ފްލެޓް ލިބުނުކަމަށްބުނެ އެއްވެސް ފަރާތަކަށް ފޯނު މެދުވެރިކޮށް ނުގުޅާނެ – އެޗްޑީސީ

ހިޔާ މަޝްރޫޢުއިން ފުލެޓު ލިބިފައިވާ ފަރާތްތަކަށް މިކޯޕަރޭޝަނުގެ ނަމުގައި ގުޅާކަމަށް ދެކެވޭ ވާހަކަތައް ހައުސިން ޑިވެލޮޕްމަންޓް ކޯޕަރޭޝަނުން ދޮގުކޮށްފިއެވެ.

އެޗްޑީސީން ވިދާޅުވީ، ހިޔާ މަޝްރޫޢުގެ ދަށުން އިމާރާތްކޮށްފައިވާ ފުލެޓުތަކަށް ހޮވިފައިވާ ފަރާތްތަކަށް ފުލެޓު ގުރުއަތުން ލިބޭ ފުލެޓު ކަނޑައެޅުމަށްފަހު ބާކީ ގުރުއަތުން އެއްވެސް ފަރާތަކަށް ކަނޑައެޅިފައިނުވާ ފުލެޓުތަކަށް ހޮވިފައިވާކަމަށް ބުނެ މި ކޯޕަރޭޝަނުން އެއްވެސް ފަރާތަކަށް ފޯނު މެދުވެރިކޮށް ނުގުޅާނެކަމަށެވެ. މި މަޝްރޫޢުގެ ދަށުން ފުލެޓަށް ހޮވިފައިވާ ފަރާތްތަކަށް ލިބޭ ފުލެޓު ކަނޑައެޅުމަށް މިކޯޕަރޭޝަނުން އަމަލުކުރަމުންދާ އުޞޫލަކީ، ފުލެޓު ގުރުއަތު ނެގުން ހަމަޖެހިފައިވާ ތާރީޚް އަދި އެދުވަހެއްގެ ގުރުއަތުގައި ފުލެޓު ކަނޑައެޅޭނެ ފަރާތްތައް ހިމެނޭ ލިސްޓު އާންމުކޮށް އަންގާ އިޢުލާނުކުރުމަށްފަހު، ޓީ.ވީގެ ޒަރިއްޔާއިން ގެނެސްދެވޭ ލައިވް ޕްރޮގްރާމެއް މެދުވެރިކޮށް ގުރުއަތު ނެގުން ކުރިއަށް ގެންދިއުންކަމަށްވެސް އެޗްޑީސީން ވަނީ ވިދާޅުވެފައެވެ.

advertisement

ގުރުއަތުން ފުލެޓު ލިބިފައިވާ ފަރާތްތަކާއި، ފުލެޓު ލިބިފައިނުވާ އެއްވެސް ފަރާތަކަށް ފޯނު މެދުވެރިކޮށް ލިބިފައިވާ ފުލެޓުގެ ތަފްޞީލު ހިއްސާކުރުމަށް ނުގުޅާނެކަން އެޗްޑީސީން ވަނީ ވިދާޅުވެފައެވެ. އަދި، މި މަޝްރޫޢުއާ ގުޅޭ އެއްވެސް މަޢުލޫމާތެއް ހިއްސާ ކުރާނަމަ، އެކަން ކުރާނީ އާންމު އިޢުލާނެއްގެ ޒަރިއްޔާއިން ނުވަތަ މިކޯޕަރޭޝަނުގެ މީސްމީޑިއާ ޕޭޖުތައް މެދުވެރިކޮށްކަމަށްވެސް ވަނީ ވިދާޅުވެފައެވެ. މިފަދަ ކަމެއްގައި މިކޯޕަރޭޝަނުގެ ފަރާތުން ގުޅާނަމަ ބޭނުން ކުރާނީ މިކޯޕަރޭޝަނުގެ ރަސްމީ ނަންބަރުތައް ކަމުގައިވެސް ވަނީ ހާމަކޮށްފައެވެ.