ހިތާނުކުރުމުގެ ސަބަބުން ދިރިއުޅުން ބަރުބާދުކޮށްލި އަންހެނެއްގެ ހިތްދަތި ވާހަކަ

“އެއީ ހަޔާތުގައި ކުރި އެންމެ ހިތި ތަޖުރިބާ” މީގެ 52 އަހަރުގެ ކުރީގެ ހަނދާންތައް އާކުރަމުން ފާތުން ބުންޏެވެ.

އައްޑޫއަށް އުފަން ފާތުންނަކީ އުމުރުން އެންމެ 5 އަހަރުގައި ހިތާނުކޮށްފައިވާ މީހެކެވެ. އެއީ އޭނާ ބޭނުންވެގެން ކޮށްފައިވާ ކަމެއްނޫނެވެ. ނަމަވެސް އަންހެން ކުދިން ހިތާނުކުރުމަކީ އެޒަމާނުގައި ސަޤާފަތެއްގެ ގޮތުގައި ވެފައިވާކަމެކެވެ. މިކަންކަން ގިނަ އާއިލާތަކުން ކުރަމުން އައިސްފައިވަނީ މަޖުބޫރުވެގެންނެވެ. އެ ޒަމާނުގައި ހުރިހައި އަންހެން ކުދިން ކަހަލަ ގޮތަކަށް އައީ ހިތާނުކުރަމުންނެވެ.

advertisement

1960 ގެ ހަނދާންތައް އެމްވީ ޕްލަސްއަށް ހިއްސާކުރަމުން ފާތުން ބުނީ ހިތާނުކުރުމަކީ އޭނާގެ ހަޔާތުގައި ކުރި އެންމެ ހިތި ތަޖުރިބާކަމަށެވެ. ހިތާނުކުރުމުގެ ސަބަބުން ލިބުނު ގެއްލުމުން މިއަދުވެސް އޭނާއަށް އަރައިގަނެވިފައި ނުވާކަމަށް ފާތުން ބުންޏެވެ.

“އެއީ ހަޔާތުގައި ކުރި އެންމެ ހިތި ތަޖުރިބާ. އެކަންކުރުމުގެ ސަބަބުން ލިބުނު ގެއްލުމުގެ ސަބަބުން މުޅި އުމުރު އެކަމައިގެން އުޅެން ޖެހިފައި ވަނީ. އެކަމާއި ދެކޮޅަށް ސަރުކާރުން އެބަޖެހޭ ކަންތައްތައްކުރަން. އެކަން ނިމިފައި އޮއްވައި އަނެއްކާ އެކަން ކުރުވަން ބާރުއަޅާ ބަޔަކު މިއުޅެނީ. މިކަން އެބަޖެހޭ ހުއްޓުވަން. ކުއްޖެއްގެ މުޅި ދިރިއުޅުން ބަރުބާދުކޮށްލާކަމެއް އެއީ.” ފާތުން ބުންޏެވެ.

ފާތުން ބުނީ އުމުރުން 5 އަހަރުގައި ކުރަންޖެހުނު މި ހިތި ތަޖުރިބާއިން މުޅި އުމުރު ދުވަހު މަސައްކަތް ކުރިއަސް އަރައިނުގަނެވޭނެކަމަށެވެ. އަދި މިކަން ރަނގަޅު ކުރެވޭނެ ގޮތެއްވެސް ނެތްކަމަށެވެ. ނަފްސާނީ ގޮތުންނާއި ޖިސްމާނީ ގޮތުންވެސް ހިތާނުކުރުމުގެ ސަބަބުން ގިނަ ގެއްލުންތަކެއް ލިބިފައިވާކަން ފާހަގަކޮށް ފާތުން ބުނީ ކުޑަކަމުދާ ނިޒާމުގެ %75 ވެސް ހިތާނުކުރުމުގެ ސަބަބުން ހަލާކުވެފައިވާކަމަށެވެ. އަދި އަބަދުވެސް ނުކެނޑޭ ތަދެއް ހުންނަކަމަށް އޭނާ ވަނީ ބުނެފައެވެ.

“މިކަމުގެ ސަބަބުން ދިރިއުޅުން މުޅި ހަލާކު މީހާ ދުނިޔޭގައި އުޅުނަކަސް. ދިރިއުޅުން ހަމަ ބަރުބާދު. އެއީ ނަފްސާނީ އެތައް ގެއްލުމެއް އޭގެ ސަބަބުން ލިބުނު. ފިޒިކަލް އެތައް ގެއްލުމެއް، ކުޑަކަމުދާ ނިޒާމުގެ ގާތްގަނޑަކަށް %75 ހަލާކުވެފައި ހުރީ. ބޭރަށްދާ ކޮންމެ ފަހަރަކު ގައިނޮކޮލޮޖިސްޓުންނަށްވެސް ދައްކަން. އެމީހުން ބުނަނީ އެއަކަށް ނޯންނާނެއޭ ދެން ކުރާނެކަމެއް. އެކަން އެގޮތައް ނިމިފައޭ އެހުރީ. އެވޭން ތަހައްމަލްކުރަމުންދާއިރު ހިތައްއަރާ ލިވަރ ކަހަލަ ތަނެއް ނަމައޭވެސް. އެއީ އޭގެ ޒާތުން ބައެއް ކަނޑާލިއަސް އެބަ އުފެދި ބޮޑުވޭ. ހިތައްއަރާ ބައެއް ފަހަރު އެކަހަލަ ތަނަކަށް ވީނަމަ ކިހާ ރަނގަޅު ހެއްޔޭވެސް.” ފަތުން ބުނެޏެވެ.

