ޚާއްސަ ޝަރުތުތަކަކާއިއެކު ތާލިބާން ސަރުކާރު ރާއްޖެއިން ބަލައިގަންނަންވާނެ: ދިރާސާ

ޠާލިބާން ޖަމާޢަތާއިއެކު ދިވެހި ސަރުކާރުން މަސައްކަތްކުރުމާއި ގުޅޭގޮތުން އާންމުންގެ ޚިޔާލު ހޯދުމަށް އެމްވީ ޕްލަސް ޕަބްލިކް އޮޕީނިއަންއިން ވަނީ ޙާއްސަ ޕޯލްއެއް ކުރިއަށްގެންގޮސްފައެވެ. މި ޕޯލްއިން ދައްކާގޮތުން ގިނަ ބަޔަކު ބުނެފައިވަނީ ޚާއްސަ ޝަރުތުތަކަކާއިއެކު އެ ޖަމާއަތާއިއެކު މަސައްކަތްކުރަން ފެންނަކަމަށެވެ. މިގޮތައް ފެންނަކަމަށް ވޯޓުދީފައިވަނީ ވޯޓުގައި ބައިވެރިވި މީހުންގެ %50 އެވެ.

އެއްވެސް ގޮތަކަށް އެ ޖަމާއަތާއިއެކު މަސައްކަތްކުރަން ނުފެންނަ ކަމަށް ބުނެފައިވަނީ ވޯޓުގައި ބައިވެރިވި %34.62 މީހުންނެވެ. އަދި %15.38 މީހުން ބުނެފައިވަނީ އެއްވެސް ޝަރުތަކާއިނުލާ އެ ޖަމާއަތާއިއެކު ސަރުކާރުން މަސައްކަތްކުރަން ބޭނުންވާކަމަށެވެ.

advertisement

އަފްޣާނިސްތާނުގެ ވެރިކަމަށް ޠާލިބާން ޖަމާޢަތުން އައިސްފައިވަނީ މިދިޔަ މަހުގެ ތެރޭގައެވެ. އަފްޣާނިސްތާނުގެ މަތީ މަޤާމުތަކަށް ޠާލިބާނުންގެ އިސްވެރިންވެސް މިހާރު ވަނީ ޢައްޔަންކޮށްފައެވެ. އޮގަސްޓު މަހުގެ 15ވަނަ ދުވަހު ޠާލިބާނުންގެ ބާރުގެ ދަށަށް އަފްޣާނިސްތާނުގެ ވެރިރަށް ކާބުލް ގެންދިޔުމުން އެ ޤައުމުގެ ރައީސް އަޝްރަފް ޣަނީއާއި އޭނާގެ ސަރުކާރުގައި ހިމެނޭ ގިނަ ޢަދަދެއްގެ އިސްވެރިންވަނީ ޤައުމު ދޫކޮށް ވަޑައިގެންފައެވެ. އެއަށްފަހު ޠާލިބާނުންވަނީ އަފްޣާނިސްތާނުގެ އަމީރުގެ މަޤާމަށް މުއްލާ ޢަބްދުލް ޣަނީ ބަރާދަރު ޢައްޔަންކޮށްފައެވެ. އޭނާއަކީ އެ ޖަމާއަތުގެ ދެވަނައަށް އެންމެ އިސްވެރިޔާއެވެ.