ދޭންވީ ރީހެބިލިޓޭޝަންތަ ނޫނީ އަދަބު އެކަނިތަ؟

މީހަކު ޖަލަށް ލުމުގެ އެންމެ ބޮޑު ބޭނުމަކީ އެމީހަކު ކުރި ކުށަކީ އަދަބު ހައްޤު ކުށެއްކަން އޭނާއަށް ބުނެދީ ރަނގަޅު ވުމަށް މަގުފަހިކޮށްދިނުމެވެ. ޖަލުގައި އަދަބު ދިނުމުގެ އެންމެ ބޮޑު ބޭނުމަކީ އޭނާ ކުރި ކުށަކީ ކޮށްގެންވާނެ ކަމެއް ނޫންކަން ބުނެދީ މުސްތަޤްބަލުގައި އެކަން ނުކުރުމަށް މަގުފަހިކުރުމެވެ. ނަމަވެސް ޖަލުތަކުގައި މިކަން އެންމެ އެދެވޭ ގޮތުގައި ހާސިލްވޭތޯ މިއީ ކުރެވޭ ސުވާލެކެވެ.

ސައިކޮލޮޖިސްޓުން ބުނާގޮތުން ޖަލުތަކުގައި ހާލަތައް ބަލާއިރު މިހާރު ޖަލުން ނިކުންނަ މީހުންނަށްވުރެ ޖަލުތަކަށް އަންނަ މީހުންގެ އަދަދު ވަނީ އިތުރެވެ. 1970 ގެ އަހަރުތަކުގައި ޖަލުތައް ބައްޓަން ކުރެވިފައިވަނީ ކުއްކުރާ މީހުން މަދުކޮށް އެމީހުން އަލުން މުޖްތަމައުތަކަށް ރަނގަޅު މީހުންގެ ގޮތުގައި ނެރުމަށެވެ.

advertisement

ޖަލުތަކަށް ދާމީހުންނަށް ރިހެބިލިޓޭޝަންގެ ފުރުސަތު ދެނީވެސް އެމީހުން އަނބުރާ މުޖްތަމައުއަށް ގެނައުމަށެވެ. ނަމަވެސް ރިހެބިލިޓޭޝަންއަށްވުރެ ބޮޑަށް އަދަބުދޭތަން ފެނިގެންދެއެވެ. އަދަބު ދިނުމަށްވުރެ ރިހެބިލިޓޭޓް ކުރުމުން މީހާ މުޖްތަމައުއަށް ނެރެވޭލެއް ފަސޭހަވެގެންދެއެވެ.

އަދަބު ދިނުމުގެ ބަދަލުގައި ރިލެބިލިޓޭޓް ކުރަންވީ ސަބަބުތަކުގެ ތެރޭގައި ރިހެބިލިޓޭޓް ކުރުމުން މީހާ މުޖްތަމައަށް ރަނގަޅު މީހެއްގެ ގޮތުގައި ނުކުތުމުގެ ފުރުސަތު ބޮޑުވެގެންދެއެވެ. ތަފާތު ކުއްކުރާ މީހުންނަށް ތަފާތު ރިހެބިލިޓޭޝަން ޕްރޮގްރާމްތައް ހިންގެއެވެ. އޭގެތެރޭގައި މަސްތުވާތަކެތީގެ ވަބާގައި ޖެހިފައިވާ މީހުންނާއި، އެހެން ކުއްތަކަށް ތަފާތު ރިހެބިލިޓޭޓް ޕްރޮގްރާމް ހުރެއެވެ. ނަމަވެސް އަދަބު ދިނުމުގައި ވަކި ތަފާތެއް ނުހުރެއެވެ. އަދަބު ދިނުމަށް ޖަލުގައި ބެހެއްޓުމަށްވުރެ މީހާ ރިހެބިލިޓޭޓްކޮށް ރަނގަޅު މީހެއްގެ ގޮތުގައި މުޖުތަމައުއަށް ނެރުމުން މިކަމުގައި ހަރަދުވެސް ކުޑަވެގެންދެއެވެ.

އެހެންކަމުން ޖަލުތަކުގައި ކުއްވެރިންނަށް އަދަބު ދިނުމުގެ ބަދަލުގައި ބަލަންވީ ރިހެބިލިޓޭޓްކޮށްގެން އަވަހަށް މުޖްތަމައުއަށް ނެރެވޭތޯއެވެ.