ދިވެހި ރެޑްކްރެސެންޓް – މުޖްތަމައުއަށް އެހީވުމުގައި އެންމެ ކުރީ ސަފުގައި!

މޯލްޑިވިއަން ރެޑް ކްރެސެންޓަކީ ދިވެހި ޤައުމަށް ދިމާވާ ކޮންމެ ކަމެއްގައިވެސް ދަރުމައަށް ނިކުމެ އެންމެ ކުރީ ސަފުގައި މަސައްކަތްކުރާ އެއް ޖަމިއްޔާއެވެ. މި ޖަމިއްޔާގެ ގޮފިތައް ރާއްޖޭގެ އެކި ސަރަހައްދުގައި ހިންގަމުން އަންނައިރު އެންމެ އެކްޓިވްކޮށް މަސައްކަތްކުރާ އެއް ގޮތްޕަކަށް މާލެ ރެޑްކްރެސެންޓް ބްރާންޗް ވާނެއެވެ.

ކޯވިޑް19 ގެ މި ހާލަތުގައި ގިނަ ބައެއްގެ ދިރިއުޅުމަށް އަސަރުކޮށް އެހީތެރިވަން ވަނީ ބޭނުންވެފައެވެ. މި ހާލަތުގައިވެސް މުޖްތަމައުއަށް އެހީވުމަށްޓަކައި ރެޑްކްރެސެންޓުން ޚާއްސަކޮށް މާލެ ބްރާންޗުން އަންނަނީ ގިނަ މަސައްކަތްތަކެއް ކުރަމުންނެވެ.

advertisement

ކޯވިޑް19 ގެ ވެކްސިން ރާއްޖެއަށް ލިބުމުގެ ކުރިންވެސް ރެޑްކްރެސެންޓުން ވަނީ ވެކްސިންނާއި ބެހޭގޮތުން އާންމުން ހޭލުންތެރިކުރުވުމަށް މައުލޫމާތު ދިނުމުގެ ހަރަކާތްތަކެއްވެސް ބާއްވާފައެވެ. މި ހަރަކާތް ކުރިއަށްގެންދިޔައީ ގްރޭޓަރ މާލެ ސަރަހައްދުގެ އާންމުން ވެކްސިނަށް ހޭލުންތެރިކުރުމަށްޓައި ރާއްޖޭގައި ހަރަކާތްތެރިވާ ބައިނަލްއަޤްވާމީ ޖަމިއްޔާ ޖަމާޢަތްތަކާއި ކަމާގުޅުން ހުރި އިދާރާތައް ގުޅިގެން ވެކްސިންގެ މައުލޫމާތު ދިނުމަށެވެ.

ރާއްޖޭގައި ޤައުމީ ވެކްސިން ޕްރޮގްރާމް ފެށުމާއިއެކު މާލެ ސަރަހައްދުގައި ވެކްސިން ސެންޓަރުތަކުގައިވެސް ރެޑްކްރެސެންޓުން ވަނީ ބޮޑު ދައުރެއް އަދާކޮށްފައެވެ. އެގޮތުން ވެކްސިން ޖަހަން އަންނަ މީހުންނަށް ވެކްސިންގެ ކަންކަން ކުރިއަށްދާ ގޮތް ބުނެދިނުމާއި، ވެކްސިން ސެންޓަރުތަކުގައި ޤައިދުރުކަމާއިއެކު މީހުންނަށް ވެކްސިން ދިނުމުގެ ކަންކަން ކުރިއަށްދާކަން ކަށަވަރުކުރުމުގެ ގޮތުން ރެޑްކްރެސެންޓުގެ ޓީމުތައް ވަނީ ހަރަކާތްތެރިވެފައެވެ.

މީގެއިތުރުން ވެކްސިން ސެންޓަރުތަކަށްގޮސް ވެކްސިން ޖެހުމަށް ދަތިވާ މީހުންނަށް ޚާއްސަކޮށްގެންވެސް މާލޭގައި ރެޑްކްރެސެންޓުން ވަނީ މޯބައިލް ވެކްސިނޭޝަންގެ ޚިދުމަތައް އެހީތެރިކަން ފޯރުކޮށްދެމުންނެވެ. މިހާރުވެސް 2 މޯބައިލް ވެކްސިން ޓީމު މާލޭގައި އަންނަނީ ހަރަކާތްތެރިވަމުންނެވެ.

މީގެއިތުރުންވެސް ސައިކޯސޯސިއަލް ސަޕޯޓް ބޭނުންވާ މީހުންނަށްވެސް ރެޑްކްރެސެންޓުން އަންނަނީ އެ އެހީތެރިކަން ފޯރުކޮށްދެމުންނެވެ. ރެޑްކްރެސެންޓުގެ ސައިކޯސޯސަލް ސަރވިސް ނަންބަރު 1425 އަށް ހިލޭ ގުޅޭނެއެވެ. މި ނަންބަރަށް ގުޅައި ކޮންމެ މީހަކަށްވެސް ސައިކޯސޯސަލް ސަރވިސް ހޯދޭނެއެވެ.

ކޯވިޑް19 ގެ ކުރިންވެސް ދިވެހި ރެޑްކްރެސެންޓުން އަންނަނީ އިޖްތިމާއީ ޒިންމާގެ ދަށުން ލޭ ހަދިޔާކުރުމުގެ ގިނަ ކޭމްޕްތައް ބާއްވަމުންނެވެ. މިއީ ލޭބޭނުންވާ އަދި ލޭ ލިބުން ދަތިވެފައިވާ މީހުންނަށް އެހީތެރިވެދިނުމުގެ ގޮތުން އެ ޖަމިއްޔާއިން އިސްނަގައިގެން ކުރިއަށްގެންދާ ހަރަކާތެކެވެ. މިހާރުވެސް ލޭ ހަދިޔާކުރުމުގެ ކޭންޕްތައް އެ ޖަމިއްޔާއިން އަންނަނީ ބާއްވަމުންނެވެ.

މި ކަންކަމުގެ އިތުރުންވެސް ދިވެހި ރެޑްކްރެސެންޓުން އަންނަނީ ގިނަ މަސައްކަތްތަކެއް ކުރަމުންނެވެ. ރާއްޖޭގެ އިތުރުން ރާއްޖެއިން ބޭރުގެ އެހެން ޤައުމުތަކަށް ދިމާވާ އެކިއެކި ކަންކަމަށް އެހީތެރިވެދިނުމަށްވެސް ރެޑްކްރެސެންޓުން ކުރާ މަސައްކަތް ފާހަގަކޮށްލެވެއެވެ. ރެޑްކްރެސެންޓުގައި ދަރުމައަށް އެދި މަސައްކަތްކުރާ މީހުންގެ އަދަދުވެސް އެހާމެ އިތުރެވެ. އަދި ދަރުމައަށް އެދި މަސައްކަތްކުރަން ބޭނުންވާ ކޮންމެ މީހަކަށްވެސް އެ ފުރުސަތު ވަނީ ހުޅުވާލެވިފައެވެ.