ވ. އަންބަރާގައި ރިސޯޓްހަދަން އެއަތޮޅު ރައްޔިތުން ބޭނުމެއްނުވޭ – ކައުންސިލް

ވ. އަންބަރާގައި ރިސޯޓްހަދަން އެއަތޮޅު ރައްޔިތުން ބޭނުންނުވާކަމަށް އަތޮޅު ކައުންސިލުން ވިދާޅުވެއްޖެއެވެ. އެއަތޮޅު ކައުންސިލްގެ ރައީސް ޝުޖާއި ޢަލީ ސޮއެކުރައްވައި އަތޮޅު ކައުންސިލުން ނެރެފައިވާ ބަޔާނެއްގައި ބުނެފައިވަނީ، އަންބަރާއަކީ ރިސޯޓެއް ތަރައްގީ ކުރުން ނޫނީ ސިނާއީ މަސައްކަތެއް ކުރުމަށް ވުރެ މާ ނާޒުކު ރަށެއް ކަމަށެވެ. އަދި ރަށުގެ ވަށައިގެންވާ ފަރަކީ ތަފާތު ގިނަ ދިރުންތަކެއްގެ މައްޗަށް އުފެދިފައިވާ ރީތި ފަރަކަށްވުމާއި ވ. އަތޮޅުގައި ފަތުރުވެރިކަން ކުރާފަރާތްތަކާއި ވ. އަތޮޅުގެ ރައްޔިތުންގެ ބޭނުންތަކަށް ނުހަނު މުހިންމުވެފައިވާ ރަށެއްކަމަށެވެ.

އެހެންކަމުން އެ ރަށުގެ ޤުދުރަތީ ރީތިކަން ގެއްލޭގޮތައް އަދި ތިމާވެށީގެގޮތުން ހުރި ހާއްސަ ސިފަތައް ގެއްލޭފަދަ ގޮތަކަށް އެރަށް ތަރައްޤީކުރުމަށް ހުށައަޅާ އެއްވެސް ހުށައެޅުމަކަށް ވ. އަތޮޅު ރައްޔިތުން ތާއީދުނުކުރާނެކަމަށެވެ. އެ ރަށުގެ މުހިންމުކަން އަތޮޅަށް ބޮޑު އިރު މިހާރު ވެސް ރަށުގެ ވެއްޓަށް ގެއްލުންދީފައިވާ ކަމަށް ކައުންސިލުން ބުންޏެވެ.

advertisement

ކައުންސިލްގެ ބަޔާނުގައި އަންބަރާ ރިސޯޓެއްގެ ގޮތުގައި ތަރައްޤީކުރުމަށް ނިންމާފައިވާ ނިންމުމަށް ސަރުކާރުގެ ޕޮލިސީ ލެވެލްގައި މަޝްވަރާކޮށްދިނުމަށް އެއަތޮޅުގެ ރައްޔިތުންގެ ފަރާތުން އެދޭކަމަށް ވަނީ ބުނެފައެވެ.