އިއްޒުއްދީން ސްކޫލްގައި ހިނގި ޖިންސީ ފުރައްސާރައިގެ މައްސަލައިގައި އެޅި ފިޔަވަޅު އަންގާފައިނުވާތީ ކަންބޮޑުވުން ފާޅުކޮށްފި

އިއްޒުއްދީން ސްކޫލްގެ ޕްރިންސިޕަލް އެ ސުކޫލްގެ ޓީޗަރުންތަކަކަށް ޖިންސީ ފުރައްސާރަކުރި މައްސަލައިގައި އޭނާއާއިމެދު އެޅި ފިޔަވަޅެއް އަންގާފައިނުވާތީ ޕަބްލިކް އިންޓްރެސްޓް ލޯރ ސެންޓަރުން ކަންބޮޑުވުން ފާޅުކޮށްފިއެވެ.

އިއްޒުއްދީން ސްކޫލުގައި މަސައްކަތްކުރި ޕްރިންސިޕަލް އިސްމާއީލް ނަސީރު އެ ސުކޫލުގައި މަސައްކަތްކުރާ 4
ޓީޗަރަކަށް ޖިންސީ ފުރައްސާރަ ކޮށްފައިވާތީ، އެ 4 ޓީޗަރުންގެ ފަރާތުން އެ މައްސަލަ މިނިސްޓްރީ އޮފް އެޑިއުކޭޝަންގެ ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ކޮމިޓީއަށް ހުށަހެޅިއެވެ. އެ 4 ޓީޗަރުންގެ ޤާނޫނީ ވަކީލު ގޮތުގައި ތަމްސީލްކޮށްފައިވަނީ ޕަބްލިކް އިންޓްރެސްޓް ލޯރ ސެންޓަރުންނެވެ.

advertisement

މިކަމާއި ގުޅޭގޮތުން އެ ޖަމިއްޔާއިން ނެރެފައިވާ ނޫސް ބަޔާނެއްގައި ބުނެފައިވަނީ އެޑިއުކޭޝަން މިނިސްޓްރީގެ ޖިންސީ ފުރައްސާރަކުރުމާއި ގޯނާ ކުރުން ހުއްޓުވުމުގެ ކޮމިޓީއިން މައްސަލަ ބައްލަވައި، އިއްޒުއްދީން ސުކޫލުގެ ޕްރިންސިޕަލް އިސްމާޢީލް ނަސީރުގެ ފުށުން ޖިންސީ ފުރައްސާރަ ކުރުމުގެ އަމަލެއް ހިންގިކަމުގައި ބުރަވެވެން އޮތްކަމަށް ނިންމަވައި، ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ޤާނޫނުގެ 22 ވަނަ މާއްދާގެ ދަށުން ފިޔަވަޅު އަޅަން ފެންނަ ކަމަށް މައްސަލަ ބެލި ކޮމެޓީގެ އިއްތިފާޤުން ނިމިފައިވާކަމުގައި އަންގާފައިވާކަމަށެވެ. އެހެންނަމަވެސް، މައްސަލަ ރައްދުވި ފަރާތުގެ މައްޗަށް އެޅި ފިޔަވަޅަކީ ކޮބާކަން މައްސަލަ ހުށަހެޅި ފަރާތަށް އަންގާފައެއް ނުވާކަމަށެވެ. އަދި އިސްމާޢީލްނަސީރު މިހާރު އިއްޒުއްދީން ސުކޫލަށް ވުރެ މާ ބޮޑު ސުކޫލަކަށް ބަދަލުކޮށްފައިވާކަމުގެ މައުލޫމާތު ލިބިފައިވާކަމަށް އެ ޖަމިއްޔާގެ ނޫސްބަޔާނުގައި ވަނީ ބުނެފައެވެ. މިކަމަކީ އޭގެ ޒާތުގައި ފިޔަވަޅަކަށް ވުރެ ބޮޑަށް ޕްރޮމޯޝަނެއްކަމަށް ސިފަވާކަން ވަނީ ފާހަގަކޮށްފައެވެ.

