ވީއައިއޭގެ ތަރައްޤީގެ މަސައްކަތައް ކުވައިތު ފަންޑުން 15 މިލިއަން ކުވެއިތް ދީނާރ

ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަސައްކަތަށް ކުވައިތު ފަންޑުން 15 މިލިއަން ކުވެއިތު ދީނާރު ނުވަތަ 49.9 މިލިއަން ރުފިޔާގެ ލޯނެއް ދީފިއެވެ.

މިކަމާއި ގުޅޭ ލޯނު އެއްބަސްވުމުގައި ދިވެހި ސަރުކާރުގެ ފަރާތުން ސޮއުކުރެއްވީ މިނިސްޓަރ އޮފް ފިނޭންސް އިބްރާހީމް އަމީރެވެ. އަދި ކުވޭތު ފަންޑުގެ ފަރާތުން ސޮއިކުރެއްވީ އެ ފަންޑުގެ އެޑްމިން އެންޑް ފައިނޭންސް އެފެއާޒްގެ ޑެޕިއުޓީ ޑިރެކްޓަރ ނަދާލް އަލް ޢުލަޔާނެވެ.

advertisement

ވެލާނާ އިންޓަރނޭޝަނަލް އެއަރޕޯޓު ތަރައްޤީކުރުމަށް ސަރުކާރުން ކުރިއަށްގެންދާ ބިޔަ މަޝްރޫޢުގެ ދަށުން އެއަރޕޯޓުގައި އާ ފަސެންޖަރ ޓާރމިނަލަކާއި ކާގޯ ޓާރމިނަލެއް ތަރައްޤީކުރުން ހިމެނެއެވެ.

އެއަރޕޯޓުގެ އައު ޓަރމިނަލްގެ މަސައްކަތަށް 357 މިލިއަން ޑޮލަރު ޚަރަދުވާއިރު، މި ޓަރމިނަލަކީ ހަތްދިހަ އަށް ހާސް އަކަ މީޓަރުގެ ޖާގައިގެ ޓަރމިނަލެކެވެ. ބިންލާދީން ގްރޫޕާއެކު ފަހުންވީ އެއްބަސްވުމުގެ ދަށުން ޓަރމިނަލްގެ ބޮޑުކުޑަމިނަށް އެއްވެސް ބަދަލެއް ނާދެއެވެ. ދިވެހިވަންތަ ސިފަތަކެއް ފެންނާނެހެން ޓަރމިނަލުގެ އެތެރެއާއި ބޭރުގެ ޑިޒައިންނަށް ބައެއް ބަދަލުތައް ގެނެސްފައިވާކަމަށް އެމް.އޭ.ސީ.އެލުން ވަނީ ވިދާޅުވެފައެވެ.

ކުވޭތު ފަންޑުންވަނީ 2016ވަނަ އަހަރުވެސް ވެލާނާ އިންޓަރނޭޝަނަލް އެއަރޕޯޓުގެ އާ ޓާރމިނަލްގެ މަސައްކަތަށް 50 މިލިޔަން އެމެރިކާ ޑޮލަރު ނުވަތަ 771 މިލިޔަން ރުފިޔާގެ ލޯނެއް ދީފައެވެ.