ވެކްސިން ޕްރޮގްރާމަށް އިމާރާތްކުރުމުގެ ސިނާއަތުގެ ކުންފުނިތަކުން އެއްބާރުލުން ދިނުމަށް ކޮންސްޓްރަކްޝަން އިންޑަސްޓްރީ އެސޯސިއޭޝަނުން ގޮވާލައިފި

ސަރުކާރުން ކުރިއަށްގެންދާ ވެކްސިން ޕްރޮގްރާމަށް އިމާރާތްކުރުމުގެ ސިނާއަތުގެ ކުންފުނިތަކުން އެއްބާރުލުން ދިނުމަށް މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ، މަސީން ގޮވާލައިފިއެވެ.

މަސީން ބުނެފައިވަނީ ކޮވިޑް19ގެ ބަލިމަޑުކަމާއެކު ކޮންސްޓްރަކްޝަން އިންޑަސްޓްރީއަށް ކުރިމަތިވި ގެއްލުންތަކާއި، ނޭދެވޭ އަސަރުތައް ކުޑަކޮށް އަލުން މަސައްކަތް ފަށައިގަތުމުގައި އިންޑަސްޓްރީގައި މަސައްކަތް ކުރާ ހުރިހާ މުވައްޒަފުންނަށް ވެކްސިން ދިނުމަކީ ވަރަށް މުހިންމު ކަމެއްކަމަށެވެ. އަދި ވެކްސިން ދިނުމުގެ ސަބަބުން އަލަށް އެކުލަވާލާ އުޞޫލުތަކުގެ ތެރެއިން އެއްރަށުން އަނެއް ރަށަށް ދަތުރުކުރުމާއި، މަސައްކަތްތަކާއި ގުޅިގެން ކުރެވޭ މުޢާމަލާތުތަކުގައި ފަސޭހަ އަދި ކުންފުންޏަށް ފައިދާކުރާނޭ ކަންކަން ހިމެނިގެންދާނެކަމަށް ވަނީ ބުނެފައެވެ. ވީމާ، ސަރުކާރުން ކުރިއަށް ގެންދަވާ ވެކްސިންގެ ޕްރޮގްރާމްގައި ކުންފުނީގެ ހުރިހާ މުވައްޒަފުން ބައިވެރި ކުރައްވައި ވެކްސިން ޖެހުމަށް ބާރުއަޅުއްވައި މި ޕްރޮގްރާމަށް އެއްބާރުލުން ދެއްވުމަށް މަސީން ކުންފުނިތަކަށް ވަނީ ގޮވާލާފައެވެ.

advertisement

އަދި މި ޕްރޮގްރާމްގައި ބައިވެރިވުމުގެ ގޮތުން މަސީން ފޮނުވާފައިވާ ފޯމް ފުރައި މިމަހުގެ 11 ވަނަ ދުވަހުގެ މެންދުރު 12:00 ގެ ކުރިން އެ އެސޯސިއޭޝަނަށް ފޮނުއްވުން ވަނީ އެދިފައެވެ.

ސަރުކާރާއި މަޝްވަރާކޮށް އެއެސޯސިއޭޝަނުން މަސައްކަތް ކުރަމުން ދަނީ މި ސިނާއަތުގެ ކުންފުނިތަކުގެ މަސައްކަތްތަކަށް ހުއްޓުމެއް އަދި ދަތިކަމެއް ނާންނާނޭ ފަދަ އިންތިޒާމެއްގެ ތެރެއިން ކުންފުނީގައި މަސައްކަތް ކުރައްވާ ދިވެހި އަދި ބިދޭސީ މުވައްޒަފުންނަށް ވެކްސިންގެ ފުރަތަމަ ޑޯޒް އަދި ހަމަޖެހިފައިވާ އުޞޫލާ އެއްގޮތަށް ދެވަނަ ޑޯ ދެވި މަސައްކަތުގެ މާޙައުލަށް ރައްކާތެރި ކަމެއް ގެނެވޭނޭ ގޮތްތަކެއް ހަމަޖެއްސުމަށްކަމަށްވެސް މަސީން ވަނީ ބުނެފައެވެ.