ދިރާސީ އައު އަހަރުގެ ހެޔޮ އެދުމާއި ތަހުނިޔާ އެޑިޔުކޭޝަން މިނިސްޓަރ ފޮނުވައިފި

ދިރާސީ އައު އަހަރުގެ ހެޔޮ އެދުމާއި ތަހުނިޔާ އެޑިޔުކޭޝަން މިނިސްޓަރ އައިޝަތު އަލީ ފޮނުވައިފިއެވެ.

އެޑިޔުކޭޝަން މިނިސްޓަރ އައިޝަތު އަލީ ވިދާޅުވީ، މިއީ އާ ފެށުމެއްކަމަށާއި އުޖާލާ އާ އަހަރެއްކަމަށެވެ. ކިޔެވުމަކީ ހުވަފެންތަކުގެ ދުނިޔެއަށް ހުޅުވޭ ދޮރޯއްޓެއްކަމަށާއި މި ދޮރޯށީގެ ތަޅުދަނޑިއަކީ ކުރާހިތްވުންކަމަށެވެ. މި ދިރާސީ އަހަރަކީ ފެހި، ފަހި ފާގަތި އަހަރެއް ކަމުގައި ލެއްވުމަށް އެދޭކަމަށް އެޑިޔުކޭޝަން މިނިސްޓަރ ވަނީ ވިދާޅުވެފައެވެ.

advertisement

މިއަހަރުގެ ދިރާސީ އަހަރުގެ ކިޔެވުން ފަށާފައިވަނީ މާލޭގެ ސްކޫލްތަކާ އަތޮޅުތަކުގެ ސްކޫލްތަކުގެ ދަރިވަރުން ހިމެނޭހެން 92،936 ދަރިވަރުންނާއެކުއެވެ. ދިރާސީ އާ އަހަރަށް ދަރިވަރުންނަށް މަރުހަބާ ކިޔުމަށް ސްކޫލްތަކުގައިވެސް އެކިއެކި ހަރަކާތްތައް ދަނީ ހިންގަމުންނެވެ. އަދި ސްކޫލްތަކުގެ ކިޔެވުން ފެށުން ފާހަގަކުރުމުގެ ގޮތުން ރައީސުލްޖުމްހޫރިއްޔާގެ އިތުރުން ސަރުކާރުގެ ވަޒީރުން ގެންދަވަނީ ރާއްޖޭގެ އެކި ކަންކޮޅުތަކުގެ ސްކޫލްތަކަށް މިއަދު ޒިޔާރަތްކުރައްވަމުންނެވެ.

ދިރާސީ އަހަރުގެ ކިޔެވުން ދެ ޓަރމަށް ކުރިއަށްގެންދާއިރު މި ފެށި ފުރަތަމަ ޓަރމްގެ ކިޔެވުން ޑިސެމްބަރުމަހުގެ 23ވަނަ ދުވަހުގެ ނިޔަލަށް ކުރިއަށްދާނެއެވެ. ތިން ހަފްތާގެ ބަންދަކަށްފަހު ސްކޫލްތަކުގެ ދެވަނަ ޓަރމްގެ ކިޔެވުން ފަށާނީ އަންނަ އަހަރުގެ ޖެނުއަރީމަހުގެ 16ވަނަ ދުވަހުއެވެ. 2021ވަނަ އަހަރުގެ ދިރާސީ އަހަރުގެ ކިޔެވުން ނިމޭނީ 2022ވަނަ އަހަރުގެ ޖޫންމަހުގެ 30ވަނަ ދުވަހުއެވެ.