މައްސަލަ ހުށަހެޅި 4 ފަރާތް އެހެން ސުކޫލަކަށް ބަދަލުކުރަން އުޅޭކަމުގެ މައުލޫމާތު ލިބި އެކަން އެގޮތަށް ނުކުރުމަށް އިލްތިމާސްކޮށް މިނިސްޓްރީ އޮފް އެޑިއުކޭޝަން އަދި ސިވިލް ސަރވިސް ކޮމިޝަނަށް އެޖަމްޢިއްޔާއިން ސިޓީ ފޮނުވާފައިވަނިކޮށް، މައްސަލަ ހުށަހެޅި 4 ފަރާތް ވަނީ އެހެން ސުކޫލުތަކަށް ބަދަލުކޮށްފައިކަމަށް ވަނީ ބުނެފައެވެ.

ޖިންސީ ފުރައްސާރަކުރުމާ ގޯނާ ކުރުން ހުއްޓުވުމުގެ ޤާނޫނުގެ 6 ވަނަ މާއްދާގެ (ށ) ގައި ޖިންސީ ފުރައްސާރަކުރުމުގެ ޢަމަލަކާ ގުޅިގެން ޤާނޫނުގެ ދަށުން ބެލޭ މައްސަލައެއްގައި އެފަދަ މައްސަލައެއް ހުށަހަޅާ ފަރާތަކަށް ނުވަތަ ހެކިބަސްދޭ ފަރާތަކަށް ނުވަތަ އެފަދަ މައްސަލައެއް ހުށަހަޅާ ފަރާތަކަށް އެހީތެރިކަން ފޯރުކޮށްދޭ ފަރާތަކަށް އެސަބަބަށްޓަކައި ވަޒީފާ ލިބުމުގެ ފުރުޞަތުން ނުވަތަ ވަޒީފާގައި ދެމިހުރުމުގެ ޙައްޤަށް ނުވަތަ ވަޒީފާގެ ކުރިއެރުން ލިބުމުގެ ފުރުޞަތުން ނުވަތަ ވަޒީފާއަދާކުރާ ފަރާތްތަކަށް ލިބިދޭންޖެހޭ އެނޫންވެސް ޙައްޤަކުން އެއިން ފަރާތް މަހުރޫމްކޮށްގެން ނުވާނެކަމަށް ބަޔާންކޮށްފައިވެއެވެ. އަދި ހަމަ އެޤާނޫނުގެ 7 ވަނަ މާއްދާގެ ދަށުން ވަޒީފާދޭ ފަރާތުގެ ސަމާލުކަމަށް މިފަދަ ކަމެއް އަތުވެއްޖެނަމަ އެ ޢަމަލެއް އެމީހަކާމެދު ހިންގުނު ފަރާތަށް އިތުރު ގެއްލުމެއް ލިބުނަ ނުދީ އެފަދަ ކަންކަން ހުއްޓުވުމަށް ވަޒީފާދޭ ފަރާތުން ފިޔަވަޅު އަޅަންޖެހޭކަމަށް އެ ޖަމިއްޔާއިން ވަނީ ބުނެފައެވެ. މައްސަލަ ހުށަހެޅި ފަރާތްތައް އެހެން ސުކޫލުތަކަށް ބަދަލުކޮށްފައިވަނީ މައްސަލަ ހުށަހެޅި ފަހުން އެފަރާތްތަކުގެ އެއްވެސް ބަހެއް ހޯދުމަކާ ނުލާ ކަމުގައިވާއިރު، މިއީ އެފަރާތްތައް ޖިންސީ ފުރައްސާރައިގެ މައްސަލަ ހުށަހެޅުމުން އެފަރާތްތަކާމެދު ނުހައްގުން އެޅިފައިވާ ފިޔަވަޅެއްކަމަށް ބެލެވޭކަމަށް އެ ޖަމިއްޔާއިން ވަނީ ފާހަގަކޮށްފައެވެ. އަދި މިފަދަ ކަންކަން މިގޮތަށް ހިނގަމުންދާނަމަ، މިކަމަކީ މައްސަލަ ހުށަހެޅުމުން ލިބުނު އަދަބެއް ކަމުގައި ބެލެވި، މިފަދަ އަމަލުތައް ތަހައްމަލްކުރަން ޖެހިފައިވާ އެހެނިހެން ފަރާތްތައްވެސް މިފަދަ މައްސަލަތައް ހުށަހެޅުމަށް ބިރުގަނެ، ޖެހިލުންވުމަކީ އެކަށީގެންވާކަމެއްކަމަށް ވަނީ ބުނެފައެވެ.

