ރާއްޖޭގައި ވަޒީފާ އަދާނުކުރާ މީހުންގެ އަދަދު 10،000 އިން މަތީގައި

“ވަޒީފާއެއް ހޯދަދީބަލަ” ނުވަތަ “މިއުޅެނީ ވަޒީފާއެއް ނުލިބިގެން” މިއީ ވަރަށް ގިނައިން އަޑުއިވޭ ވާހަކަތަކެވެ. ވަޒީފާއެއް ނުލިބިގެން ގިނަ ދުވަސްތަކެއް ވަންދެން “ޖޮބް ހަންޓިން” ގައި އުޅެންޖެހިފައިވާ ޒުވާނުން މިއަދު މުޖްތަމައުގައި މަދެއްނޫނެވެ. ހަމައެގޮތައް ވަޒީފާއަށް ދާންބޭނުންނުވާ ޒުވާނުންވެސް މަދުން ނަމަވެސް މުޖްތަމައުން ފެނެއެވެ.

ސްޓެޓިކްސް ބިއުރޯގެ ތަފާސްހިސާބުތައް ދައްކާގޮތުން ރާއްޖޭގައި ވަޒީފާ އަދާނުކުރާ މީހުންގެ އަދަދު 10،000 އިން މައްޗެވެ. މީގެތެރޭގައި އެންމެ ގިނައީ ވަޒީފާއަށް ނުދާ ފިރެހެނުންނެވެ. ރާއްޖޭގައި ވަޒީފާ އަދާކުރެވޭ އާބާދީގެ ތެރެއިން 10،127 ވަޒީފާއަށް ނުދާކަމަށް ސްޓެޓިކްސް ބިއުރޯގެ ތަފާސްހިސާބުތައް ދައްކައެވެ. މީގެތެރޭގައި ހިމެނެނީ 3704 އަންހެނުންނާއި، 6422 ފިރެހެނުންނެވެ.

advertisement

ވަޒީފާ އަދާނުކުރާ މީހުންގެ އާބާދީ އެންމެ ބޮޑީ ވެރިރަށް މާލޭގައެވެ. އެއީ %6.1 އެވެ. އަތޮޅުތަކުގައި ވަޒީފާ އަދާނުކުރާ މީހުންގެ އާބާދީ އުޅެނީ %4.4 އެވެ.

ރާއްޖޭގައި ވަޒީފާ އަދާކުރާ މީހުންގެ އާބާދީއަކީ 181،144 އެވެ. މީގެތެރެއިން 93،618 މީހުން މަސައްކަތްކުރަނީ މާލޭގައެވެ. އަދި 87،526 މީހުން މަސައްކަތްކުރަނީ އަތޮޅުތެރޭ ރަށްތަކުގައެވެ. ވަޒީފާ އަދާކުރާ މީހުންގެ ތެރޭގައި 107،426 މީހުންނަކީ ފިރެހެނުންނެވެ. އަދި73،717 މީހުންނަކީ އަންހެނުންކަމަށް ސްޓެޓިސްޓިކް ބިއުރޯގެ ތަފާސްހިސާބުތަކުން ދައްކައެވެ.

މަތީ މުސާރަ ލިބޭ ވަޒީފާތަކުގައި މަސައްކަތްކުރާ އަންހެނުންނަށްވުރެ ގިނައީ ފިރެހެނުންނެވެ. 10،000 އިން ދަށުގެ މުސާރަ ލިބޭ ވަޒީފާތަކުގައި ފިރެހެނުންނަށްވުރެ އަންހެނުން ގިނައެވެ. ނަމަވެސް 10،000 އިން މަތީގެ މުސާރަލިބޭ ވަޒީފާތަކުގައި އަންހެނުންނަށްވުރެ ފިރެހެނުން ގިނަކަމަށް ތަފާސްހިސާބުތަކުން ދައްކައެވެ.