ހިޔާ ފްލެޓް އެއްބަސްވުންތަކުގައި ސޮއިކުރަން އަލުން ފަށައިފި

ހިޔާ ފްލެޓް އެއްބަސްވުންތަކުގައި ސޮއިކުރުމުގެ މަސައްކަތް އަލުން ފަށައިފިއެވެ.
އެއްބަސްވުންތަކުގައި ސޮއިކުރުމުގެ މަސައްކަތުގައި އުޅޭ އެޗްޑީސީގެ މުވައްޒަފަކު ކޯވިޑް-19 އަށް ޕޮޒިޓިވްވުމާ ގުޅިގެން ސޮއިކުރުމުގެ މަސައްކަތް މެދުކަނޑާލީ މިދިޔަ ބުދަދުވަހުއެވެ.

އެއްބަސްވުންތަކުގައި ސޮއެކުރުން އަލުން ފަށާފައިވަނީ މިމަހުގެ 7 ވަނަ ދުވަހުއެވެ. އެއްބަސްވުމުގައި ސޮއިކުރަންދާ ފަރާތްތަކުން ކޯވިޑް 19 އިން ރައްކާތެރިވުމަށްޓަކައި ފިޔަވަޅުތައް އެޅުމަށް ވަނީ އިލްތިމާސްކުރައްވާފައެވެ. މީގެ ތެރޭގައި ސޮއިކުރަން އަންނަ ފަރާތްތަކުން އަމިއްލަ ގަލަން އަދި އިނގިލީގެ ނިޝާން ޖަހަން ބޭނުން ކުރާ “އިންކް ޕެޑް” ގެނައުމަށް ސަމާލުކަން ދިނުމަށް އެ ކުންފުނިން ވަނީ އިލްތިމާސްކޮށްފައެވެ.

ފުލެޓުގެ އެއްބަސުވުމުގައި ސޮއިކުރުމަށް ގިނަ ފަރާތްތަކަކަށް ތާވަލު ކުރެވިފައިވާތީ، ކޮންމެ މީހަކުވެސް ގަޑިއަށް ސޮއިކުރުމަށް ދިޔުމަށް އެ ކުންފުނިން ވަނީ އިލްތިމާސްކޮށްފައެވެ. މީގެ އިތުރުން އެއްބަސްވުމުގައި ސޮއިކުރުމުގެ މަސައްކަތް މެދުނުކެނޑި ކުރިއަށް ގެންދިޔުމަށްޓަކައި ސޮއިކުރަން ދާ ފަރާތްތަކުން ތިމާއާއި އެހެން ފަރާތްތަކުގެ ރައްކާތެރިކަމަށްޓަކައި ވެކްސިންގެ 2 ޑޯޒް ފުރިހަމަކުރުމަށްވެސް އެޗްޑީސީން އިލްތިމާސްކުރައްވައެވެ.

އެޗްޑީސީން ވިދާޅުވީ މިމަހުގެ 18 ވަނަ ދުވަހާ ހަމަޔަށް އެއްބަސްވުންތަކުގައި ސޮއިކުރުމުގެ މަސައްކަތްތައް ކުރިއަށްދާނެކަމަށެވެ. ހިޔާ މަޝްރޫޢުގެ ދަށުން ދޫކުރާ 6720 ހައުސިންގ ޔުނިޓު ލިބުނު ފަރާތްތަކާއެކު އެއްބަސްވުން އެކުލަވާލާ ފްލެޓުތަކުގެ ތަޅުދަނޑި ޙަވާލުކުރަން ފަށާފައިވަނީ މިދިޔަ މަހުގެ 14 ވަނަ ދުވަހުގައެވެ.