ދެކުނު އޭޝިއާ ޤައުމުތަކުގެ ފަތުރުވެރިންނަށް މާދަމާއިން ފެށިގެން ރާއްޖެއައުމުގެ ފުރުސަތު ހުޅުވާލަނީ

ދެކުނު އޭޝިއާ ޤައުމުތަކުގެ ފަތުރުވެރިންނަށް ރާއްޖެ އަލުން ހުޅުވާލައިފިއެވެ.
ދެކުނު އޭޝިއާގެ ފަތުރުވެރިންނަށް ވިސާ ދިނުން ހުއްޓާލާފައިވަނީ މިދިޔަ މޭއި މަހުގެ 13 ވަނަ ދުވަހުން ފެށިގެންނެވެ.

ދެކުނު އޭޝިއާ ޤައުމުތަކުގެ ފަތުރުވެރިންނަށް ވިސާ ދިނުން ހުއްޓާލީ ކޯވިޑް-19 ފެތުރޭ މިންވަރު ބޮޑު ތަނުން އިތުރުވުމާއި ގުޅިގެން އެޗްޕީއޭން އެޅި ހާއްސަ ފިޔަވަޅުތަކުގެ ދަށުންނެވެ.

advertisement

އެޗްޕީއޭއިން ނެރެފައިވާ އިއުލާނެއްގައި ބުނެފައިވަނީ، ދެކުނު އޭޝިއާގެ ޤައުމުތަކުގެ ފަތުރުވެރިންނަށް މާދަމާއިން ފެށިގެން ރާއްޖެ އެތެރެވުމަށް ހުޅުވާލެވޭނެކަމަށެވެ. އެޗްޕީއޭއިން ބުނި ގޮތުގައި ރާއްޖެއަށް ފަތުރުވެރިން އެތެރެވެވުނު ނަމަވެސް، ރާއްޖޭގެ މީހުން ދިރިއުޅޭ އެއްވެސް ރަށެއްގައި މަޑުކޮށް ގެސްޓް ހައުސްތަކަށް ޗެކްއިން ނުކުރެވޭނެ ކަމަށެވެ.

ނަމަވެސް މާލޭގައި ޓްރާންސިޓްވާ ފަތުރުވެރިން ޓޫރިޒަމް މިނިސްޓްރީން ކަނޑައާޅާ އުސޫލެއްގެ މަތިން ކަނޑައާޅާ ގެސްޓުހައުސްތަކުގައި ޓްރާންސިޓުވުމަށް މަޑު ކުރެވިދާނެ ކަމަށް އެޗްޕީއޭން ވަނީ އަންގާފައެވެ. އެޗްޕީއޭއިން ބުނި ގޮތުގައި މީހުން ދިރިއުޅޭ ރަށްރަށުގައި މި ސަރަހައްދުގެ ޤައުމުތަކުގެ ފަތުރުވެރިން މަޑުކުރުމާމެދު މިމަސް ނިމުމުގެ ކުރިން ގޮތެއް ކަނޑައަޅާނެ ކަމަށެވެ.