“ގްރޫމްގެ ޝިކާރައަކަށްވާ ކުދިންނަށް އިންސާފު ހޯދައިދިނުމަށް އިދާރާތަކާއި ގުޅިގެން ދަނީ މަސައްކަތް ކުރަމުން”

ގްރޫމްގެ ޝިކާރައަކަށްވާ ކުދިންނަށް އިންސާފު ހޯދައިދިނުމުގައި ކަމާގުޅުންހުރި ފަރާތްތަކާއިއެކު މަސައްކަތްކުރަމުންދާކަމަށް ޗައިލްޑް އެންޑް ފެމިލީ ޕްރޮޓެކްޝަން ސަރވިސްއިން ވިދާޅުވެއްޖެއެވެ.

އެ އިދާރާއިން ބުނީ ކުޑަކުދިން ގްރޫމްކޮށް އެކުދިންގެ އިތުބާރު ހޯދާ އެކި ބާވަތުގެ އަނިޔާކުރުމަކީ އެ އިދާރާއަށް ވަރަށް ގިނައިން ހުށައެޅޭ މައްސަލަތަކެއްކަމަށެވެ. މިފަދަ މައްސަލަތައް ހުށައެޅޭ ހިސާބުން ޕޮލިސް ސަރވިސްއަށް މައްސަލަ ހުށައަޅާ ކުއްޖާގެ ރައްކާތެރިކަން ކަށަވަރުކުރުމަށް ކުރަންޖެހޭ ކަންކަން ކުރަމުންދާކަމަށް އެ އިދާރާއިން ވަނީ ބުނެފައެވެ. މިގޮތުން، ދަޢުލަތުގެ ބެލުމުގެ ދަށުގައިވާ ކުއްޖަކަށް އަނިޔާ ލިބިގެން ރިޕޯޓުކުރާ މައްސަލަތަކުގައި މުވައްޒަފެއްގެ އިހުމާލުވާނަމަ، އެކަންވެސް ބަލާ ސިވިލް ސަރވިސްގެ ޤަވާއިދުގެ ދަށުންނާއި ކުޑަކުދިންގެ ހައްޤުތައް ރައްކާތެރިކުރުމާއި ބެހޭ ޤާނޫނުގެ ދަށުން އަޅަންޖެހޭ ފިޔަވަޅު އަޅަމުންދާކަމަށްވެސް ވަނީ ބުނެފައެވެ.

advertisement

މީސްމީޑިޔާގައި ދައުރުވަމުންދާ ދައުލަތުގެ ބެލުމުގެ ދަށުގައިވާ ކުއްޖެއް ގްރޫމްކުރުމުގެ މައްސަލައާއި ގުޅިގެން މޯލްޑިވްސް ޕޮލިސް ސަރވިސްއިން ދަނީ މި މައްސަލަ ތަހުޤީގުކުރަމުންކަމަށްވެސް ވަނީ ބުނެފައެވެ. އަދި މި މައްސަލާގައި ތުހުމަތު ކުރެވޭ ފަރާތެއްވަނީ އެއިދާރާއިން ހައްޔަރުކޮށްފައެވެ. މީގެ އިތުރުން މިމައްސަލައާއި ގުޅިގެން ކުއްޖާގެ ރައްކާތެރިކަން ކަށަވަރުކުރުމަށްޓަކައި އެ ސަރވިސްއިންވަނީ ކުއްޖާ ބަލަހައްޓަމުން އަންނަގޮތް އިތުރަށް ހަރުދަނާކުރުމަށްޓަކައި ފިޔަވަޅުތަކެއްއަޅައިފައިކަމަށް ޗައިލްޑް އެންޑް ފެމިލީ ޕްރޮޓެކްޝަން ސަރވިސްއިން ވަނީ ބުނެފައެވެ.

މި ކުދިންނަށް ނަފްސާނީ އެހީތެރިކަން ފޯރުކޮށްދިނުމުގައި ކަމާއި ގުޅުންހުރި އެފަދަ ޚިދުމަތް ދޭފަރާތްތަކާއި ގުޅިގެން ކުއްޖާއަށް ބޭނުންވާ ޚިދުމަތް ހޯދުމުގެ މަސައްކަތް އެ ސަރވިސް އިން ކުރާކަމަށްވެސް ވަނީ ބުނެފައެވެ.