އަލީ ވަހީދުގެ ޕާސްޕޯޓުގެ މައްސަލަ މުރާޖާކުރަން ހުށައަޅައިފި

ކުރީގެ ޓޫރިޒަމް މިނިސްޓަރ އަލީ ވަހީދުގެ ޕާސްޕޯޓް ހިފެހެއްޓުމާއި ގުޅޭގޮތުން ހައިކޯޓުގައި އިސްތިއުނާފްކުރި މައްސަލަ ބަލައިނުގަތުމުން، ޕްރޮސެކިއުޓަރ ޖެނަރަލްގެ އޮފީހުން އެ މައްސަލަ މުރާޖައާކުރުމަށް ހުށަހަޅައިފިއެވެ.

އަލީ ވަހީދުގެ ޕާސްޕޯޓް ހިފަހައްޓަން ޕްރޮސެކިއުޓަރ ޖެނަރަލްގެ އޮފީހުން ކްރިމިނަލް ކޯޓުގައި މިމަހުގެ 4 ވަނަ ދުވަހު އެދުމުން، ޕާސްޕޯޓު ހިފެހެއްޓުމުގެ މަގްސަދެއް އޮތް ކަމަށް ނުދެކޭތީ ޕާސްޕޯޓް ހިފަހައްޓައިދެވެން ނެތްކަމަށް ކްރިމިނަލް ކޯޓުން ވަނީ ނިންމާފައެވެ. އަދި ކްރިމިނަލް ކޯޓުގެ ނިންމުން ހައިކޯޓުގައި އިސްތިއުނާފްކުރުމުން، އެމައްސަލަ ބަލައިނުގަތުމަށް ހައިކޯޓުގެ ރަޖިސްޓްރާރ ވަނީ ނިންމާފައެވެ.

ޕްރޮސެކިއުޓަރ ޖެނެރަލްގެ އޮފީހުން ވިދާޅުވީ ކްރިމިނަލް ކޯޓުން ހައިކޯޓުގެ ރަޖިސްޓްރާރގެ ނިންމެވުން މުރާޖަޢާކޮށްދެވުން އެދި ހައިކޯޓުގެ ޤަވާއިދުގެ 17 ވަނަ މާއްދާގެ ހ ގެ ދަށުން ހުށަހަޅާފައިވާކަމަށެވެ.

ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާކުރި ކަމަށް ބުނާ މައްސަލައިގައި ހަތް ދައުވާއެއް ކޮށްފައިވާ އަލީ ވަހީދު މިދިޔަ ފެބްރުއަރީ މަހު ބޭސްފަރުވާ އަށް ރާއްޖެއިން ބޭރަށް ވަޑައިގަތުމަށް ހަތަރު މަހަށް އޭނާގެ ޕާސްޕޯޓު ދޫކޮށްލަން ކްރިމިނަލް ކޯޓުން ވަނީ އަމުރުކޮށްފަ އެވެ. އެ މުއްދަތުގައި ވެސް އޭނާ އަނބުރާ ރާއްޖެ ވަޑައެއް ނުގަނެ އެވެ.

advertisement

އޭނާގެ ޕާސްޕޯޓު ދޫކުރި މުއްދަތު ހަމަވުމުން އޭނާގެ ޕާސްޕޯޓް ހިފެހެއްޓުމުގެ އަމުރަކަށް ފުލުހުން އެދުނީ، މިދިޔަ މަހުގެ 23 ވަނަ ދުވަހު އެވެ. ނަމަވެސް، އެކަމާ މެދު ގޮތެއް ނުނިންމައި ހަފްތާއަކަށް ވުރެ ގިނަ ދުވަސްވީ ފަހުން ގާޒީ ހަސަން ސައީދު ނިންމެވީ އަމުރެއް ނެރެނުދޭށެވެ.