ވަޒީފާއަށް ދިޔަސް ނުދިޔަސް އަންހެން ދަރީންނަށް ރަނގަޅު ތައުލީމެއް ދިނުން މުހިއްމު

އަންހެން ކުދިން ތައުލީމު ހާސިލްކުރުމާއިމެދު ކުރީޒަމާނުގައި ބައެއް މީހުން ދެކޮޅޭވެ. ނަމަވެސް ހޭލުންތެރިކަން އިތުރުވެ މިހާރު އަންހެން ކުދިން ތައުލީމު ހާސިލްކުރުމަކީ މުހިންމު ކަމެއްކަމަށް ގިނަ ބަޔަކު ދެކެއެވެ. މީގެ ސަބަބުތައްވެސް ބައިވަރެވެ. މި ރިޕޯޓުގައި މި ބަލާލަނީ އަންހެން ކުދިން ތައުލީމު ހާސިލްކުރުން މުހިންމުވާ ބައެއް ސަބަބުތަކެވެ.

• ތައުލީމު ހާސިލްކޮށްފައިވާ އާބާދީ އިތުރުވުން

މުޅި ދުނިޔޭގައިވެސް ތައުލީމު ހާސިލްނުކުރާ މީހުންގެ އަދަދު 163 މިލިއަނަށް އަރައެވެ. މީގެތެރެއިން %63 އަކީ އަންހެނުންނެވެ. ނަމަވެސް އަންހެނުން ތައުލީމު ހާސިލްކުރާނަމަ މި އަދަދު ދަށްކުރެވޭނެއެވެ.

advertisement

• އިންސާނީ ވަގުފާރީގެ މައްސަލަތައް މަދުވުން

އިންސާނީ ވަގުފާރީގެ މައްސަލަތައް އަންހެނުން ތައުލީމު ހާސިލްނުކޮށް ފަޤީރުކަމުގައި އުޅޭނަމަ އިތުރުވެގެންދެއެވެ. ނަމަވެސް ގިނަ ބަޔަކު ތައުލީމު ހާސިލްކޮށް މުޖްތަމައު ހޭލުންތެރިވެފައިވާނަމަ މިފަދަ މައްސަލަތައް ކުރިމަތިވާލެއް މަދުވާނެއެވެ.

• ސިޔާސީ ކަންކަމުގައި އަންހެނުންގެ ބައިވެރިވުން އިތުރުވުން

ސިޔާސީ ކަންކަމުގައި އަންހެނުންގެ ބައިވެރިވުން ބޭނުންވެއެވެ. އަންހެނުންނަކީ ސިޔާސީ ކަންކަން ނިންމުމުގައި ވޯޓު ދިނުމުގެ ހައްޤުވެސް ލިބިފައިވާ ބައެކެވެ. ނަމަވެސް އަންހެނުން ތައުލީމު ހާސިލްކޮށްފައި ނެތްނަމަ މިފަދަ ކަންކަމުގައި ބައިވެރިވެ އެމީހުންގެ އަޑު އުފުލުމަށް ގޮންޖެހުމަކަށް ވެގެންދާނެއެވެ. އެހެންކަމުން ސިޔާސީ މައިދާނުގައި އަންހެނުންގެ ބައިވެރިވުން އިތުރުކުރުމަށް އަންހެނުން ތައުލީމު ހާސިލްކުރުން މުހިންމެވެ.

• ދަރިންނަށް ގިނަ ފައިދާތަކެއް ކުރޭ

ތައުލީމު ހާސިލްނުކުރާ މައިންނަށްވުރެ ތައުލީމު ހާސިލްކޮށްފައިވާ މައިންގެ ދަރިންނަށް ލިބޭ ފައިދާތައް ގިނައެވެ. ތައުލީމު ހާސިލްކުރުމުގެ ސަބަބުން ގިނަ ކަންކަމަށް ލޯހުޅުވި ދަރިން ރަނގަޅު ގޮތުގައި ތަރުބިއްޔަތުކުރުމަށް މަގުފަހިވެގެންދެއެވެ.

• ޅައުމުރުގައި ކުރާ ކައިވެނިތައް މަދުވުން

ޔޫއެން ޕޮޕިއުލޭޝަން ފަންޑުން ބުނާގޮތުން އަންހެންކުދިން ތައުލީމު ހާސިލްނުކުރާ ސަރަހައްދުތަކުގައި ކޮންމެ 3 އަންހެން ކުއްޖަކުން 1 އަންހެން ކުދިން 18 އަހަރު ވުމުގެ ކުރިން ކައިވެނި ކުރެއެވެ. ނަމަވެސް ތައުލީމު ހާސިލްކުރާ އަންހެން ކުދިން ކައިވެނިކުރާ ތާރީހު 4 އަހަރު ފަސްވެގެންދެއެވެ. ރަނގަޅު ތައުލީމަކާއި ނުލައި ކައިވެނި ކުރުމުގެ ސަބަބުން ކައިވެންޏަށްފަހު އަންނަ މައްސަލަތައް ހައްލުކުރަން ނޭންގި ކައިވެނި ރޫޅުން ގިނަވެގެންދެއެވެ.

• އާއިލާ ރޭވުމުގައި ފަސޭހަވުން

ތައުލީމު ހާސިލްކުރާ އަންހެނުން ދަރިން ހޯދުމުގައި މާބޮޑަށްވެސް ރޭވުންތެރިއެވެ. މާލީގައި ސެކަންޑްރީ ތައުލީމު ހާސިލްކޮށްފައިވާ އަންހެނުން އާންމު ގޮތެއްގައި ހޯދަނީ 3 ކުދިންނެވެ. ނަމަވެސް ތައުލީމެއް ނެތް އަންހެނުން 7 ދަރިން ހޯދާކަމަށް ތަފާސްހިސާބުތަކުން ދައްކައެވެ.

• ބޮޑު އާމްދަނީއެއް ލިބުން

ތައުލީމު ހާސިލްކުރުމުގެ ސަބަބުން ރަނގަޅު ވަޒީފާތަކުގައި އުޅުމުގެ ފުރުސަތު ފަހިވެގެންދެއެވެ. މީގެ ސަބަބުން ލިބޭ އާމްދަނީ އިތުރުވެ އަންހެނުންގެ ފުދުންތެރިކަން އިތުރުވެއެވެ.

މިހުރިހައި ސަބަބަކަށްޓަކައި އަންހެނުންނާއި އަންހެންކުދިން ތައުލީމު ހާސިލްކުރުމަށް ބާރުއަޅަންޖެހެއެވެ. އެއީ މުޅި މުޖްތަމައުއަށް އޭގެ ފައިދާ ކުރާތީއެވެ. ރާއްޖޭގެ މަތީ ތައުލީމު ހާސިލްކުރާ ޔުނިވަރސިޓީތަކަށް ބަލާއިރު ފިރެހެން ކުދިންނަށްވުރެ ގިނައީ އަންހެން ކުދިންނެވެ.