މިކަމާއި ގުޅޭގޮތުން ޗީޓާސް އެސޯސިއޭޝަން އޮފް މޯލްޑިވްސްއިންވެސް ވަނީ ނޫސްބަޔާނެއް ނެރެފައެވެ. އެ ޖަމިއްޔާގެ ބަޔާނުގައި ވަނީ އިއްޒުއްދީން ސްކޫލްގެ ޕްރިންސިޕަލް، އެޖަމްޢިއްޔާ މެންބަރުންކަމުގައިވާ، ހަ މުދައްރިސަކަށް، އެކިކަހަލަ ފުރައްސާރަކުރުމާއި، ބައެއް މުދައްރިސުންނަށް ޖިންސީ ފުރައްސާރަކުރުމުގެ ތުހުމަތާއި ގުޅިގެން، މިނިސްޓްރީ އޮފް އެޑިއުކޭޝަންއާއި ކަމާއި ބެހޭ ފަރާތްތަކަށް މައްސަލަ
ހުށައެޅުމާއި ގުޅިގެން، މިނިސްޓްރީ އޮފް އެޑިއުކޭޝަންގެ ހާއްސަ ކޮމިޓީއަކުން މިމައްސަލަތައް ބަލައި، ޖިންސީ ފުރައްސާރައިގެ އަމަލު ސާބިތުވެފައި ވަނިކޮށް، މިއަމަލު ހިންގި ފަރާތައް އެއްވެސް ފިޔަވަޅުއެޅުމެއްނެތި، އެފަރާތުގެ އެދުމުގެ މަތިން، ޕްރޮމޯޝަންއަކާޢިއެކު އެހެން ސްކޫލަކަށް ބަދަލުކޮށްފައިވާކަން ވަނީ ފާހަގަކޮށްފައެވެ. ތައުލީމީ ދާއިރާގެ ގަދަރުވެރި މަޤާމެއްގައި ހުރެ، އޭނާގެ ދަށުން ތިބި މުއައްޒަފުންނަށް ޖިންސީ
ފުރައްސާރަކޮށްފައިވާކަން، ސާބިތުވެފައިވާ ހިނދު، އަނިޔާދިން ފަރާތުގެ މަސްލަހަތު ހިމާއަތްކުރުމަށް، މިނިސްޓްރީ އޮފް އެޑިއުކޭޝަންއިން މަސަކަތްކުރަމުންދާދިއުން އެ ޖަމްޢިއްޔާއިންވެސް ވަނީ ހަރުކަށި އިބާރާތުން ކުށްވެރިކޮށްފައެވެ. ޖިންސީ ފުރައްސާރައިގެ މައްސަލައިގައި، ޝިކާރަކަށްވެފައިވާ ފަރާތްތަކަށް، އެފަރާތްތަކުގެ ބެލެނިވެރިއެއްގެ ގޮތުގައިވާ، މިނިސްޓްރީ އޮފް އެޑިއުކޭޝަންއިންވަނީ އެފަރާތްތަކަށް ބޭއިންސާފުން، އެއްވެސް މަޝްވަރާކުރުމެއްނެތި ފިޔަވަޅުއަޅާފައިވާކަން ޗީޓާސް އެސޯސިއޭޝަނުންވެސް ވަނީ ފާހަގަކޮށްފައެވެ.

މިކަމަކީ އެޖަމްޢިއްޔާއިން ނުހަނު ކަންބޮޑުވާ އަދި ޖިންސީ ކުށުގެ ގާނޫނާއި ހިލާފަށް، ބޭއިންސާފުން ނިންމާފައިވާ ނިންމުމެއްކަމަށް ވަނީ ބުނެފައެވެ.
މިނިސްޓްރީ އޮފް އެޑިއުކޭޝަންއިން، މިމައްސަލަ ރައްދުވާ ފަރާތުގެ މަސްތަހަތު އިސްކޮށް، އެފަރާތް ރައްކާތެރިކުރުމަށް ކުރަމުންދާ މަސައްކަތްތައް ހުއްޓާލައި، ގާނޫން ދޭންޖެހޭ އެންމެ ހަރުކަށި ފިޔަވަޅު އެފަރާތައް އެޅުމަށްވެސް އެ ޖަމިއްޔާއިން ވަނީ ގޮވާލާފައެވެ.