އައިޖީއެމްއެޗް ސައިކޭޓްރީ ޑިޕާޓްމަންޓުގެ ވެއިޓިންގ ލިސްޓްގައި 2500 އަށްވުރެ ގިނަ ރައްޔިތުން

އައިޖީއެމްއެޗް ސައިކޭޓްރީ ޑިޕާޓްމަންޓުގައި ޑޮކްޓަރުންނަށް ދެއްކުމަށް ވެއިޓިންގ ލިސްޓްގައި 2500 އަށްވުރެ ގިނަ ރައްޔިތުން މިހާރުވެސް ނަންނޯޓުކޮށްފައިވާކަމަށް އައިޖީއެމްއެޗް ޑޮކްޓަރސް އެޕޮއިންޓްމަންޓް ޑިޕާޓްމަންޓުން މަޢުލޫމާތު ދެއްވައިފިއެވެ. ސައިކޭޓްރީ ޑިޕާޓްމަންޓުގައި ޚިދުމަތްދިނުމަށް މިވަގުތު ތިއްބެވީ އެންމެ 5 ޑޮކްޓަރުންނެވެ. އައިޖީއެމްއެޗް ޑޮކްޓަރސް އެޕޮއިންޓްމަންޓް ޑިޕާޓްމަންޓުން މަޢުލޫމާތު ދެއްވިގޮތުގައި ސައިކޭޓްރީ ޑިޕާޓްމަންޓުގައި ޑޮކްޓަރުންނަށް ދެއްކުމަށް ވެއިޓިންގ ލިސްޓްގައި މިހާރުވެސް 2529 މީހުން އެބަތިއްބެވެ. މިހުރިހާ ރައްޔިތުންނަށް ހިދުމަތް ދިނުމަށް އެންމެ މަދުވެގެން އެއް އަހަރު ދުވަސް ނަގާނެއެވެ.

ޑޮކްޓަރަށް ދެއްކުމަށް މިހާބޮޑު ވެއިޓިން ލިސްޓެއް އޮތުމަކީ ކަންބޮޑުވާންޖެހޭ ކަމެކެވެ. މިހާބޮޑު ކިއުއެއްގައި މަޑުކޮށް ޑޮކްޓަރާއި ހަމައަށް ދިއުމުގެ ކުރިން މީހާގެ ބަލި އިހު ހުރިވަރަށްވުރެ ބޮޑުވެގެންދާނެއެވެ. މިކަމާއި ގުޅިގެން ގިނަ އަދަދެއްގެ އާންމުން ދަނީ މީސްމީޑިއާގައި ހިތްހަމަނުޖެހުން ހިއްސާކުރައްވަމުންނެވެ.

advertisement

މިއީ ހަމައެކަނި ސައިކޭޓްރީ ޑިޕާޓްމަންޓެވެ. އެހެން ޑިޕާޓްމަންޓްތަކުގެ ހާލަތަކީވެސް މިއީއެވެ. ޑޮކްޓަރުގެ އެޕޮއިންޓްމަންޓްތަކުގެ ވެއިޓިން ލިސްޓުތައް 1000 އިން މައްޗެވެ.

ރާއްޖޭގެ އެކި ކަންކޮޅުތަކުގައި ހުރި ހޮސްޕިޓަލްތަކަށް ސަރުކާރުން މިއަހަރުން 3.2 ބިލިއަން ރުފިޔާ ޙަރަދުކުރުމަށް ވަނީ ނިންމަވާފައެވެ. އަދި އައިޖީއެމްއެޗް އަށް މިދިޔަ އަހަރުވެސް 1.1 ބިލިއަނަށްވުރެ ގިނަ ފައިސާވަނީ ޙަރަދު ކޮށްފައެވެ. އަދި މިއަހަރުގެ ބަޖެޓުގައިވެސް ބިލިއަނެއް ވަނީ ޙަރަދުކުރުމަށް ނިންމަވާފައެވެ.

ކޮވިޑްގެ ތެރޭގައިވެސް ރައްޔިތުންގެ ޓެކްސް ފައިސާއިން 145 މިލިއަނަށް ވުރެ ގިނަ ފައިސާވަނީ އައިޖީއެމްއެޗް އަށް ހަރަދުކުރެވިފައެވެ. ފާހަގަކޮށްލަންޖެހޭ ކަމަކީ އައިޖީއެމްއެޗް ހިންގަނީ މާލޭ ހޮސްޕިޓަލް ބޯޑު އޮފް ޓްރަސްޓީސްގެ ދަށުން ހެލްތް މިނިސްޓްރީގެ އެއްވެސް ރޯލެއްނެތި ސީދާ ރައީސް އޮފީހުގެ ބެލުމުންގެ ދަށުންނެވެ. އަދި ރައީސް އޮފީހުގެ މިނިސްޓަރ އަލީ ޝިޔާމް ވިލަރެސްކުރައްވާގޮތަށް އައިޖީއެމްއެޗްގެ ސީއީއޯ އިބްރާހީމް ސަލީމް (ބަންދު ސަލީމް) ގެ ބެލުމުގެ ދަށުންނެވެ.

ސިއްހީ ފަރުވާއަށް ކޮންމެ އަހަރެއްގެ ބަޖެޓްގައި ބޮޑު އަދަދެއް ކަނޑައަޅާފައިވާއިރު މިއީ އާންމު ރައްޔިތު މީހާއަށް ހައްޤުވާ މިންވަރުތޯ މިއީ ކުރެވޭ ސުވާލެކެވެ. ޑޮކްޓަރަށް ދެއްކުމަށް ވެއިޓިން ލިސްޓުގައި އަހަރަކަށްވުރެ ގިނަ ދުވަސް ހޭދަކުރަން ޖެހުމަކީ ހަމަ އެންމެ ހައްޤު މިންވަރުބާވައެވެ.