ނެޝަނަލް ޓްރޭޑް ޓެސްޓިންގ އެންޑް ސަރޓިފިކޭޝަން ގަވާއިދު ގެޒެޓްކޮށްފި

“ނެޝަނަލް ޓްރޭޑް ޓެސްޓިންގ އެންޑް ސަރޓިފިކޭޝަން” ގެ ގަވާއިދު ގެޒެޓްކޮށްފިއެވެ. މި ގަވާއިދުގައިވާ ކަންކަން ތަންފީޛުކުރާނީ، މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީންނެވެ.

މިއީ ރަސްމީ ނިޒާމެއްގެ ތެރެއިން ސެޓުފިކެޓެއް ނެތި، އެއް ބާވަތެއްގެ ފަންނީ މަސައްކަތުގައި ނުވަތަ އެއް ވަޒީފާއެއްގައި ދެމިތިބޭ މުވައްޒަފުންގެ ކިބައިގައި ވަޒީފާގެ މަސްއޫލިއްޔަތު އުފުލުމަށް ބޭނުންވާ ފަންނީ ހުނަރު ހުރިތޯ ބަލައި، މަތީ ހަރުފަތަކަށް ވާސިލުވުމުގެ ފުރުޞަތު އެ މީހުންނަށް ހޯދައިދިނުމުގެ ގޮތުންނާއި، މިފަދަ ފަންނީ މަސައްކަތްކުރާ މީހުންގެ މަސައްކަތް ރަސްމީ ސިފައެއްގައި ބަލައިގަތުމުގެ ގޮތުން މަސައްކަތުގެ ތަޢުލީމާއި ތަމްރީނު ދިނުމުގެ ޤައުމީ ނިޒާމުގެ ތެރެއިން ޓްރޭޑް ޓެސްޓިންގ ދޭނެ އުސޫލެއް ޤާއިމުކޮށް، އެ ފަރާތްތަކަށް ސަނަދު ދެވޭނެ އިންތިޒާމް ހަމަޖެއްސުމުގެ ކަންކަން ކަނޑައަޅާ ގަވާއިދެވެ.

advertisement

ޓްރޭޑް ޓެސްޓިންގ ކުރިޔަށް ގެންދިއުމަށް ޓަކައި ތަމްރީނު ދޭ ފަރާތް، މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީގައި ރަޖިސްޓަރީ ކުރަންޖެހެއެވެ. އަދި ޓްރޭޑް ޓެސްޓިންގގެ ބައިވެރިންގެ “ނޭޝަނަލް އެސެސްމަންޓް” ކުރި ޔަށް ގެންދިއުމުގެ ކުރިން، މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީގައި ރަޖިސްޓަރީ ކޮށްފައިވާ ތަމްރީނު ދޭ ފަރާތެއް މެދުވެރިކޮށް، ޓްރޭޑް ޓެސްޓިންގގައި ބައިވެރިވާ ފަރާތްތަކުގެ ހުނަރު “ނޭޝަނަލް ކޮމްޕީޓަންސީ ސްޓޭންޑަރޑް” ގައި ބަޔާންކޮށްފައިވާ މިންވަރަށް ހުރިތޯ ބެލުމަށްފަހު، އިތުރަށް ދަސްކުރަންޖެހޭ ހުނަރުތައް އެ މަރުކަޒަކުން ދަސްކޮށްދިނުމަށްފަހު “ޕްރީ އެސެސްމަންޓް” ކުރިޔަށް ގެންދަންޖެހޭނެކަމަށް ޤާވައިދުގައި ވަނީ ބުނެފައެވެ.

ޓްރޭޑް ޓެސްޓިންގ ގެ ބައިވެރިންގެ ޝަރުތުތަކުގެ ތެރޭގައި ރަށު ފެންވަރުގައި ބަލައިގަންނަ މިންވަރަށް ފަންނީ ހުނަރުވެރި މަސައްކަތެއް ކުރާތާ މަދުވެގެން 5 އަހަރުދުވަސް ވެފައިވާ ފަރާތަކަށް ވާންޖެހޭނެއެވެ. ނުވަތަ ފަންނީ ހުނަރުވެރި މަސައްކަތްތެރިކަމުގެ ވަޒީފާއެއްގައި މަދުވެގެން 5 އަހަރުދުވަސް ވެފައިވާ ފަރާތަކަށް ވުން ނުވަތަ ރާއްޖޭގެ އެކި ސަރަޙައްދުތަކުގައި، ޒަމާނުއްސުރެ ކޮށްއުޅޭ ދިވެހީންގެ ޚާއްޞަ މަސައްކަތްތައް ދިރުވައި އާލާކުރުމުގެ ގޮތުން އެ ރޮނގުން އެފަދަ މަސައްކަތް ޤައުމީ ފެންވަރުގައި ނުވަތަ ރަށު ފެންވަރުގައި ބަލައިގަންނަ މިންވަރަށް މަސައްކަތް ކުރާތާ 5 އަހަރުދުވަސް ވެފައިވާ ފަރާތަކަށް ވާންޖެހޭނެކަމަށް ވަނީ ބުނެފައެވެ.

ޓްރޭޑް ޓެސްޓިންގ ފުރިހަމަކުރުމަށް، އެއްވެސް ފަރާތަކުން ޞައްޙަ ނޫން ލިޔެކިޔުމާއި މަޢުލޫމާތު ހުށަހެޅިކަން ސާބިތުވެއްޖެނަމަ، ދިވެހިރާއްޖޭގެ މަތީ ތަޢުލީމާއި ތަމްރީނުގެ ޤާނޫނުގައިވާ ގޮތުގެ މަތީން، އެ ފަރާތެއް 25000 ރުފިޔާއިން ޖޫރިމަނާ ކުރާނެކަމަށް ޤާނޫނުގައި ވަނީ ބުނެފައެވެ.