ކެމިކަލްސް މެނޭޖްކުރާ މަރުކަޒެއް ހެދުމުގެ ދިރާސާ ކުރުމަށް ޖަރުމަނު ކުންފުންޏަކަށް ހަވާލުކޮށްފި

ގްރޭޓާރ މާލޭ ސަރަހައްދުގައި ކެމިކަލްސް މެނޭޖުކުރާ މަރުކަޒެއް ގާއިމުކުރުމަށް ބޭނުންވާ ދިރާސާތައް ހެދުމަށް ޖަރުމަނުގެ ކުންފުންޏަކާ ޙަވާލުކޮށްފިއެވެ.

މިއެއްބަސްވުމުގައި މިނިސްޓްރީ އޮފް އެންވަޔަރަމަންޓް ސައިންސް އެންޑް ޓެކްނޮލޮޖީގެ ފަރާތުން ސޮއިކުރެއްވީ މިނިސްޓަރ އާމިނަތު ޝައުނާއެވެ. ޖަރުމަނު ކުންފުނީގެ ފަރާތުން ސޮއިކުރެއްވީ އެކުންފުނީގެ އެގްޒެކިޓިވް ޑިރެކްޓަރު އެލެކްސެންޑަރ ބޯމްކަމަށް އެންވަޔަރަމަންޓް މިނިސްޓްރީއިން ވިދާޅުވެއެވެ. ޖަރުމަނުގެ ކުންފުނީގެ ސަބްކޮންސަލްޓެންޓެއްގެ ގޮތުގައި ރާއްޖޭގެ ރިނިއަބަލް އެނަރޖީ މޯލްޑިވްސް ޕްރައިވެޓް ލިމިޓެޑްވަނީ ހަމަޖައްސާފައެވެ.

advertisement

މިއީ ޖުމްލަ 1.6 މިލިއަން ރުފިޔާގެ މަޝްރޫޢެކެވެ. އެންވަޔަރަމަންޓް މިނިސްޓްރީއިން ވިދާޅުވީ މި ފީސިބިލިޓީގައި، ދެމެހެއްޓެނިވި ގޮތެއްގައި ކެމިކަލްސް މެނޭޖްކުރާ ފެސިލިޓީ ހިންގޭނެ އިންތިޒާމުތައް ބަލައި ދިރާސާކުރުމާއި ފެސިލިޓީގެ އިންޖިނިއަރިންގ ޑިޒައިން ތައްޔާރު ކުރުން ހިމެނޭކަމަށެވެ.

މިއެއްބަސްވުމުގެ ދަށުން ގްރޭޓާރ މާލޭ ސަރަހައްދުގައި ކެމިކަލްސް މެނޭޖުކުރާ ފެސިލިޓީއެއް ގާއިމުކުރުމަށް ފީސިބިލިޓީ ސްޓަޑީ ތައްޔާރުކުމަށްވަނީ ހަމަޖެހިފައެވެ. މިމަޝްރޫޢު ކުރިއަށްގެންދަނީ ގްލޯބަލް އެންވަޔަރަންމަންޓް ފެސިލިޓީގެ މާލީ އެހީތެރިކަމާއެކުގައެވެ. “އެލިމިނޭޓިން ޕަރސިސްޓަންޓް އޯގަނިކް ޕޮލިއުޓަންޓަސް ތްރޫ ސައުންޑް މެނޭޖްމަންޓް އޮފް ކެމިކަލްސް” މަޝްރޫއުގެ ދަށުން، ގްރޭޓާރ މާލޭ ސަރަހައްދުގައި ކެމިކަލްސް މެނޭޖުކުރާ ފެސިލިޓީއެއް ގާއިމުކުރުމަށް ފީސިބިލިޓީ ސްޓަޑީ ތައްޔާރުކުމަށް ޖަރުމަނުގެ ކުންފުންޏާއެކު އެއްބަސްވެފައިވަނީ 6 މަސް ތެރޭގައި މަސައްކަތް ނިންމާގޮތަށެވެ.

ފެސިލީޓީ ގާއިމުކުރުމުން ނުރައްކާތެރި ކުނީގެ ބާވަތްތައް ވަކި ކުރެވި ނުރައްކާތެރި ކުންޏާއި ކެމިކަލްސް މެނޭޖުކުރުމަށް ރާއްޖެއިން ކަނޑައަޅާފައިވާ ސިޔާސަތުތަކާއި ހަދާފައިވާ ގާނޫނުތަކާއި ގަވާއިދުތަކާއި އެއްގޮތަށް ބައިނަލްއަގުވާމީ މިންގަނޑުތަކަށް ފެތޭގޮތަށް ތިމާވެއްޓަށް ގެއްލުން ކުޑަކޮށް ކެމިކަލްސް އަދި ނުރައްކާތެރި ކުނި މެނޭޖްކޮށް، ދިވެހިރާއްޖޭގައި މެނޭޖުނުކުރެވޭނެ ފަދަ (މަރކިއުރީ އެކުލެވޭ) ކުނީގެ ބާވަތްތައް މި ފެސިލިޓީގައި ރައްކާކޮށް، ބޭރުގެ ފެސިލިޓީތަކަށް ގެންގޮސް ރައްކާތެރި ގޮތުގައި މެނޭޖްކުރުމަށް ރާވާފައިވާކަމަށް މިނިސްޓްރީން ވިދާޅުވެއެވެ.