ދިވެހި ސަރުކާރުން އަފްޣާނިސްތާނު ރައްޔިތުންގެ ރައްކާތެރިކަން ކަށަވަރުކުރުމަށް ކުރެވެންހުރި ކަންކަން ކުރަންވާނެ: އެޗްއާރުސީއެމް

އަފްޣާނިސްތާނު ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ކުރެވެންހުރި އެންމެހައި ކަންކަން ކުރުމަށް އެޗްއާރުސީއެމްއިން ދިވެހި ސަރުކާރުގައި އެދިއްޖެއެވެ.

އެޗްއާއުސީއެމްއިން ނެރެފައިވާ ބަޔާނެއްގައި ބުނެފައިވަނީ އަފްޣާނިސްތާނުގެ އިންސާނީ ހައްޤުތަކާބެހޭ މުއައްސަސާތަކުގެ މުއައްޒަފުންނާއި އެފަރާތްތަކުގެ އާއިލާތަކާއި އެ ޤައުމުގެ ކުޑަކުދިންނާއި އަންހެނުންނާއި އާންމު ރައްޔިތުންގެ އިތުރަށް އެގައުމުގައި ދިރިއުޅެމުންދާ އެންމެހައި ދިވެހި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ދިވެހި ސަރުކާރުން ކޮށްދެވެންހުރި އެންމެހައި މަސައްކަތްތަކެއް ކޮށްދެއްވައި އިންސާނީ ހައްޤުތައް ނަގަހައްޓައި ރައްކާތެރިކުރުމަށް މަސައްކަތް ކޮށްދެއްވުމަށް ރައީސުލްޖުމްހޫރިއްޔާ އަލްފާޟިލް އިބްރާހިމް މުޙައްމަދު ޞާލިޙާއި، ފޮރިން މިނިސްޓަރ އަލްފާޟިލް އަބްދުﷲ ޝާހިދުގެ އަރިހުން އެދޭކަމަށެވެ.

advertisement

ކޮމިޝަނުން މިކަމަށް އެދިފައިވަނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި، ފޮރިން މިނިސްޓަރ އަލްފާޟިލް އަބްދު ޝާހިދަށް، ކޮމިޝަނުން ވަކި ވަކިން ފޮނުއްވި ސިޓީގައެވެ. އަފްޣާނިސްތާނުގެ މިވަގުތުގެ ޙާލަތާގުޅިގެން ކޮމިޝަނުގެ ގިނަ ކަންބޮޑުވުންތަކެއް ހުރިކަން ފާހަގަކޮށް، އަފްޣާނިސްތާނުގެ ޙާލަތާ ގުޅިގެން ދިވެހި ސަރުކާރުގެ ފަރާތުން އިންސާނީ ޙައްޤުތައް ރައްކާތެރިކޮށް ކުރިއެރުވުމަށް ކުރައްވާ މަސައްކަތްތަކުގައި ވެދެއްވެންއޮތް  އެހީތެރިކަމާއި ފުރިހަމަ އެއްބާރުލުން ފޯރުކޮށްދިނުމަށް ކޮމިޝަނުން ސަރުކާރާއެކު ތިބިކަން ވަނީ ހާމަކޮށްފައެވެ.

އަފްޣާނިސްތާނާއި ދިވެހިރާއްޖެއަކީވެސް އޭޝިއާ ޕެސިފިކް ފޯރަމް (އޭ.ޑީ.އެފް)ގެ މެންބަރުންނަށްވާއިރު އަފްޣާނިސްތާނަށް މިވަގުތު ދިމާވެފައިވާ ޙައްސާސީ ހާލަތުގައި، ޠާލިބާނުން ޢަމަލުކޮށްފާނެ ގޮތަކާމެދު އޭ.ޑީ.އެފްއިން ވަނީ ކަންބޮޑުވުން ފާޅުކޮށްފައެވެ.