ވަކި ގޮތަކަށް މީހުން ލޭބަލްކުރުމަކީ ޖިނާއީ ކުށަކަށް ހެދުމަށް ޕެޓިޝަނެއް

ނަފްރަތު އުފެއްދުމާއި ވަކި ގޮތަކަށް މީހުން ލޭބަލްކޮށް ވާހަކަ ދެއްކުމަކީ ޖިނާއީ ކުށަކަށް ހެދުމަށް ގޮވާލައި އޮންލައިން ޕެޓިޝަނެއްގައި ސޮއިކުރަން ފަށައިފި އެވެ.

މީހުންގެ ދީނީ އަގީދާއާ ގުޅުވައިގެން ނަފުރަތު އުފެއްދުން ކުށަކަށް ހެދުމަށް ގާނޫނުލްއުގޫބާތަށް މާއްދާއެއް އިތުރުކުރަން ސަރުކާރުން ރައްޔިތުންގެ މަޖިލީހަށް ބިލެއްވެސް ވަނީ ހުށަހަޅާފައެވެ. އޮންލައިން ޕެޓިޝަނުގައި ސޮއިކުރުމަށް، ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވެސް ވަނީ އެދިވަޑައިގަނެފައެވެ.

advertisement

“ހަސަން ކުރުސީ” ނަމަކަށް ކިޔާ މީހަކު ފެށި ޕެޓިޝަނުގައި ބުނީ، އެ ޕެޓިޝަނުގެ ބޭނުމަކީ މީހުންނަށް ލާދީނީ އަދި ކާފަރަށް ގޮވުން ހުއްޓުވުން ކަމަށެވެ. ނަޝީދު އަވަހާރަ ކޮށްލަން ދިން ޓެރަރިސްޓް ހަމަލާއަކީ ވެސް ހަރުކަށި ވިސްނުން ހައްދުފަހަނައަޅައި ގޮސްފައިވާ ކަމުގެ މިސާލެއް ކަމަށް ޕެޓިޝަނުގައި ވެ އެވެ.

މީހުންގެ ދީނީ އަގީދާއާ ގުޅުވައިގެން ނަފުރަތު އުފެއްދުން ކުށަކަށް ހެދުމަށް ގާނޫނުލްއުގޫބާތަށް މާއްދާއެއް އިތުރުކުރަން ސަރުކާރުން ރައްޔިތުންގެ މަޖިލީހަށް ބިލް ހުށައެޅީ ސަރުކާރުގެ ފަރާތުން ތުޅާދޫ ދާއިރާގެ އެމްޑީޕީގެ މެމްބަރު ހިސާން ހުސައިންއެވެ. މި ބިލްގެ އެއްވަނަ ނަމްބަރުގައިވާ ގޮތުން، އެ ބިލު ގާނޫނަކަށް ވުމުން، ވަކި މީހަކީ އިސްލާމްދީނާ ހިލާފަށް އުޅޭ މީހެއް ކަމަށް ނުވަތަ ދީނާ ދެކޮޅު މީހެއް ކަމަށް އާއްމު ތަނެއްގައި ބުނުން ވާނީ ޖަލު ހުކުމެއް އަންނާނެ ކުށަކަށެވެ. އެ މާއްދާ އެހެން އޮންނާތީ ބައެއް ދީނީ އިލްމުވެރިންނާއި އާއްމުން ވެސް ގެންދަނީ ކަންބޮޑުވުން ފާޅުކުރަމުންނެވެ. އެކަމާ ކަންބޮޑުވުން ފާޅުކުރާ ފަރާތްތަކުން ދެކޭ ގޮތުގައި އެއީ ރާއްޖޭގައި ފާޅުގައި އިސްލާމްދީނާ ދެކޮޅަށް ވާހަކަ ދައްކާ މީހުންނަށް ލިބިގެންދާނެ ބޮޑު މިނިވަންކަމަކަށް ވާނެ އެވެ.

އެހެންވެ، އެ ބިލް އަނބުރާ ގެންދިއުމަށް ގޮވާލައި 101 ދީނީ އިލްމުވެރިޔަކު ސޮއިކޮށް ރައީސް އިބްރާހިމް މުހައްމަދު ސޯލިހަށް ވެސް ޕެޓިޝަނެއް ފޮނުވާފައި ވެ އެވެ.