތު ދެއްވިއެވެ.

އައިޖީއެމްއެޗްގެ ވެބްސައިޓުން ފެންނަގޮތުން ސައިކޭޓްރީ ޑިޕާޓްމަންޓުގައި މިވަގުތު ތިއްބެވީ އެންމެ 4 ޑޮކްޓަރުންނެވެ. ރައްޔިތުން މިހާބޮޑަށް ބޭނުންވާކަމެއް މިގޮތަށް ހިނގަމުންދާތީ ގިނަ އަދަދެއްގެ އާންމުން ދަނީ މީސްމީޑިއާގައި ހިތްހަމަނުޖެހުން ހިއްސާކުރައްވަމުންނެވެ.

advertisement

ރާއްޖޭގެ އެކި ކަންކޮޅުތަކުގައި ހުރި ހޮސްޕިޓަލްތަކަށް ސަރުކާރުން މިއަހަރުން 3.2 ބިލިއަން ރުފިޔާ ޙަރަދުކުރުމަށް ވަނީ ނިންމަވާފައެވެ. އަދި އައިޖީއެމްއެޗް އަށް މިދިޔަ އަހަރުވެސް 1.1 ބިލިއަނަށްވުރެ ގިނަ ފައިސާވަނީ ޙަރަދު ކޮށްފައެވެ. އަދި މިއަހަރުގެ ބަޖެޓުގައިވެސް ބިލިއަނެއް ވަނީ ޙަރަދުކުރުމަށް ނިންމަވާފައެވެ.

ކޮވިޑްގެ ތެރޭގައިވެސް ރައްޔިތުންގެ ޓެކްސް ފައިސާއިން 145 މިލިއަނަށް ވުރެ ގިނަ ފައިސާވަނީ އައިޖީއެމްއެޗް އަށް ހަރަދުކުރެވިފައެވެ. ފާހަގަކޮށްލަންޖެހޭ ކަމަކީ އައިޖީއެމްއެޗް ހިންގަނީ މާލޭ ހޮސްޕިޓަލް ބޯޑު އޮފް ޓްރަސްޓީސްގެ ދަށުން ހެލްތް މިނިސްޓްރީގެ އެއްވެސް ރޯލެއްނެތި ސީދާ ރައީސް އޮފީހުގެ ބެލުމުންގެ ދަށުންނެވެ. އަދި ރައީސް އޮފީހުގެ މިނިސްޓަރ އަލީ ޝިޔާމް ވިލަރެސްކުރައްވާގޮތަށް އައިޖީއެމްއެޗްގެ ސީއީއޯ އިބްރާހީމް ސަލީމް (ބަންދު ސަލީމް) ގެ ބެލުމުގެ ދަށުންނެވެ.