“ޑިސްކަވަރ މޯލްޑިވްސް ވިތް ޒުވާން މަސްވެރިޔާ” ނަމުގައި 2 އަހަރުގެ ދަތުރެއް

ރާއްޖޭގެ މަސްވެރިކަމަށް މިފަހުން އެންމެ ބޮޑު ބަދަލެއް ގެނައުމަށް މަސައްކަތްކުރާ ޒުވާނުންގެ ތެރޭގައި ގއ. ގެމަނަފުށީ، ހަސަން ސާޖިން ހިމެނެއެވެ. އޭނާ އަންނަނީ މަސްވެރިންކަމަކީ ކިޔަވައިގެން ތިބޭ މީހުންނާއި ޒުވާނުންނަށް ވަޒީފާއެއްގެ ގޮތުގައި ނުކުންނަން ކަމުދާ ދާއިރާއެއް ނޫންކަމަށް ދެކޭ މީހުންނާއި އަދި އމަސްވެރިކަމަކީ ‘ހަޑި’ މަސައްކަތެއްގެ ގޮތުގައި ދެކޭ މީހުންވެސް ރައްދުދީ މިއީ ޒުވާނުންކުރަން ރަނގަޅު މަސައްކަތެއްކަން ބުނެދެމުންނެވެ.

ޒުވާން މަސްވެރިޔާގެ ނަމުން މަޝްހޫރުވެފައިވާ ސާޖިން އަންނަނީ ސޯޝަލް މީޑިއާ ޕްލެޓު ފޯމްތައް މެދުވެރިކޮށް ރާއްޖޭގެ މަސްވެރިކަމާއި ގުޅޭ ވީޑިއޯތަކާއި ފޮޓޯތައް ހިއްސާކޮށް މިދާއިރާގައި އުޅޭ މީހުން މަސައްކަތް މުޅި ދުނިޔެއަށް ދައްކާލަމުންނެވެ.

އަނެއްކާވެސް އޭނާ މިވަނީ މުޅިން އައުކަމެއް ތައާރަފްކޮށްފައެވެ. “ޑިސްކަވަރ މޯލްޑިވްސް ވިތް ޒުވާން މަސްވެރިޔާ” ގެ ނަމުގައި މުޅިން އައު ދަތުރެއް ފެށުމައް އޭނާ ވަނީ ތައްޔާރުވެފައެވެ. މިއީ 2 އަހަރުގެ ދަތުރެކެވެ. މި ދަތުރާއި ބެހޭ މައުލޫމާތުދެމުން ޒުވާން މަސްވެރިޔާ ބުނީ މި ދަތުރުގައި ރާއްޖޭގައި މީހުން އުޅޭ ހުރިހައި ރަށަކަށް ޒިޔާރަތްކުރާނެކަމަށެވެ. އަދި ކަނޑު އަޑިންނާއި މަތިންވެސް މުޅި ރާއްޖެ ސޯޝަލް މީޑިއާއަށް ދޫކޮށްލާނެކަމަށް އޭނާ ވިދާޅުވިއެވެ. މިކަމުގައި އެންމެންގެ އެއްބާރުލުން ބޭނުންވާކަމަށް ޒުވާން މަސްވެރިޔާ ވަނީ ބުނެފައެވެ.