ބިދޭސީ މަސައްކަތްތެރިންގެ ހައްޤުގައި، މިޝަން ފޯރ މައިގްރެންޓް ވޯކާރސް!

ރާއްޖޭގެ އާބާދީގެ 3 ބައިކޮށްފައި 1 ބަޔަކީ ރާއްޖޭގައި މަސައްކަތްކުރާ ބިދޭސީ މަސައްކަތްތެރިންނެވެ. ރާއްޖޭގެ އިޤްތިޞާދުގެ ހުރިހައި ދާއިރާއެއްގައިވެސް ބިދޭސީ މަސައްކަތްތެރިންގެ ހިއްސާ އޮވެއޭ ބުނުމަކީ ދޮގަކަށް ނުވާނެއެވެ. ފަތުރުވެރިކަމާއި، އިމާރާތްކުރުމުގެ ދާއިރާއެވެ. ސިއްހީ ދާއިރާއާއި ތައުލީމީ ދާއިރާއެވެ. ދަނޑުވެރިކަމާއި ދިވެހިންގެ ލޭނާރު ކަމަށްވާ މަސްވެރިކަމުގެ ދާއިރާގައިވެސް މިހާރު ބިދޭސީ މަސައްކަތްތެރިން އަންނަނީ މަސައްކަތްކުރަމުންނެވެ.

އާބާދީގެ މިހާބޮޑު އިންސައްތައެއް ބިދޭސީ މަސައްކަތްތެރިން ހިއްސާކުރާއިރު ގިނަ މައްސަލަތަކެއްވެސް އަންނަނީ ދިމާވަމުންނެވެ. އެމީހުން ރާއްޖެ ގެނެސް އަޅާލާނެ ބަޔަކު ނެތި މަގުމަތިވެފައިވާ ގިނަ ބިދޭސީން ތަކެއްވެސް މިއަދު މި ރާއްޖޭގެ މަގުމަތިން ފެނެއެވެ.

advertisement

ބިދޭސީ މަސައްކަތްތެރިންގެ ހައްޤުގައި މަސައްކަތްކުރުމަށް ރާއްޖޭގައި އުފެއްދި އެންމެ ފުރަތަމަ އެންޖީއޯއަކީ މިޝަން ފޯރ މައިގްރެންޓް ވޯކާރސް މޯލްޑިވްސްއެވެ. މި ޖަމިއްޔާއިން އަންނަނީ ރާއްޖޭގައި ދިރިއުޅޭ ބިދޭސީ މަސައްކަތްތެރިންގެ ހައްޤުގައި ގިނަ މަސައްކަތްތަކެއް ކުރަމުންނެވެ.

އެމްވީ ޕްލަސްއަށް ދެއްވި ޚާއްސަ އިންޓަވިއުއެއްގައި މިޝަން ފޯރ މައިގްރެންޓް ވޯކާރސް މޯލްޑިވްސްގެ ކޯ ފައުންޑަރ އަދި ރައީސް ޑރ. މިނާހު ފާއިޒް ރަޝާދު ވިދާޅުވީ، އެ ޖަމިއްޔާއިން ބިދޭސީ މަސައްކަތްތެރިންގެ ހައްޤުތައް ކަށަވަރުކޮށްދިނުމަށް ގިނަ މަސައްކަތްތަކެއް ކުރަމުން އަންނަކަމަށެވެ.

މިނާހު ވިދާޅުވީ، މިދިޔަ ރަމަޟާންމަހު މައިގްރެންޓް ވޯކަރސް އޮފް ދަ މޯލްޑިވްސް ސީރީޒް” ގެ ނަމުގައި ކެމްޕެއިނެއްވެސް އެ ޖަމިއްޔާއިން ކުރިއަށްގެންގޮސްފައިވާކަމަށެވެ. މި ކެންޕެއިންގެ ތެރެއިން ރާއްޖޭގައި އުޅޭ ބިދޭސީ މަސައްކަތްތެރިންގެ ވާހަކަ އެމީހުންގެ ދުލުން މުޖްތަމައުއަށް ބުނެދީފައިވާނެކަމަށް އޭނާ ވިދާޅުވިއެވެ. މީގެ ބޭނުމަކީ އަހަރެމެންނާއި އެމީހުންނާއި އެއްވެސް ތަފާތެއްނެތްކަމާއި އެމީހުންގެ އެވާ ގުރުބާނީއާއި ބުރަ މަސައްކަތް މުޖްތަމައުއަށް ބުނެދިނުންކަން އޭނާ ފާހަގަކުރެއްވިއެވެ.

