ރިޕޯޓު: ކަޓުމުއްލާ ބައެއް ދިވެހި ފިރިހެނުންގެ ވާހަކަ!

ދިވެހިރާއްޖޭގައި ދެޖިންސްގެ ދޭތެރޭގައި އޮތް ތަފާތު ކުޑަކުރުމުގައި ހާސިލްކުރި ކާމިޔާބީތަކުގައި ރަނގަޅު ދުރުވިސްނޭ ފިރިހެނުންގެ ރޯލު އިންތިހާއަށް ބޮޮޮޑުކަމީ ޝައްކެއްވެސް އޮތްކަމެއް ނޫނެވެ. އަންހެންކުދިންނަށް ތައުލީމްދޭން ނިންމުމާއި، ވަޒީފާގެ ފުރުސަތުތަށް ހަމަހަމަކުރުމާއި، ފަނޑިޔާރުކަމާއި، ޤާނޫނުތަކުން ތަފާތު ކުރުމުގެ ސިޔާސަތު ނައްތާލުމާއި، ކައުންސިލްތަކުން އަންހެނުންނަށް ގޮނޑިތަކެއް ހާއްސަކުރުމުގައި ހެޔޮ ރަނގަޅު ފިރިހެނުންގެ ރޯލު ފާހަނގަކޮށްލަން ޖެހެއެވެ. އަދި ދަރިންދެކެ އިންތިހާއަށް ލޯބިވާ، އަންހެނުންގެ ހައްޤަށް ވަކާލާތުކުރާ ފިރިހެނުން މަދެއް ނޫނެވެ. އެހެންނަމަވެސް މިހާރު ދައްކަން މިއުޅޭނީ މަދު ނަމަވެސް ކަޓުމުއްލާ ބައެއް ދިވެހި ފިރިހެނުންގެ ލަދު ހަޔާތްކުޑަ ކަމުގެ ވާހަކައެވެ.

އެއްބަޔަކު ފޯރި އާއެކު އަންހެންކުދިންގެ ޖިންސީ ގުނަވަން ބުރިކުރާނެ ދިގުމިނަކާމެދު ޒުވާބުކުރުމުގައެވެ. އަނެއްބަޔަކު ކުޑަކުދިންނާއި ކައިވެނި ކުރުމުގެ ނަމުގައާއި އެހެނިހެން ނަންނަމުގައި އެކުދިން ރޭޕްކުރުމުގެ ލާއިންސާނީ މަސައްކަތުގައެވެ. އަނެއް ބަޔަކު ދެކެނީ އަންހެނުންގެ ޖަގަހަ އަކީ ބަދިގެ އާއި ގޭތެރޭގައި ކައްކާ ފޮޅާ ސާފުކުރާ ބައެއްގެ ގޮތުގައެވެ. ދެން އުޅޭ ބަޔަކު އަންހެނުނަށް ގެވެހި އަނިޔާކުރުމާ ބިރުދެއްކުމުގައެވެ. ކަޓުމުއްލާ ބައެއް ދިވެހި ފިރިހެނުންގެ ވާހަކަ ދައްކަންޖެހެނީ މިފަދަ ސަބަބުތަކާ ހެދިއެވެ.

advertisement

އަންހެނުން މިފަދަ ކަޓުމުއްލާ ބައެއް ދިވެހި ފިރިހެނުންގެ ފަރާތުން ތަހައްމަލުކުރާ ކަންކަމުގެ ވާހަކައަކީ ވަގުފިނދަށް ބަދުރުވަ ލައިގަތުމުގެ އުސޫލުން މޭއްޔަދައިތައާއި، ރަންބީފާނާއި، ރަށްކޮޅުމާމެލިދައިތައަށް ދިމާވި ހިޔާލީ ވާހަކަތަކެއްގެ މައްޗަށް ބިރުވެރި ހިޔާލެއް ގެނައުމަށް ދައްކާ ފުލޯކު ވާހަކައެއް ނޫނެވެ. މިހާރުވެސް ހިނގަމުންދާ އެތަށް އަންހެނުންނެއް މިރާއްޖޭގައި މިއަދުވެސް ތަޖުރިބާ ކުރަމުންދާ މުޖައްރިބު ހައްޤު ތެދެވެ.

ތާރީޙު ބުރަވާގޮތަކީ އަންހެނުންނަށް މިރާއްޖޭގައި ފުޅާ ވިސްނުމެއްގައި މިހާރު މިދެކެވޭގޮތާއި ދެވޭ އިއްޒަތަށްވުރެ ވަކިން ޤަދަރުބޮޑު އަހައްމިއްޔަތުކަމެއް ދެވުނު ޒަމާންތަކެއް ހިނގައިފިކަމެވެ. އަންހެނުންނަށް ވެރިކަންކުރެވުމާއި ތާރީހުގެ އިސް ސަފުހާތަކުގައި ވަނަތަކެއް ހާސިލްކޮށްފައިވާކަން ޔަޤީނުން ޔަޤީނެވެ.

