މާލޭގައި 2 ފުޓްސަލް ދަނޑު އަޅާނެ ބަޔަކު ހޯދަނީ

މާލޭ ސިޓީ ކައުންސިލްއިން ތަރައްޤީކުރާ 2 ފުޓްސަލް ދަނޑު އަޅައިދޭނެ ބަޔަކު ހޯދަން އިއުލާންކޮށްފިއެވެ. ސިޓީ ކައުންސިލުން ކޮށްފައިވާ އިއުލާނެއްގައި ބުނެފައިވަނީ މި 2 ފުޓްސަލް ދަނޑު އަމިއްލަ ތަކެތީގައި އަޅައިދޭނެ ބަޔަކު ހޯދަން ބޭނުންވާކަމަށެވެ.

މިކަމަށް ޝަޢުގުވެރިވެލައްވާ ފަރާތްތަކުން މިމަހުގެ 22 ވަނަ ދުވަހު މަޢުލޫމާތު ސާފުކުރުމަށް ކައުންސިލުން ވަނީ އެދިފައެވެ. އަދި އަގު ހުށައަޅަންޖެހޭނީ މިމަހުގެ 26 ވަނަ ދުވަހުއެވެ.

advertisement

މިބީލަމުގައި ބައިވެރިވެވޭނީ ދިވެހިރާއްޖޭގައި ރަޖިސްޓްރީކޮށްފައިވާ ދިވެހި ކުންފުންޏަކަށް އަދި ޕާރޓްނަރ ނުވަތަ އަމިއްލަ ފަރުދެއްނަމަ ދިވެހިރައްޔިތަކަށެވެ. މި ބީލަމަށް ކުރިމަތިލާ ފަރާތަކީ، ދައުލަތުގެ ޕްރޮކިއުމަންޓް ބީލަމަކާ ގުޅިގެން ސަސްޕެންޑްކުރެވިފައިވާ ފަރާތެއްކަމުގައި ވެގެން ނުވާނެކަމަށް ސިޓީ ކައުންސިލުން ވަނީ ބުނެފައެވެ.

ބީލަން އެވޯޑުކުރެވޭނީ ހުށަހަޅާފައިވާ ބީލަންތައް އިވެލުއޭޓްކުރުމަށްފަހުއެވެ. މި އިވެލުއޭޝަންގައި ބަލާނީ މަސައްކަތުގެ އަގަށް %75 އެވެ. މަސައްކަތުގެ މުއްދަތައް %15 އަދި ތަޖުރިބާއަށް %10 ކަމަށް ސިޓީ ކައުންސިލުން ވިދާޅުވެއެވެ.