އަންހެންކުދިން ހިތާނުކުރުމަށް ކުރެވޭ ބަހުސްތައް އަނެއްކާވެސް މިވަނީ ގަދަވެފައެވެ. ގިނަ މީހުން މިކަމާއި ދެކޮޅަށް ވާހަކަ ދެއްކިނަމަވެސް މަދުން ނަމަވެސް މިކަމާއި އެއްކޮޅަށް ވާހަކަ ދައްކާ މީހުން އަޅުގަނޑުމެންގެ މި މުޖްތަމައުގައި އެބައުޅެއެވެ.

އުމުރުން 57 އަހަރުގެ ފާތުން ބުނީ ގިނަ ދުވަސްތަކަކަށްފަހު އަނެއްކާވެސް އަންހެން ކުދިން ހިތާނުކުރުމުގެ ވާހަކަތައް ގަދައަޑުން ދެކެވޭތީ އޭނާ ވަރަށް ބޮޑަށް ކަންބޮޑުވާކަމަށެވެ. އަދި މީގެ ސަބަބުން ނަފްސާނީ ގޮތުންވެސް އޭނާއަށް ބޮޑެތި އަސަރުތަކެއް ކުރަމުން އަންނަކަމަށެވެ. އޭނާ ބުނީ ހިތާނުކުރި ދުވަހުގެ އެ ރިހުމާއި އެ ދުވަހުގެ އެ ހަނދާންތައް އައިސް އަނެއްކާވެސް އެ ހިޔާލުން ސިކުނޑި ފޯވެފައިވާކަމަށެވެ.

” މިހާރު މިވާހަކަ ދެކެވެން ފެށީމައި އަނެއްކާވެސް އެ ހަނދާންތައް އާދޭ. މި ދުވަސްކޮޅު އަޅުގަނޑު މެންޓަލީ ވަރަށް ސަކަރާތްވެފައި މި ހުންނަނީ. އެތައް އަހަރަކަށްފަހު މި ވާހަކަތައް ދެކެވެން ފެށީމައި ނަފްސާނީ ގޮތުން ސަކަރާތްވެގެން ކައުންސިލިންވެސް އެބަ ނަގަން.” ފާތުން ބުންޏެވެ.

އަންހެން ކުދިން ހިތާނުކުރުން ރާއްޖޭގައި އޮތް ގޮތާއި ގުޅޭގޮތުން ފާތުން ވަނީ އޭނާ އަމިއްލައަށް ދިރާސާއެއްވެސް ހަދާފައެވެ. އަންހެނުން ހިތާނަކުރުމުގެ ކަންކަން އެންމެ ބޮޑީ، އައްޑު އާއި ފުވައްމުލަކުގަ އެވެ. އޭނާ ބުނީ، އުތުރުގެ އަތޮޅުތަކުގައި އެކަން ކުރަނީ ތިނޯހަކުން ލޭދައްކާލުމުގެ ކަމެއްގެ ގޮތުގައި ކަމަށާއި މެދު ރާއްޖެތެރޭގެ އަތޮޅުތަކުގައި ކުޑަ ތަންކޮޅެއް ބުރިކޮށްލާ ކަމަށެވެ. ނަމަވެސް އައްޑޫގައި ވަރަށް އިހުން ފެށިގެން ވަރަށް ބޮޑަށް އަންހެނުން ހިތާނަކުރަމުންދިޔަ ކަމަށް އޭނާ ބުންޏެވެ.

އަންހެނުން ހިތާނުކުރުމުގެ ނަމުގައި ހިންގާ، “ފީމޭލް ޖެނިޓަލް މިއުޓިލޭޝަން (އެފްޖީއެމް)”ގެ މައްސަލަތައް ރާއްޖޭގައި އިތުރަވަމުންދާ ކަމަށާއި އެފަދަ މައްސަލަތައް ހުށަހަޅާލެއް ގިނަ ކަމަށް އެޗްއާރްސީއެމުން މިދިޔަ ހަފުތާގައި ވަނީ ބުނެފަ އެވެ.

މިކަން ތަޖުރިބާކޮށް މިކަމުގެ ވޭނުގައި އުޅެމުންދާ ފާތުން ބުނީ އެއްވެސް އަންހެނަކު މިކަން ތަޖުރިބާކުރަން އޭނާ ބޭނުންނުވާކަމަށެވެ. އަދި މިއީ އަންހެނެއްގެ މުޅި ދިރިއުޅުން ބަރުބާދުކޮށްލާ ކަމެއްގެ ގޮތުގައި އޭނާ ވަނީ ސިފަކޮށްފައެވެ.