ޑަބްލިޔު.އެޗް.އޯއިން ހަދިޔާކޮށްފައިވާ މެޝިންތައް އަދިވެސް ބޭނުން ނުހިފިފައި

ކޯވިޑުން ރައްކާތެރިވުމަށް ރާއްޖެއިން ކުރަމުންގެންދާ މަސައްކަތްތަކަށް ދުނިޔޭގެ ޞިއްޙަތު ޖަމިއްޔާއިން ދަނީ ވަރަށް ބޮޑަށް އެހީތެރިކަން ފޯރުކޮށްދެމުންނެވެ. ޚާއްޞަކޮށް މިބައްޔަށް ޓެސްޓްކުރުމުގެ އިންތިޒާމްތައް ހަމަޖެއްސުމަށް ބޭނުންވާ މެޝިނާއި، ޓެސްޓް ކިޓްތަކުގެ އިތުރުން ކޮންސިއުމަބަލްސް އަދި އިމަރޖެންސީ ޞިއްޙީ ޚިދުމަތްދިނުމަށް ބޭނުންވާ އާލާތްތަކާއި ބޭސްވެސް ވަނީ ރާއްޖެއަށް ހަދިޔާކޮށްފައެވެ.

ހެލްތު މިނިސްޓްރީން ވިދާޅުވީ، ދުނިޔޭގެ ޞިއްޙަތު ޖަމިއްޔާއިން މިހަފުތާގައި ހަދިޔާކުރި 11 ޖީން އެކްސްޕާޓް މެޝިންއާއިއެކު ރާއްޖޭގެ 18 އަތޮޅެއްގެ އަތޮޅު ހޮސްޕިޓަލްތަކުގައި މެޝިންތައް ބެހެއްޓި ކޯވިޑަށް ޓެސްޓްކުރުމުގެ ޚިދުމަތް ލިބިގެންދާނެކަމަށެވެ. އަދި އިތުރު 10 ރަށެއްގައި އޮޓޯކްލޭވް ބެހެއްޓި ޞިއްޙީ ޚިދުމަތް ދިނުމަށް ބޭނުންކުރާތަކެތި ރައްކާތެރިކޮށް ނައްތާލުމުގެ އިންތިޒާމްތައް ހަމަޖެހިގެންދާނެއެވެ.

advertisement

ނަމަވެސް ކޮވިޑަށް ފަނަރަ މަަސްދުވަސް ވެގެން ދިޔައިރުވެސް އަތޮޅުތެރޭގައި އެކަށީގެންވާ މިންވަރާ ގާތަށްވެސް ޓެސްޓުނުކުރެވޭކަމީ ކަންބޮޑުވާންޖެހޭކަމެކެވެ. މިގޮތުން ރާއްޖޭގެ އެކި ސަރަހައްދުތަކުން ޓެސްޓުކުރުމަށް އަދިވެސް ސާމްޕަލްފޮނުވަނީ މާލެ އަށެވެ. އަދި ނަތީޖާ ލިބުން ލަސްވުމުގެ ސަބަބުން ބަލިެޖެހިފައިވާ މީހުން އެކި ތަންތަނަށް ޒިޔާރަތްކޮށް ބަލި ފެތުރިފައިވާކަން މީގެކުރިން ފާހަގަކުރެވިފައިވެއެވެ.

އަތޮޅުތެރޭގައި ކޮންވެންޝަނަލް ޕީސީއާރު ސެޓްއަޕް ހެދުމަށް މިދިޔަ މަހު ހެލްތް މިނިސްޓްރީ ނިންމި ނިންމުމަކީ ޙަރަދުބޮޑު އަދި އުމްރާނީ ގޮތުންވެސް ވަރަށްގިނަ ބަދަލު ތަނަށް ގެނެސްގެން ނޫނީ ނުކުރެވޭނެކަމެވެ. އަދި ފަންނީ މުވައްޒަފުން ވެސް ތިބެންޖެހޭ، ޙާއްސަކޮށް ޕެތޯލޮޖިސްޓެއް ނުވަތަ މޮލެކިއުލާ ބަޔޮލޮޖިސްޓެއް ހުންނަން ލާޒިމު ކަމެކެވެ. އެހެން ކަމުން ޑަބްލިއު.އެޗް.އޯ އިން ލަފާ ދެނީ (ޖީން އެކްސްޕާރޓް) މެޝިންތައް ބޭނުންކުރުމަށެވެ. އަދި މި މެޝިނަކީ ސާމްޕަލް ލެއްވުމަށްފަހު މަދު މިނިޓްކޮޅެއްގެ ތެރޭ ނަތީޖާ ލިބޭ އަދި ފަންނީ މުވައްޒަފުން ބޭނުންނުވާ މެޝިނެކެވެ. އަދި އެމެރިކާ، ޔޫރަޕާއި، މެދުއިރުމައްޗާއި އަދި ސިންގަޕޫރުގައި މިހާރު ބޭނުންކުރަމުންދާ މެޝިނެކެވެ.

ޖީން އެކްސްޕާރޓްއަކީ އާދައިގެ ޕީސީއާރު މެޝިނެކޭ އެއްފަދައިން އެ ފެންވަރުގެ އާރު.ޓީ.ޕީސީއާރު އާއި އެއް ހަމައެއްގެ މެޝިނެއްކަމަށް އެމެރިކާގެ އެފްޑީއޭ އިން އެޕްރޫވްކޮށްފައިވާ މެޝިނެއް ނަމަވެސް، އަތޮޅު ހޮސްޕިޓަލްތަކުން މައުލޫމާތު ލިބެނީ ހެލްތު މިނިސްޓްރީއިން ހުރިހާ ހޮސްޕިޓަލްތަކަށް މި މެޝިނުން ޓެސްޓުކުރަންޖެހޭނީ ހަމަ އެކަނި އަލާމާތްތައް ހުންނަ މީހުން އެކަނިކަމަށް ވަނީ އަންގާފައެވެ. މި މެޝިނަކީ އެމެރިކާ، ޔޫރަޕް، ޑުބާއި ، އިންޑިޔާ އަދި ސިންގަޕޫރު ފަދަ ޤައުމުތަކުގަވެސް ބޭނުންކުރާ މެޝިނަކަށް ވެފައި މިފަދަ ޒަމާނީ ޓެކްނޮލޮޖީތަކަށް ރާއްޖޭގެ ހެލްތު މިނިސްޓްރީން ނުދިނުމަކީ ހާއްސަކޮށް އަތޮޅުތެރޭގައި ޓެސްޓު ނުކުރެވޭ މައިގަނޑު އެއް ސަބަބުކަމަށް އެފަރާތްތަކުން މައުލޫމާތު ދެއްވައެވެ.