ޑިމޮކްރަސީ ދެމެހެއްޓުމަށް ނޫސްވެރިންނަށް ފުރިހަމަ މިނިވަންކަން ލިބެންޖެހޭ

ރާއްޖޭގައި މަސައްކަތްކުރާ ނޫސްވެރިންގެ ތެރެއިން %54 ނޫސްވެރިންނަށް މަރުގެ އިންޒާރު އަންނަކަމަށް ނޫސްވެރިން ވަނީ ބުނެފައެވެ. ނަމަވެސް ނޫސްވެރިކަމަކީ ޤައުމުގެ 4 ވަނަ ބާރެވެ. ހިޔާލު ފާޅުކުރުމުގެ މިނިވަންކަމަކީ ދިވެހިރާއްޖޭގެ ޤާނޫނު އަސާސީންވެސް ކަށަވަރުކޮށްދީފައިވާ ހައްޤެކެވެ.

ދިވެހި ނޫސްވެރިންނަށް ދިމާވާ ފުރައްސާރައާއި ބިރުދެއްކުމުގެ އަމަލުތައް ގިނަކަމަށާއި ނަމަވެސް މިފަދަ މައްސަލަތައް ރިޕޯޓް ނުކުރަނީ ފުލުހުންގެ މައްޗަށް އިތުބާރު ނެތުމުންކަމަށް މޯލްޑިވްސް ޖާނަލިސްޓް އެސޯސިއޭޝަނުން ދާދިފަހުން ވަނީ ބުނެފައެވެ.

advertisement

އެ އެސޯސިއޭޝަނުން އެކުލަވާލި “ޗޭސިންގް ޖަސްޓިސް” ރިޕޯޓުގައި ބުނެފައިވަނީ ރާއްޖޭގެ 60 އިންސައްތަ ނޫސްވެރިންނަށް އޮންލައިން ފުރައްސާރަޔާ ކުރިމަތިލާން ޖެހެއެވެ.

މި ރިޕޯޓުގައި ބުނެފައިވަނީ ފަސް ނޫސްވެރިންގެ ތެރެއިން ކޮންމެ ތިން ނޫސްވެރިއަކީ އޮންލައިން ފުރައްސާރަޔާ ކުރިމަތިލާން ޖެހިފައިތިބި މީހުން ކަމަށެވެ. އަދި ފަސް ނޫސްވެރިންގެ ތެރެއިން ކޮންމެ ދެ ނޫސްވެރިއަކަށް ސޯޝަލް މީޑިއާ ނުވަތަ އޮންލައިން ނޫން ގޮތްގޮތަށް ފުރައްސަރަޔާ ކުރިމަތިލާންޖެހޭ ކަމަށް އެމްޖޭއޭގެ ރިޕޯޓުގައި ބުނެފައިވެއެވެ.

މިފަދަ މައްސަލަތައް ރިޕޯޓް ނުކުރަނީ ފުލުހުންގެ މައްޗަށް އިތުބާރު ނެތުމުންކަމަށް ނޫސްވެރިން ވަނީ ބުނެފައެވެ. %39 ނޫސްވެރިން ބުނަނީ މައްސަލައެއް ތަހުގީގުކުރި ނަމަވެސް ކުށްކުރާ ފަރާތް އިންސާފުގެ ކުރިމައްޗަށް ނާންނާނެކަމަށެވެ. އަދި %41 ނޫސްވެރިން ބުނެފައިވަނީ ނޫސްވެރިންނާއި ދެކޮޅަށް ކުރާ ކުއްތައް ފުލުހުން ސީރިއަސްކޮށް ނުބަލާކަމަށެވެ.

އެމްޖޭއޭ ރިޕޯޓުގައި ބުނެފައިވަނީ ދެ އަހަރުގެ ތެރޭގައި އޮންލައިން ފުރައްސާރަޔާ ކުރިމަތިލާން ޖެހުނު ނޫސްވެރިންގެ ތެރެއިން 21 އިންސައްތަ ނޫސްވެރިންނަށް އެއްފަހަރު ނުވަތަ ދެފަހަރު އެގޮތަށް ފުރައްސާރަޔާ ކުރިމަތިލާން ޖެހުނު ކަމަށެވެ. އަދި 39 ޕަސަންޓު ނޫސްވެރިންނަށް އޮންލައިންކޮށް ދެފަހަރަށް ވުރެ ގިނަ ފަހަރު ފުރައްސާރަޔާ ކުރިމަތި ލާން ޖެހުނު ކަން އެމްޖޭއޭގެ ރިޕޯޓުގައި ވަނީ ފާހަގަކޮށްފައެވެ.

ނޫސްވެރިންނަށް މިފަދަ ގޮންޖެހުންތަކެއް ކުރިމަތިލާން ޖެހިފައިވާއިރު މިއީ އެމީހުންނަށް މިނިވަންކަމާއިއެކު ޙިޔާލު ފާޅުކުރުމަށް އެޅިގެންދާ ހުރަހެކެވެ. އެހެންކަމުން ޤާނޫނު އަސާސީން ކަށަވަރުކޮށްދީފައިވާ ޚިޔާލުފާޅުކުރުމުގެ މިނިވަންކަން ނޫސްވެރިންނަށް އޮންނަންޖެހެއެވެ.