ޖޫންމަހު އިމްޕޯޓް، އެކްސްޕޯޓް އިތުރުވެއްޖެ

ޖޫންމަހު އިމްޕޯޓް އެކްސްޕޯޓް އިތުރުވެ އިމްޕޯޓް އެކްސްޕޯޓުން ލިބުނު އާމްދަނީ އިތުރުވެއްޖެއެވެ. މިއަހަރުގެ ޖޫންމަހު ރާއްޖެއަށް އިމްޕޯޓް އެކްސްޕޯޓުން ލިބުނު އާމްދަނީ ވަނީ %59 އިތުރުވެފައެވެ.

މޯލްޑިވްސް ކަސްޓަމްސް ސަރވިސްގެ ތަފާސްހިސާބުތަކުން ދައްކާގޮތުން މިއަހަރުގެ ޖޫންމަހު އިމްޕޯޓް އެކްސްޕޯޓުން ދައުލަތައް ލިބިފައިވަނީ 247 މިލިއަން ރުފިޔާއެވެ. މިދިޔަ އަހަރުގެ ޖޫންމަހު ލިބިފައިވަނީ 156 މިލިއަން ރުފިޔާއެވެ.

advertisement

މިއަހަރުގެ ޖޫންމަހު 228 މިލިއަން ރުފިޔާގެ މުދާ ވަނީ އެކްސްޕޯޓްކޮށްފައެވެ. މިދިޔަ އަހަރު މިއަދަދު އުޅުނީ 221 މިލިއަނުގައެވެ. އެހެންކަމުން މިއީ %3 ކުރިއެރުމެކެވެ. އިމްޕޯޓްވެސް މިދިޔަ އަހަރާއި އަޅާބަލާއިރު މިއަހަރު ވަނީ އިތުރުފައެވެ. އެއީ %44 އެވެ. މިއަހަރުގެ ޖޫންމަހު ރާއްޖެއަށް އިމްޕޯޓްކޮށްފައިވަނީ 3 ބިލިއަން ރުފިޔާގެ މުދަލެވެ. ނަމަވެސް މިދިޔަ އަހަރު މި އަދަދު އުޅުނީ 2.1 ބިލިއަނުގައެވެ.

ފާއިތުވި ޖޫންމަހު ރާއްޖެއަށް އެންމެ ގިނައިން މުދާ އެތެރެކޮށްފައިވަނީ އޮމާން، ޗައިނާ އަދި ސިންގަޕޫރުންނެވެ. އޮމާންއިން 490 މިލިއަން ރުފިޔާގެ މުދާ، ޗައިނާއިން 391 މިލިއަން ރުފިޔާގެ މުދާ އަދި ސިންގަޕޫރުން 354 މިލިއަން ރުފިޔާގެ މުދާ ރާއްޖެ އެތެރެކޮށްފައިވާކަމަށް ކަސްޓަމްސްގެ ތަފާސްހިސާބުތަކުން ދައްކައެވެ.

މިއަހަރުގެ ޖޫންމަހު ރާއްޖެއިން އެންމެ ގިނައިން މުދާ އެކްސްޕޯޓްކުރި ޤައުމުތަކުގެ ލިސްޓުގެ 1 ވަނައިގައި އުޅެނީ ތައިލޭންޑެވެ. ރާއްޖެއިން އެކްސްޕޯޓްކުރި މުދަލުގެ %30 އެކްސްޕޯޓްކޮށްފައިވަނީ ތައިލޭންޑަށެވެ. ޖަޕާން އަދި ޖަރުމަނުވިލާތައް %16 މުދާ އިނގިރޭސިވިލާތައް %7 އަދި ސްވިޒަލޭންޑަށް %5 މުދާ އެކްސްޕޯޓްކޮށްފައިވެއެވެ.