މާލޭގެ އާބާދީގެ %41 އަކީ ހިޖުރަކޮށްފައިވާ މީހުން

މާލޭގެ އާބާދީގެ %41 މީހުންނަކީ އެކިއެކި ކަންކޮޅުތަކުން މާލެއަށް ހިޖުރަކޮށްފައިވާ މީހުންކަމަށް މޯލްޑިވްސް ސްޓެޓިސްޓިކްސްއިން އާންމުކޮށްފައިވާ ތަފާސްހިސާބުތައް ދައްކައިފިއެވެ.

ދުނިޔޭގެ އާބާދީގެ ދުވަހާއި ގުޅުވައިގެން މޯލްޑިވްސް ސްޓެޓިސްޓިކްސްއިން ނެރެފައިވާ ތަފާސްހިސާބުތައް ދައްކާގޮތުން ރާއްޖޭގެ އާބާދީއަކީ 568،362 އެވެ. މީގެތެރެއިން 363،750 މީހުންނަކީ ފިރެހެނުންނެވެ. އަދި 204،612 މީހުންނަކީ އަންހެނުންނެވެ.

advertisement

މޯލްޑިވްސް ސްޓެޓިސްޓިކްސްއިން އާންމުކޮށްފައިވާ ތަފާސްހިސާބުތައް ދައްކާގޮތުން ރާއްޖޭގައި ދިރިއުޅޭ ބިދޭސީންގެ ބޮޑު އާބާދީއެއް ދިރިއުޅެނީ މާލޭގައެވެ. މާލޭގައި ދިރިއުޅޭ އާބާދީގެ %53 މީހުންނަކީ ބިދޭސީންނެވެ. އަދި އަތޮޅުތަކުގެ ރައްތަކުގައި ދިރިއުޅޭ ބިދޭސީންގެ އާބާދީއަކީ %30 އެވެ.

މާލެއަށް ހިޖުރަކޮށްފައިވާ މީހުންގެ ތެރޭގައި އެންމެ ގިނައީ 18 އަހަރާއި 35 އަހަރާއި ދެމެދުގެ މީހުންނެވެ. 36 އަހަރާއި 64 އަހަރާއި ދެމެދުގެ މީހުންގެ ނިސްބަތަކީ %38 އެވެ. 65 އަހަރުން މަތީގެ މީހުންގެ ނިސްބަތް އުޅެނީ %5 ގައެވެ. އަދި 15 އަހަރާއި 17 އަހަރާއި ދެމެދުގެ %3 ހިއްސާކުރާއިރު އުމުރުން 15 އަހަރުގެ ދަށުގެ ކުދިންގެ ނިސްބަތް އުޅެނީ %11 ގައެވެ.

މާލެއަށް ހިޖުރަކޮށްފައިވާ އާބާދީގެ ފިރެހެނުންގެ ތެރެއިން އެންމެ ގިނަ މީހުން ހިޖުރަކޮށްފައިވަނީ ވަޒީފާގެ ބޭނުމަށެވެ. އެއީ އާބާދީގެ %26 މީހުންނެވެ. 2 ވަނައަށް އެންމެ ގިނަ މީހުން މާލެ އައިސް ދިރިއުޅެން ފަށާފައިވަނީ ތައުލީމީ ބޭނުމަށެވެ.

އަދި ހަމަ އެހެންމެ މާލެއަށް ހިޖުރަކޮށްފައިވާ އާބާދީގެ އަންހެނުންގެ ތެރެއިން އެންމެ ގިނަ މީހުން ރާއްޖެ ހިޖުރަކޮށްފައިވަނީ ތައުލީމީ ބޭނުމަށެވެ. އެއީ އާބާދީގެ %25 މީހުންނެވެ. 2 ވަނައަށް އެންމެ ގިނައިން އަންހެނުން ހިޖުރަކޮށްފައިވަނީ އާއިލާގެ އެހެން މީހުން މާލެ ބަދަލުވެފައިވާތީ އާއިލާއާއި ކައިރީގައި އުޅުމަށެވެ. އެއީ އާބާދީގެ %22 ކަމަށް ތަފާސްހިސާބުތަކުން ދައްކައެވެ.