“ގެދޮރުވެރިޔާ ފްލެޓް” މާލެއާއި އަތޮޅުތަކުގައިވެސް ބޯހިޔާވަހިކަމުގެ މަޝްރޫއުތައް ކުރިއަށް

ކޯވިޑާއެކުވެސް ތަރައްޤީގެ މަޝްރޫޢުތަކުގެ މަސައްކަތްތައް ހުއްޓާނުލައި ކުރިއަށްދާކަމަށް ސަރުކާރުން ވިދާޅުވެއްޖެއެވެ. އެގޮތުން “ގެދޮރުވެރިޔާ ފްލެޓް” ހައުސިންގ ސްކީމާއި ސަރުކާރުގެ ބޯހިޔާވަހިކަމާއި ތަރައްޤީގެ ބައެއް މަޝްރޫޢު ތަކުގެ ތަފްސީލް ސަރުކާރުން ވަނީ ދެއްވާފައެވެ.

ރައީސުލްޖުމްހޫރިއްޔާގެ އޮފީހުގެ ސްޕޯކްސްޕަރސަން މުޙައްމަދު މަބްރޫކް ޢަޒީޒް “ގެދޮރުވެރިޔާ ފްލެޓް” ސްކީމަކީ މާލެ ސަރަޙައްދުގައި ތަރަޢްޤީކުރުމަށް ނިންމާފައި ބޯހިޔާވަހިކަމުގެ މަޝްރޫޢުތަކުގެ އިތުރުން އަތޮޅުތަކުގައި ވެސް ބޯހިޔާވަހިކަން ތަރައްޤީކޮށް އެފަދަ އިންތިޒާމުތައް ރޭވުމަށް ސަރުކާރުން އެހީތެރިކަން ފޯރުކޮށްދިނުގެ ގޮތުން ކުރެވޭ މަސައްކަތެއްކަމަށެވެ. ހަމަ އެހެންމެ ހައުސިންގ ޑިވެލޮޕްމަންޓް ފައިނޭންސް ކޯޕަރޭޝަން (އެޗް.ޑީ.އެފް.ސީ) މެދުވެރިކޮށް މިހާރު މި ލޯނު ސްކީމުގެ ދަށުން ލޯނަށް އެދި ހުށަހެޅުމުގެ ފުރުޞަތު ހުޅުވާލައި އެޕްލިކޭޝަން ފޯމު އެޗްޑީއެފްސީގެ ވެބްސައިޓް މެދުވެރިކޮށް ލިބެން ހުންނާނެކަން މަބްރޫކް ފާހަގަކުރެއްވިއެވެ.

advertisement

މާލެ ސަރަޙައްދުގައި ބޯހިޔާވަހިކަން ތަރައްޤީކުރުމަށް ސަރުކާރުން ގެންގުޅޭ ސިޔާސަތުގެ ދަށުން 3 ކެޓަގަރީގެ ހައުސިން ތަރައްޤީކުރާއިރު މި މަސައްކަތުގެ ފަހުގެ ތަފްޞީލުތައް ވެސް މަބްރޫކު ދެއްވާފައިވެއެވެ. އެގޮތުން  އެފަދަ ފުރަތަމަ ޕްރޮޖެކްޓުގެ ބިންގާ އަޅާފައިވާކަމަށާ އެއީ ކޮންޓްރެކްޓަރ ފައިނޭންސިންގ އުސޫލުން އެޕޯލޯ ކުންފުނިން ތަރައްޤީކުރާ ހައުސިންގ ޔުނިޓްތަކުގެ މަސައްކަތްކަން މަބްރޫކް ފާހަގަ ކުރެއްވިއެވެ. ޖުމްލަ 9 ޓަވަރެއް އެޅުމަށް ނިންމާފައިވާއިރު އޭގެ ތެރޭގައި ކައުންސިލް ހައުސިންގެ ގޮތުގައި ތަރައްޤީކުރާ 120 ޔުނިޓް ހިމެނެއެވެ. އޭގެ ތެރޭގައި ހިމެނެނީ ދެ ކޮޓަރީގެ 60 ޔުނިޓާ 3 ކޮޓަރީގެ 60 ޔުނިޓެވެ. މީގެ ތެރޭން 2 ކޮޓަރީގެ ޔުނިޓްތައް ނިމޭއިރު އެތަންތަނުގެ ކުއްޔެއްގެ ގޮތުގައި ކަނޑައަޅާފައި ވަނީ 5500 ރުފިޔާއެވެ. އަދި މި ކެޓަގަރީގެ 3 ކޮޓަރީގެ އެޕާޓްމަންޓްތަކުގެ ކުއްޔެއްގެ ގޮތުގައި ކަނޑައަޅާފައި ވަނީ 7000 ރުފިޔާއެވެ. މި ޕްރެސްކޮންފަރެންސްގައި މަބްރޫކް ވަނީ އެފޯޑަބުލް ހައުސިންގ ކެޓަގަރީ އަދި މިޑް ލެވެލްގެ ހައުސިންގ ޔުނިޓްތަކުގެ ތަފްޞީލުތައް ވެސް ޙިއްޞާކުރައްވާފައެވެ.

މި ސަރުކާރުން ތަރައްޤީކުރާ ހައުސިންގ ޔުނިޓްތަކާއި ކުރީގެ އެހެން ހައުސިންގ މަޝްރޫޢުތަކާ ހުރި އެންމެ ބޮޑު ތަފާތަކީ ކުޑަ ކުއްޔެއް ކަނޑައަޅާފައި ވުމާއެކު ޖާގައިގެ ގޮތުން ތަނަވަސް ތަންތަން ކަމުގައިވުންކަން މަބްރޫކް ފާހަގަކުރެއްވިއެވެ.

މަބްރޫކް ވިދާޅުވީ ހިޔާ ފްލެޓްތަކުގެ އެގްރިމަންޓްތަކުގައި ސޮއެކުރުމުގެ މަސައްކަތް އަންނަ މަހުގެ 14 އިން ފެށިގެން 1 މަސް ދުވަހުގެ ތެރޭގައި ކުރާނެކަމަށެވެ. އޭގެ އިތުރުން މިހާރު ވެސް ސްޓެލްކޯއިން ހިޔާ ފެލެޓްތަކުގައި ބައެއް މަސައްކަތްތައް ކުރިޔަށް ގެންދާކަން މަބްރޫކް ފާހަގަކުރެއްވިއެވެ.