ޓީޓީއެމްގެ އެއަރލައިން ޕާޓްނަރަކަށް މޯލްޑިވިއަން

މިއަހަރުގެ ޓީޓީއެމް މޯލްޑިވްސްގެ އެއަރލައިން ޕާޓްނަރަކަށް ރާއްޖޭގެ ޤައުމީ އެއަރލައިން މޯލްޑިވިއަން ހަމަޖައްސައިފިއެވެ. ޤައުމީ އެއަރލައިން މޯލްޑިވިއަނުން އަންނަނީ ބައިނަލްއަޤްވާމީ ގިނަ މަންޒިލްތަކަކަށް މިހާރުވެސް ދަތުރުކުރަމުންނެވެ. އޭގެތެރޭގައި އިންޑިއާ، ބަނގްލަދޭޝް، ތައިލޭންޑް އަދި ޗައިނާ ހިމެނެއެވެ.

މޯލްޑިވިއަންއިން އަންނަނީ 16 އެއަރޕޯޓަކަށް އެ އެއަރލައިންގެ ދަތުރުތައް ކުރަމުންނެވެ. މީގެއިތުރުން ރާއްޖޭގެ ރިސޯޓްތަކަށްވެސް އެ އެއަރލައިނުން އަންނަނީ ދަތުރުތައް ބާއްވަމުންނެވެ. މީގެއިތުރުން ޗާޓަރ ދަތުރުތަކާއި، މެޑިކަލް އިވެކުއޭޝަން ފްލައިޓްތަކުގެ އިތުރުން ކާގޯދަތުރުތައްވެސް މޯލްޑިވިއަނުން ބާއްވައެވެ.

advertisement

މިއަހަރުގެ ޓީޓީއެމް މޯލްޑިވްސް އޮންނާނީ ނޮވެމްބަރ މަހުގެ 28 އިން 30 އަށެވެ. މިއަހަރުގެ ޓީޓީއެމްގައި ދާއިރާގެ 300 އަށްވުރެ ގިނަ ފަރާތުން ބައިވެރިވާނެއެވެ. އޭގެތެރޭގައި ސަޕްލަޔަރުންނާއި، ދާއިރާގެ ތަޖުރިބާކާރުން ހިމެނެއެވެ.

ޓީޓީއެމްގެ އެގްޒިބިޓަރުންނަށް ނޮވެމްބަރ މަހުގެ 28 ވަނަ ދުވަހު ބާއްވާ ޓީޓީއެމް ޓްރެވެލް ސަމިޓްގައި ބައިވެރިވެވޭނެއެވެ. ނަމަވެސް ރަޖިސްޓްރީކޮށްފައިވާ އެގްޒިބިޓަރުންނަށް އިތުރު ފުރުސަތުތައް ފަހިވެގެންދާނެއެވެ. އޭގެތެރޭގައި “ކަނެކްޓް” ސޮފްޓްވެއަރއިން ބައްދަލުވުންތައް ކުރިއާލާ ހަމަޖައްސާލެވުން ހިމެނެއެވެ. މީގެއިތުރުން ޓީޓީއެމް އެވޯޑާއި ގާލާ އިވެންޓްގައި ބައިވެރިވުމުގެ ފުރުސަތުވެސް ރަޖިސްޓްރީކުރާ އެގްޒިބިޓަރުންނަށް ލިބިގެންދާނެއެވެ.

މިއަހަރުގެ ޓީޓީއެމް ފެއަރ ކުރިއަށްދާނީ ކޯވިޑް19 އިން ރައްކާތެރިވުމަށް ކަމާބެހޭ އިދާރާތަކުން އަޅާފައިވާ ރައްކާތެރިކަމުގެ ފިޔަވަޅުތަކާއި އެއްގޮތަށެވެ. މެޑްޓެކްއިން އިވެންޓަށް ޒިޔާރަތްކުރާ ފަރާތްތަކުގެ ކޯވިޑް ޓެސްޓް ކުރެވޭނެ އިންތިޒާމްވެސް ވަނީ ހަމަޖައްސާފައެވެ.

ޓީޓީއެމް މޯލްޑިވްސްއަކީ ރާއްޖޭގައި ބާއްވާ އެންމެ ބޮޑު ޓްރެވެލް ޓްރޭޑް ޝޯއެވެ. މި އިވެންޓް ބާއްވާތާ މިހާރު ވަނީ 4 އަހަރުވެފައެވެ. މިދިޔަ އަހަރު ކޯވިޑް19 އާއި ގުޅިގެން މި އިވެންޓް ބާއްވާފައިވަނީ އޮންލައިންކޮށެވެ. މިދިޔަ އަހަރުގެ އިވެންޓްގައި “ޓީޓީއެމް ކަނެކްޓް” މެދުވެރިކޮށް 500 އަށްވުރެ ގިނަ ފަރާތުން ވަނީ ބައިވެރިވެފައެވެ. މިއަހަރު ބާއްވަނީ ޓީޓީއެމްގެ 5 ވަނަ އެޑިޝަނެވެ.