ބިދޭސީންގެ ހައްޤުތައް ރައްކާތެރިކުރުމަކީ ދިވެހިރާއްޖެ ކުރިއެރުވުމަށް ކުރެވޭ މަސައްކަތެއްކަން މިނާހު ފާހަގަކުރެއްވިއެވެ. އަދި އަވަސް މުސްތަޖްބަލެއްގައި އެ ޖަމިއްޔާގެ “ވޮލެންޓިއަރ ކެންޕެއިން” ވެސް އިފްތިތާހުކުރެވިގެންދާނެކަމަށާއި، މީގެ މައިގަނޑު މަޤްސަދަކީ އެ ޖަމިއްޔާގެ މަސައްކަތްތަކަށް ވޮލެންޓިއަރުން ހޯދުކަމަށް އޭނާ ވިދާޅުވިއެވެ. މިއީ އެ ޖަމިއްޔާއިން ރާއްޖޭގައި އުޅޭ ބިދޭސީ މަސައްކަތްތެރިންނާއި ހަމައަށް ވާސިލްވުމަށް ކުރާ މުހިންމު މަސައްކަތެއްކަމަށް މިނާހު ވިދާޅުވިއެވެ.

މިޝަން ފޯރ މައިގްރެންޓް ވޯކާރސް މޯލްޑިވްސްގެ ޓްރެޒަރަރ ޒޫޖާން ހަލީލް ވިދާޅުވީ، އެ ޖަމިއްޔާއިން ކުރާ މަސައްކަތްތަކަށް ގިނަ ގޮންޖެހުންތަކެއް ކުރިމަތިވާކަމަށެވެ. އޭގެތެރޭގައި ބިދޭސީ މަސައްކަތްތެރިންނަށް ލިބެންޖެހޭ ހައްޤުތަކާއި، އެމީހުންނަށް ދިމާވާ މައްސަލަތައް މުޖްތަމައުގެ މެދުގައި އެހާބޮޑަށް ހޭލުންތެރިވެފައި ނެތުމަކީ އެންމެ ބޮޑު ގޮންޖެހުންކަން އޭނާ ފާހަގަކުރެއްވިއެވެ. މިކަންކަމާއި ގުޅޭގޮތުން މުޖްތަމައު ހޭލުންތެރިކުރުވުމަކީ އެ ޖަމިއްޔާއިން ނުހަނު ބޮޑު އިސްކަމެއްދީގެން ކުރަން ބޭނުންވާ ކަމެއްކަމަށް ޒޫޖާން ވިދާޅުވިއެވެ.

މިޝަން ފޯރ މައިގްރެންޓް ވޯކާރސް މޯލްޑިވްސްއިން އިސްނަގައިގެން ނިމިގެންދިޔަ ރަމަޟާންމަހު ރާއްޖޭގައި ދިރިއުޅޭ ބިދޭސީ މަސައްކަތްތެރިންނަށް ވަނީ އިފްތާރު ޕެކޭޖްތައް ބަހާފައެވެ. ކޮންމެ ދުވަހަކު 50 ޕެކް ބަހަން ކަނޑައެޅިނަމަވެސް މިކަމަށް އެހެން ފަރާތްތަކުގެ އެއްބާރުލުން ލިބުމުގެ ސަބަބުން އެ ޖަމިއްޔާއިން ވަނީ ފަހުން ދުވާލެއްގެ މައްޗަށް 100 ޕެކްވެސް ބަހާފައެވެ. އެ ޖަމިއްޔާއިން ބުނީ މިދިޔަ ރަމަޟާންމަހުގެ ތެރޭގައި 5000 ބިދޭސީ މަސައްކަތްތެރިންނަށް ރޯދަވީއްލުން ބެހިފައިވާކަމަށެވެ. އަންނަ އަހަރު މިއަށްވުރެ ފުޅާކޮށް މިކަން ކުރިއަށްގެންދާނެކަމަށެވެ.