ފަހަކަށް އައިސް މިދިޔަ ބައިޤަރުނުގެ ތެރޭގައި އަންހެނުންނާމެދު ދެކެވޭގޮތްތައް ސާފުވެފައި އަޑުހަރުވުން އެއީ މިހާރު މާގޯހޭ މާގިނައިން ބުނެވޭ ބުނުމުގެ އަސްލަށް ވެދާނެއެވެ. އަންހެންކުދިންނަށް ތައުލީމް ދިނުމަށް އުފެދުނު ސްކޫލް ތަޅާލުމަށް ބޮޑު މަރުތޭލާ ބޯބުރާންތިވެފައި ތިބި ބައެއް ދިވެހި ފިރިހެނުން ދިޔަތާ އަދިމިވީ ފަސްވަރަކަށް ދޮޅަސް އަހަރެވެ. ދީނާ ދުރުކަމެއްގެ ގޮތުގައި އަންހެންކުދިންނަށް ތައުލީމު ދިނުން ދެކުނު ޒަމާނުގެ ދިވެހިން އަދިވެސް ހެޔޮހާލުގައި އެބަތިއްބެވެ. މުހައްމަދު އަމީންގެ ދުރުވިސްނޭ ބޯހަރުކަމުގައި އަންހެނުނަށް ތައުލީމް ދިނުމަށް ނިންމެވި ނިންމެވުމަށް ފާޑުކީ މުއްލާއިންނަކީ ކަޓު ބައެއްގެ ގޮތުގައި ޤައުމާއި މުހާތަބުކުރައްވައި އެމަނިކުފާނު ސިފަކުރެއްުވުމުގެ ނަތީޖާއަކީ މިހާރުވެސް މާ ގޯހިއްޔާ “އޭ މިހިރަ ކަޓު މުއްލާ” އޭ ގޮވާގޮވުމެވެ.

ދިވެހިރާއްޖޭގައި މީގެ ދެތިން އަހަރެއް ކުރިއާ ހަމަޔަށް އަންހެނުން އިސްފަނޑިޔާރުކަން ކުރުން ރޯމަރުގޯސް ކަމަށް ދެކެވުނެވެ. މިހާރުވެސް ވެރިކަމުގެ އިސްރޯލަކީ އަންހެނުން ކުރަން ހެޔޮވާވަރުގެ ކަމެއްް ނޫންކަމަށް ދެކޭ ފިރިހެނުން މިކަމާއެއްކޮޅަށް ބަސްބުނާ ކޮންމެ މީހަކީ މަރުގޯސް ހަކިނި ބައެއްގެ ގޮތުގައި ސިފަކުރެއެވެ. އަދިވެސް ބައެއް ފިރިހެނުން ދެކޭގޮތުގައި އެއްވެސް ބޭނުމަކަށް، ބައިލޮޖިކަލް ބަފާ ކަށަވަރުކުރުމަށް ޑީއެންއޭ ޓެސްޓްކުރުން އެއީ ކުރަން ހެޔޮވާވަރު ކަމެއް ނޫނެވެ.

ދިވެހި ފިރިހެނުންގެ ތެރެއިން އެންމެ ކަޓުމުއްލާ ފިރިހެނުންނަކީ ދަރިން ހޯދުމަށްފަހު ދަރިން ނެތްފަދަ ގޮތަކަށް ލާޗާރުބިޗާރު ވެގެން އުޅޭ ފިރިހެނުންނެވެ. އަފަދަ މީހުން ދެކޭގޮތުގައި ޖިންސީގުޅުން ހިންގުމާ ހިސާބުން ދަރިން ބެލުމުގައި އެމީހުންގެ ރޯލު ނިމުނީއެވެ. ދަރިޔަކު ފެންވެރުވުމެއް، ނިންދެވުމެއް، ހަރަދެއް ބަރަދެއް ދިނުމެއް ނެތްތާކު، ކުލުނާއި ލޯބިން ހާލު ބަލައިނުލާ މިފަދަ ފިރިހެނުން މަދެއް ނޫނެވެ. އަކަނި މާއެކަނި ޔާރެއްނެތި، މީގެ ދޮޅަހަކަށް އަހަރުކުރެން ދޭންފެށި އެކަނިވެރި މައިންގެ އެލަވަންސްގެ އެހީގައި މިފަދަ އެތައް ދަރިންނެއް ބޮޑުކުރަމުންދާ އެތަކެއް އަންހެނުން އަހަރެމެން އެންމެން ދަންނަމެވެ.

