އިންސްޓިޓުއުޓް ނުވަތަ ކޮލެޖްގެ އެއްވެސް މައުލޫމާތަކަށް ބަދަލެއް އައިސްފިނަމަ އެންގުމަށް ހަޔަރ އެޑިޔުކޭޝަނުން އެދިއްޖެ

އިންސްޓިޓުއުޓް ނުވަތަ ކޮލެޖްގެ އެއްވެސް މައުލޫމާތަކަށް ބަދަލެއް އަތުވެއްޖެނަމަ އެކަން ހަޔަރ އެޑިޔުކޭޝަންއަށް އަންގަންޖެހޭނެކަމަށް އެ މިނިސްޓްރީން ވިދާޅުވެއްޖެއެވެ.

އެ މިނިސްޓްރީން މިހެން ބުނެފައިވަނީ ބައެއް ކޮލެޖް/ އިންސްޓިޓިއުޓްތަކުން މިނިސްޓްރީއަށް އަންގަންޖެހޭ ކަންކަން ނާންގައި ހުންނަކަން ފާހަގަކުރެވެމުންދާތީ، އެންމެހާ ކޮލެޖްތަކާއި އިންސްޓިޓިއުޓްތަކުން ގަވާއިދާ އެއްގޮތަށް ކަންކަން ކުރިއަށް ގެންދެވުމަށް ހަނދާންކޮށްދިނުމަށްޓަކައެވެ.
މިނިސްޓްރީ އޮފް ހަޔަރ އެޑިޔުކޭޝަނުން ވިދާޅުވީ، އެ މިނިސްޓްރީގެ ދަށުގައި ރަޖިސްޓްރީކޮށްފައިވާ މަތީ ތަޢުލީމާއި ތަމްރީނުދޭ މަރުކަޒުތަކާ ބެހޭ މައުލޫމާތު ބެލެހެއްޓުމަކީ އެ މިނިސްޓްރީގެ ޒިންމާތަކުގެ ތެރޭގައި ހިމެނޭ ކަމެއްކަމަށާއި ކޮންމެ މަރުކަޒަކުން ވެސް އެތަނަށް އަންނަ މުހިންމު ބަދަލުތައް މި މިނިސްޓްރީއަށް އަންގަންވާނެކަމަށެވެ. އެގޮތުން، މެނޭޖްމަންޓް، މަސްއޫލުވެރި ފަރާތް، ހިންގާ ވެރިޔާ، ކެމްޕަސް، އައުޓްރީޗް ސެންޓަރ، އެޑްރެސް، ފޯނު ނަންބަރު އަދި އީމެއިލް ފަދަ، ތަނުގެ އެއްވެސް މުހިންމު މައުލޫމާތަކަށް ބަދަލު އަންނަ ނަމަ އަންގަން ވާނެކަމަށް ވަނީ ބުނެފައެވެ.

advertisement

އެ މިނިސްޓްރީން ޢަމަލުކުރަމުންދާ “ކިޔަވައިދޭ ތަންތަން ރަޖިސްޓްރީކޮށް ހިންގުމުގެ ގަވާއިދު” ގެ މާއްދާ 4.11 ގައި ވެސް، ކިޔަވައިދޭ ތަނެއްގެ މަސްއޫލުވެރި ފަރާތް ބަދަލުކުރަން ބޭނުންވާނަމަ، މަސްއޫލުވެރި ފަރާތުން އެގޮތަށް އެދޭކަމުގެ ލިޔުމާއި، މަސްއޫލުވެރިކަން ހަވާލުވާ ފަރާތުން އެކަމަށް އެދޭކަމުގެ ލިޔުމާއި، އެފަރާތުން ތަނުގެ މަސްއޫލުވެރިކަމުގެ ޒިންމާ ފުރިހަމައަށް އަދާކުރާނެ ކަމުގެ ލިޔުމަކާއި އެކު މިނިސްޓްރީއަށް ހުށަހަޅަންވާނެ ކަމުގައި އޮންނާނެކަމަށް ވަނީ ވިދާޅުވެފައެވެ.

އެ ގަވާއިދުގެ 14 ވަނަ މާއްދާގައިވާ ގޮތުން، ގަވާއިދާ ޚިލާފުވާ ފަރާތްތައް ޖޫރިމަނާކުރުމުގެ އިޚުތިޔާރާއި އިންސްޓިޓިއުޓް އުވާލަންޖެހޭ ހާލަތްތަކުގައި އުވާލުމުގެ އިޚުތިޔާރު ވެސް މިނިސްޓްރީއަށް ލިބިގެން ވެއެވެ. އަދި ގަވާއިދާ ޚިލާފުވެގެން އިންސްޓިޓިއުޓެއް އުވާލަންޖެހޭ ހާލަތުގައި މިނިސްޓްރީއާއި ސަރުކާރުން އުފުލަންޖެހޭ ޒިންމާއެއް ނޯންނާނެ ކަމުގައި ވެސް އެމާއްދާގައި އޮވެއެވެ.