“އޮޓާކޫ ޝޮޕް”: “އެނިމޭ” މާރޗެންޑައިޒްއަށް ދިވެހިންގެ ތެރޭގައި އޮތް ޑިމާންޑް

އޮންލައިން ވިޔަފާރިއަކީ މިހާރު ރާއްޖޭގައި ފުޅާ ދާއިރާއެއްގައި ކުރިއަރަމުން އަންނަ ވިޔަފާރިއެކެވެ. މި ވިޔަފާރީގެ ތެރެއަށް ގިނަ ބަޔަކު މިހާރު ވަނީ ވަދެފައެވެ. ވިޔަފާރިން ލިބޭ ނަފާ އިތުރުވުމަކީ ވިޔަފާރިކުރާ މީހުންގެ އަދަދު އިތުރު ސަބަބެކެވެ.

އއ. އުކުޅަސް، މުހައްމަދު ނާހިލް އަކީވެސް އޮންލައިން ވިޔަފާރީގައި ހަރަކާތްތެރިވަމުން އަންނަ ފަރާތެކެވެ. އޭނާ އަންނަނީ އޮޓަކޫ ޝޮޕް އެމްވީގެ ނަމުގައި އިންސްޓަގްރާމްގައި ޕޭޖެއް ހިންގަމުންނެވެ. މި ޕޭޖް މެދުވެރިކޮށް އެނިމޭޓެޑް އެއްޗެހިއްސާއި، ޑިޒައިން ޓީޝާޓް އަންނަނީ ވިއްކަމުންނެވެ.

advertisement

މިއީ ވަރަށް ޒުވާން ވިޔަފާރިއެކެވެ. މި ވިޔަފާރި ނާހިލް ފެށީތާ އަދިވީ މަސްދުވަހެވެ. ނަމަވެސް މި ވިޔަފާރީގެ ނަފާ ރަނގަޅުކަމަށް އޭނާ ބުނެއެވެ. އެގޮތުން ފުރަތަމަ މަހުވެސް އޭނާއަށް އާމްދަނީގެ ގޮތުގައި ވަނީ 12،000 ރުފިޔާ ލިބިފައެވެ.

މި ވިޔަފާރި ނާހިލް ކުރަމުން އަންނަނީ އޭނާގެ ބޭބެއާއި އާއިލާގެ އެހީތެރިކަމާއިއެކުގައެވެ. ނާހިލްއަކީ އަބަދުވެސް މިކަހަލަ އޮންލައިން ވިޔަފާރިއެއް ފަށަން ބޭނުންވެފައި ހުރި ކުއްޖެކެވެ.

ނާހިލް ބުނީ އެނިމޭޓެކް ސްޓިކަލް ފަދަ އެއްޗިއްސަށް އޮންނަ ތަރުހީބު ރާއްޖޭގައި ބޮޑުކަމަށެވެ. އަދި އެމީހުން ވިއްކާ ޓީޝާޗްތަކައްވެސް ޑިމާންޑް ބޮޑުކަމަށެވެ. އެތަނުން ވިއްކާ ޓީޝާޓްތަކަކީވެސް ވަރަށް އަރާމު ލައިގެން އުޅެން ފަސޭހަ ޓީޝާޓްތަކެއްކަމަށް އޭނާ ބުންޏެވެ. ހާއްސަކޮށް އެތަނުން ވިއްކާ އެނިމޭޓެޑް ސްޓިކަރއަށް ކުޑަކުދިންގެ މެދުގައި މަޤްބޫލުކަން އިތުރެވެ.

ނާހިލްގެ ވިސްނުން މިހާރު ހުރީ ވިޔަފާރި ފުޅާކޮށް ކޮންމެވެސް ދުވަހެއްގައި މާލޭގައި ފިހާރައެއް ހުޅުވުމަށެވެ.