އަންހެނުންނަކީ ޖިންސީ ގުޅުން ހިންގުމަށާއި ގޭތެރޭގައި މެއިޑެއްގެ ރޯލު އަދާކުރުމަށް އެކަނި ތިބޭ ބައެއްގޮތުގައި އުޅޭ އަންހެންނުން މިރާއްޖޭގައި މަދެއް ނުވާނެއެވެ. ގެވެށި އަނިޔާގެ ހިސާބުތަކުން ފިއްކަނޑައިގެންދާވަރަށް އަންހެނުންނަށް ލިބޭ އަނިޔާގެ ވާހަކަ އަޑުން އަޑު ނަގައި ކިޔައިދެއެވެ. އަމިއްލަ އަންހެންދަރިންގެ އިއްފަތަށް އަރައިގަންނަ ވާހަކައާއި ޖިންސީ ގޯނާގެ ވާހަކަ ނީވޭ ދުވަހެއް އިރުމެދު ފެނުޖެހެނީ މަދަކުން ނޫީންކަމީ ދިވެހި ބައެއް ފިރިހެނުންގެ ވިޔާނުދާ ޔަޤީންކޮށްދޭ ކަމެކެވެ. އަދުގެ ހަޤީޤަތަކީ މަގުމަތިންނާއި ވަޒީފާގެ މާހައުލުގައި ފޮށުމާއި ހާރުވައި މައްލަވަކުރުމުގެ ސަޤާފާތް މިއަދުވެސް ކޮންމެވެސް އަންހެނަކު ތަހައްމަލުކުރާނެ ކަމެކެވެ.

އަމިއްލަ ކޮއްތަށް ބޭނުންވާ ރޮށި އަމިއްލައަށް ފިހެލަން ނޭގޭ، އަދި ދާކުރާހާ އަންނައުނުވެސް ދޮވެލަން ނުކުރޭ ކަޓުމުއްލާ ފިރިހެނުން އަދިވެސް ބޭނުންވަނީ މިކަންކަން އަންހެނުން ކުރާށެވެ. ވަޒީފާއެއް ނެތި މުޅިދުވަހު ހުންނަ ފިރިހެނާ، ދުވާލު ހަތަރުދަމު ވަޒީފާއަދާކުރާ އަންހެނުން ލައްވާ ހެއްދެވި ހުރިހާ ކަމެއް ކުރުމަށް ބަރޯސާވަނީ ލަދު ހަޔާތުގެ ކަންފުޅެއްވެސް ނެތިއެވެ. މިފަދަ ފިރިހެނުން ދެކޭގޮތުގައި އަންހެނުންނަކީ ފިރިހެނުން އަމިއްލަ މުދާ ގަނޑަކެވެ.

ޒަމާނާއެކު ހަޤީޤަތް ބަދަލުވެއްޖެއެވެ. މިއަދުގެ ހަޤީގަތަކީ ޒުވާން އާބާދީގެ އެންމެ މަސައްކަތްތެރި ޖިންސަކީ އަންހެނުންކަމެވެ. އެންމެ ތައުލީމީ އަދި އިޤްތިސާދީގޮތުން އެންމެ ހަރަކާތްތެރި ފުދުންތެރު އާމްދަނީ ހޯދާ ޖިންސަކީވެސް އަންހެނުންކަމެވެ. މިއަދުކު ވަކިން އަންހެނުންނަށް ކުރާން ނޭގޭ ހަމައެއްކަމެއްވެސް ދައްކަބަލާށެވެ. ދިވެހި މުޖުތަމައު މިފަދަ ވިޔާނުދާ ކަޓުމުއްލާ ބައެއް ދިވެހި ފިރިހެނުންނާ ދެކޮޅަށް ބަސްބުނުން ލާޒިމެވެ. މިފަދަ ކަންކަމުގައި ހަނުހުރުން މިއީ އަންހެނުންނާމެދު ކުރެވޭ ބޭއިންސާފެކެވެ. މާޒީ ކިޔައިދެނީ މިފަދަ ކަންކަމުގައި ރަނގަޅު ދިވެހި ފިރިހެނުން ނުކުމެ ކަޓުމުއްލާ ފިރިހެނުންނާ ދެކޮޅަށް ކުރެއްވި މަސައްކަތުގެ ފޮނި ނަތީޖާ، މިއަދުގެ އަންހެނުން ހާސިލްކޮށްފައިވާ ކަންކަމުން ކިޔައިދޭކަމެވެ.