ހެލްތް ޑިކްލަރޭޝަން ފޯމު މިހާރު އިމުގާ ޕޯޓަލްއިން ހުށައެޅޭނެ – އިމިގްރޭޝަން

ރާއްޖެއަށް ދަތުރުކުރާ ފަރާތްތަކަށް ހެލްތް ޑިކްލަރޭޝަން ފޯމު މިހާރު އިމުގާ ޕޯޓަލްއިން ހުށައެޅޭނެކަމަށް މޯލްޑިވްސް އިމިގްރޭޝަނުން ވިދާޅުވެއްޖެއެވެ. އިމިގްރޭޝަނުން ވަނީ އިމުގާ ޕޯޓަލް އަޕްގްރޭޑްކުރުމަށްޓަކައި ހެލްތް ޑިކްލަރޭޝަން ފޯމު ޕޯޓަލް މެދުވެރިކޮށް ހުޅައެޅުން އިއްޔެ މެދުކަނޑާލާފައެވެ.

އިމިޤްރޭޝަނުން މިއަދު ވިދާޅުވީ، ޕޯޓަލް އަޕްގްރޭޑް ކުރުމުގެ މަސައްކަތް މިހާރު ނިމިފައިވާކަމަށާއި ކުރިއެކޭވެސް އެއްގޮތައް މިހާރު އިމުގާ ޕޯޓަލް މެދުވެރިކޮށް ހެލްތް ޑިކްލަރޭޝަން ފޯމު ހުށައެޅޭނެކަމަށެވެ. ރާއްޖެއަށް ދަތުރުކުރާ ފަރާތްތަކުން ރާއްޖެ އައުމުގެ ކުރިން 24 ގަޑިއިރު ހަމަނުވާ ހެލްތް ޑިކްލަރޭޝަން ފޯމެއް މޯލްޑިވްސް ކަސްޓަމްސް ސަރވިސްއަށް ހުށައަޅަންޖެހެއެވެ.

ރާއްޖެ އަންނަ ކޮންމެ މީހަކު 96 ގަޑިއިރުނުވާ ކޯވިޑް ނެގެޓިވް ނަތީޖާ ގެންނަން ޖެހޭގޮތައް މޯލްޑިވްސް އިމިގްރޭޝަނުން މިހާރު ވަނީ ބަދަލުކޮށްފައެވެ. މީގެކުރިން ރާއްޖެއަށް އެތެރެވާ ފަރާތްތައް ހުށަހަޅަން ޖެހެނީ 72 ގަޑިއިރުނުވާ ޕީސީއާރު ނެގެޓިވް ނަތީޖާއެކެވެ.