މއ.މޯނިންގވިއު އަލިފާނުގެ ހާދިސާ: ގެއްލުމުގެ ބަދަލުގެ ގޮތުގައި 1 މިލިއަނަށްވުރެ ގިނަ ރުފިޔާ

މއ.މޯނިންގވިއު ގޭގައި މިދިޔަ މަހު ހިނގި އަލިފާނުގެ ހާދިސާގައި ލިބުނު ގެއްލުމަށް އެހީގެ ގޮތުގައި 1،279،000 އަށްވުރެ ގިނަ ރުފިޔާ ޚަރަދުކޮށްފައިވާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭއިން ހާމަކޮށްފިއެވެ.

މޯނިންގވިއު ގޭގައި ހިނގި މިއަލިފާނުގެ ހާދިސާ ހިނގި ދުވަހުން ފެށިގެން މިއަދާ ހަމައަށް 34 ފަރާތަކަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށް އެންޑީއެމްއޭއިން ބުނެއެވެ. މީގެ ތެރެއިން މިވަގުތު ވަގުތީ ބޯހިޔާވަހިކަމުގައި ތިބީ 14 ފަރާތެކެވެ. މިފަރާތްކަށް ފުރަތަމަ 21 ދުވަހަށް ވަގުތީ ހިޔާ ހަމަޖައްސާދީފައިވަނީ މާލޭގެ ގެސްޓް ހައުސްތަކުންނެވެ. ހާދިސާ ހިނގި ދުވަހުން ފެށިގެން ފުރަތަމަ 21 ދުވަސް ކަމަށްވާ މިމަހުގެ 16 ވަނަ ދުވަހުގެ ނިއަލަށް ވަގުތީ ހިޔާ ހަމަޖައްސާ ދިނުމަށް 1،55،000 ރުފިޔާ ވަނީ ޚަރަދުކޮށްފައެވެ. އަދި މިއާއިލާތަކަށް މިމުއްދަތަށް ޒަރޫރީ ކެއިންބުއިން ހަމަޖައްސާ ދިނުމަށް ފައިސާގެ ގޮތުގައި 1،41،000ރުފިޔާ ހަމަޖައްސާދީފައިވެއެވެ. އަދި ހާދިސާ ހިނގި ދުވަހު ޒަރޫރީ އަންނައުނު ހޯދުމަށް އާއިލާތަކަށް އެހީތެރިކަން ފޯރުކޮށްދިނުމަށް 46،000 ރުފިޔާ ފައިސާގެ ގޮތުގައި އާއިލާތަކަށް ހަމަޖައްސާ ދީފައިވާކަމަށް އެންޑީއެމްއޭއިން ވިދާޅުވެއެވެ. އެހެންކަމުން ވަގުތީ ހިޔާ ހަމަޖެއްސުމަށާއި ރިލީފް އެހީގެ ފޯރުކޮށްދިނުމަށް މިހާތަނަށް ޖުމުލަ 3،42000 ރުފިޔާ ޚަރަދު ކޮށްފައިވެއެވެ.

advertisement

މިހާދިސާއާއި ގުޅިގެން 8 ގޭބިސީއެއްގެ އެސެސްމަންޓް ހަދާފައިވާ ކަމަށާއި، އެގޮތުން މިއެސެސްމަންޓްގައި ގޭބިސީތަކުގެ ސްޓްރަކްޗަރލްއަށް ލިބުނު ގެއްލުމާއި، ޒަރޫރީ ހިފާ ގެންގުޅޭ ތަކެއްޗަށް ލިބުނު ގެއްލުން ބަލާ އެސެސްކޮށްފައިވެއެވެ. އެގޮތުން ސްޓްރަކްޗަރަލްއަށް ލިބުނު ގެއްލުންތަކަށް 658،408.80 ރުފިޔާ އަދި ޒަރޫރީ ހިފާ ގެންގުޅޭ ތަކެއްޗަށް ލިބުނު ގެއްލުމަށް 46،685 ރުފިޔާ އާއެކު ޖުމްލަ 705،093.80 ރުފިޔާ ދިނުމަށް ސަރުކާރުން ހަމަޖައްސާފައިވެއެވެ.

އާއްމު ހާލަތަށް ރުޖޫޢަވުމަށް މައިގަނޑު 2 ކެޓަގަރީއަކުން އެހީތެރިވެދޭކަމަށް އެ އޮޓޯރިޓީން ވިދާޅުވެއެވެ. އެގޮތުން ކުއްޔަށް ދިރިއުޅުނު އާއިލާ އަލުން ތަނެއް ކުއްޔަށް ހިފައިގެން ދިއުމަށް ދޭ އެހީގެ ގޮތުގައި މިހާދިސާގައި 2 އާއިލާއަކަށް 92،300 ރުފިޔާ ހަމަޖައްސާދީފައިވެއެވެ. އަދި ގޭގަ ދިރިއުޅޭ ފަރާތްތަކަށް ގެ މަރާމާތުކުރުމަށް ދާ މުއްދަތަށް 2 އާއިލާއަކަށް 232،300 ރުފިޔާއާއެކު ބޯހިޔާވަހިކަން ހަމަޖައްސާ ދިނުމަށް ޖުމްލަ 232،300 ހަމަޖައްސާދީފައިވާ ކަމަށް އެންޑީއެމްއޭއިން ވިދާޅުވެއެވެ. އެހެންކަމުން މޯނިންގވިއު ގޭގައި ހިނގި މިއަލިފާނުގެ ހާދިސާގެ މުޅި އޮޕަރޭޝަނަށް ރިލީފް އެހީގެ ގޮތުގައި 1،279،393.80 ރުފިޔާ ޚަރަދުވާނެ ކަމަށް އަންދާޒާ ކުރެވިފައިވާ ކަމަށް އެންޑީއެމްއޭއިން ވިދާޅުވެއެވެ.