ބޮޑެތި ސިޓީތަކުގައި އުޅޭ މީހުންނަށް ނިދަން އުނދަގޫވުމުގެ މައްސަލަތައް އިތުރު

ކިތަންމެ ރަނގަޅަކަށް ނިދާ މީހެއްކަމުގައިވިއަސް އެމީހާ ނިދާ މާހައުލުގެ ގޮތުން ހަމަނިދި ނުލިބިދާނެއެވެ. ބައެއްފަހަރު މާހޫނުގަދަވެ ނުވަތަ މާ ފިނިވެސް ވެދާނެއެވެ. މާހައުލުން އިވޭ އަޑުތަކަކީ ނިދަން އުނދަގޫވާފަދަ ބާރު އަޑުތަކަކަށްވެސް ވެދާނެއެވެ. މިފަދަ މައްސަލަތައް އެންމެ ގިނައިން ދިމާވަނީ ބޮޑެތި ސިޓީތަކުގައި އުޅޭ މީހުންނަށެވެ.

މިކަމާއި ގުޅޭގޮތުން ޗިކާގޯގެ “ނޮދަންވެސްޓް މެމޯރިއަލް ހޮސްޕިޓަލް” ގެ ސްލީފް ސްޕެޝިއަލިސްޓެއްކަމަށްވާ ޑރ. ލިސާ ވޮލްފޭ ވިދާޅުވީ، ބޮޑެތި ސިޓީތަކުގައި ދިރިއުޅޭ މީހުންނަށް އެހެން މީހުންނާއި އަޅާބަލާއިރު ނިދުމުގައި އުނދަގޫތަކެއް ދިމާވާކަމަށެވެ.

advertisement

ޑރ. ވިދާޅުވެފައިވަނީ ބޮޑެތި ސިޓީތަކުގައި ދިރިއުޅޭ މީހުންނަށް ނިދުމަށް އުނދަގޫވާ އެންމެ ބޮޑު އެއް މައްސަލައަކީ ގަދަ އަޑުތަކުގެ ސަބަބުންކަމަށެވެ. އެގޮތުން ހައިވޭއެއް ނުވަތަ ބާރުބޮޑު މަގެއްކައިރީގައި ހުންނަނަމަ އަޑުތައް ގަދަވާކަމަށެވެ. މީގެއިތުރުން ކައިރީގައި އެއަރޕޯޓެއް ހުންނަ ނަމަވެސް އެއަރ ޓްރެފިކްގެ ސަބަބުން މީހާގެ ނިދުމަށް އަސަރުތަކެއް ކޮށްފާނެކަމަށެވެ.

ޑރ. ވިދާޅުވެފައިވަނީ އޭނާގެ ޕޭޝަންޓަކަށް ގަދަ އަޑުތަކުގެ ސަބަބުން އެންމެފަހުން އުޅޭ ސަރަހައްދު ބަދަލުކުރަންވެސް ޖެހިފައިވާކަމަށެވެ.

އެމެރިކަން އެކަޑަމީ އޮފް ސްލީޕް މެޑިސިންއިން ބުނެފައިވަނީ މިފަދަ މައްސަލަތަކަށް ކިޔަނީ “އެންވަޔަރަމަންޓް ސްލީޕް ޑިސްއޯޑަރ” ކަމަށެވެ. މީގެ ސަބަބުން ދިރިއުޅޭ މާހައުގައި ހުންނަ އެކިއެކި ކަންކަމުގެ ސަބަބުން މީހާގެ ނިދި ގެއްލެއެވެ. އޭގެތެތޭގައި އަޑާއި އަދި އަލި ހިމެނެއެވެ.

މިކަމުގެ ސަބަބުން ދުވާލުގެ ވަގުތުގައ ނިދިއައުމާއި، ކަންކަން ކުރާހިތް ނުވުން ފަދަ ކަންކަމާއި ކުރިމަތިލާންޖެހެއެވެ. އޭގެ ސަބަބުން މީހާ ޑިޕްރެޝަންއަށް ދިއުމާއި ވަޒީފާގެ މާހައުލުގައި އެންމެ އެކަށީގެންވާ ގޮތުގައި މަސައްކަތް ނުކުރެވިދާނެއެވެ. ނުނިދުމުގެ މިފަދަ މައްސަލަތަކުގެ ސަބަބުން އުމުރުން ދޮށީ މީހުންނަށް އަސަރުކުރާ މިންވަރު ޒުވާނުންނަށްވުރެ ބޮޑަށް އިތުރުވެއެވެ.

ބޮޑެތި ސިޓީތަކުގައި އުޅޭ މީހުންގެ ބިޒީ ޝެޑިއުލްގެ ސަބަބުންވެސް ބައެއް ފަހަރު ނިދިނުލިބިދާނެކަމަށް ޑޮކްޓަރުން ބުނެއެވެ. އެހެންކަމުން ބޮޑެތި ސިޓީތަކުގައި އުޅޭ މީހުންނަށް ނިދުމަށް ދިމާވާ މިފަދަ މައްސަލަތައް ހައްލުކުރުމަށް ކުރެވިދާނެ ބައެއް ކަންކަމުގެ ތެރޭގައި:

• ގެއަށް ދިއުމުގެ ކުރިން މައްސަލަތަކާއިމެދު ވިސްނާ ހަމަޖެހޭ މޫޑެއްގައި ގެއަށް ދިއުން
• ރޭގަޑުގެ ވަގުތުގައި ދޮރުފޮތި ދަމާ އަލި ނުވަންނާނެ ގޮތަކަށް ބެހެއްޓުން
• މަގުމަތިން އިވޭ އަޑުތައް މަޑުކުރުމަށް ގޭތެރޭގައި އެހެން މަޑު މިއުޒިކެއް ބެހެއްޓުން
• ނިދުމާއި ހޭލުން ވަކި ވަގުތަކަށް ހަމަޖެއްސުން