ހާފިޒް އަހުމަދު ސްކޫލުގައި ސެންސަރީ ރޫމެއް ޤާއިމްކޮށްފި

ފުވައްމުލައް ސިޓީގެ ހާފިޒް އަހުމަދު ސްކޫލުގައި ސެންސަރީ ރޫމެއް ޤާއިމްކޮށްފިއެވެ. މިއީ އިންޑިއާ ސަރުކާރުގެ ހިލޭ އެހީގެ ދަށުން ޤާއިމްކުރި ތަނެކެވެ.

ފުވައްމުލައް ސިޓީގެ ހާފިޒް އަހުމަދު ސްކޫލުގައި ސެންސަރީ ރޫމެއް ޤާއިމްކުރުމާއި ގުޅިގެން އެ ސުކޫލްގެ ޕްރިންސިޕަލް މުހައްމަދު ސިރާޖް ވަރަށް ބޮޑަށް ޝުކުރު އަދާކުރައްވާފައެވެ.

advertisement

ސިރާޖު ވިދާޅުވީ މިއީ ތަފާތު ތެރަޕީތަކަށް ޚާއްސަކޮށްގެން ފުވައްމުލައް ސިޓީގައި ތަރައްޤީ ކުރެވުނު ފުރަތަމަ މިފަދަ ކުލާސް ރޫމް ކަމަށެވެ. އަދި މިތަން ތަރައްޤީ ކުރުމުގައި ދިވެހި ސަރުކާރުން ވެދެއްވި އެހީތެރިކަން ވަރަށް ޚާއްސަ ގޮތެއްގައި ފާހަގަކުރާ ކަމަށާއި، އިންޑިއާ ސަރުކާރާއި، އިންޑިއާ ހައިކޮމިޝަނަށް ވަރަށް ޚާއްސަ ޝުކުރެއް އަދާކުރައްވާ ކަމުގައި ޕްރިންސިޕަލް ސިރާޖް ވިދާޅުވިއެވެ.

މީގެ އިތުރުން ސްޕެޝަލް އެޑިއުކޭޝަން ލީޑިން ޓީޗަރެއްގެ ހައިސިއްޔަތުން ޓީޗަރު ނިޒުނާ އާދަމް ވިދާޅުވީ މިއީ ލިބުނު ވަރަށް ބޮޑު ، ކުރިއެރުމެއް އަދި ހިތްވަރެއް ކަމުގައެވެ. މި ކުލާސްރޫމުގެ ސަބަބުން ފުވައްމުލައް ސިޓީ އަދި ވަކިން ޚާއްސަކޮށް ހާފިޒް އަހުމަދު ސްކޫލުގައި ކިޔަވަމުންދާ ދަރިވަރުންގެ ތެރެއިން ތަފާތު އެހީތައް ބޭނުންވާ ދަރިވަރުންނަށް އެހީވުމަށް މުދައްރިސުންނަށް ފަސޭހަވެ، ދަރިވަރުންނަށް އިތުރު ކުރިއެރުން ތަކެއް ލިބިގެން ދާނެ ކަމަށް އޭނާ ވިދާޅުވިއެވެ.