ކޮކާކޯލާ މޯލްޑިވްސްއިން ބޮނަކުއާގެ 1 ލީޓަރު ބިއްލޫރި ފުޅި ތައާރަފްކޮށްފި

ކޮކާކޯލާ މޯލްޑިވްސްއިން ބޮނަކުއާ އެއް ލީޓަރުގެ ބިއްލޫރި ފުޅި ތައާރަފުކޮށްފި އެވެ. މިއީ ތިމާވެއްޓާ ރައްޓެހިގޮތަކަށް ތައާރަފްކޮށްފައިވާ ފެންފުޅިއެކެވެ.

ބޮނަކުއާއިން އަލަށް ތައާރަފް މިކުރި 1 ލީޓަރުގެ ބިއްލޫރި ފުޅިތައް އެންމެ ފުރަތަމަ ތައާރަފުކުރާނީ ބައެއް ރިސޯޓުތަކާއި ހޮޓެލްތަކުގެ އިތުރުން ކެއިންބުއިމުގެ ހިދުމަތްދޭ ތަންތަނުގަ އެވެ. އަދި އެއަށްފަހު މީހުން ދިރިއުޅޭ ހުރިހާ ރަށަކަށްވެސް މި ފުޅިތައް ތައާރަފުކުރާނެ އެވެ. ‘ކޯކް2ހޯމް’ މޮބައިލް އެޕްލިކޭޝަން މެދުވެރިކޮށްވެސް މި ފުޅިތަކަށް އޯޑަރު ކުރެވޭނެ އެވެ.

advertisement

މިކަމާ ގުޅޭގޮތުން ކޮކާކޯލާ ސްރީލަންކާއާއި ރާއްޖޭގެ މެނޭޖަރު ޕަންކަޖު ސިންހާ ވިދާޅުވީ އެކުންފުނީގެ އުފެއްދުންތައް ބަންދުކުރާ ގޮތް ބަދަލުކޮށްގެން، “ވޯލްޑް ވިތައުޓް ވޭސްޓް” އަމާޒަށް ވާސިލުވާން މަސައްކަތް ކުރަމުންދާ ކަމަށެވެ. ރާއްޖޭގައި ބޮނަކުއާގެ ރިޓާނަބަލް ބިއްލޫރި ފުޅި ތައާރަފުކުރުމަކީ އެ އަމާޒަށް ވާސިލުވުމުގައި އެޅޭ މުހިންމު ފިޔަވަޅެއް ކަމަށް އޭނާ ވިދާޅުވި އެވެ.

ކޮކާ ކޯލާއިން ދަނީ ދުނިޔޭގެ އެހެން ގައުމުތަކުގައިވެސް ބޮނަކުއާ ބްރޭންޑަށް ހާއްސަ މިފަދަ ބިއްލޫރި ފުޅިތައް ތައާރަފުކުރަމުންނެވެ. ބޮނަކުއާގެ ބިއްލޫރި ފުޅި ރާއްޖެއަށް ތައާރަފުކުރި ނަމަވެސް، ކޮކާކޯލާއިން ބުނީ އެކުންފުނިން ވިއްކާ ބޮނަކުއާ ޕެޓް ފުޅިވެސް ލިބެން ހުންނާނެ ކަމަށެވެ.

ކޮކާކޯލާއިން 2018 ވަނަ އަހަރު ވަނީ ޕްލާސްޓިކް މަދުކުރުމަށް ހާއްސަ ކެމްޕޭނެއް ފަށާފަ އެވެ. އެ ކެމްޕޭނުގެ ދަށުން 2030ގެ ނިޔަލަށް އެކުންފުނިން ވިއްކާ ކޮންމެ ދަޅަކާއި ޕްލާސްޓިކް ފުޅިއަކަށް، ކުނީގެ ގޮތުގައި އުކާލާފައިވާ ދަޅަކާއި ޕްލާސްޓިކް ފުޅިއެއް ރީސައިކަލް ކުރުމަށް ވަނީ ނިންމާފަ އެވެ.