މަގުމަތީގައި ހަޑިހުތުރު ބަސްބޭނުންކުރުން ހުއްޓާލަންޖެހޭ

މަގުމައްޗަކީ އެންމެން ބޭނުންކުރާތަނެކެވެ. އެހެންކަމުން މަގުމަތީގެ އަދަބުތަކެއްވެސް ހުރެއެވެ. މަގުމަތީގެ އަދަބުތަކަށް އިހްތިރާމް ކުރުމަކީ ކޮންމެހެން ކުރަންޖެހޭކަމެކެވެ. ނަމަވެސް މިހާރު ބައެއް ފަރާތްތަކުން މަގުމަތީގެ އަދަބުތަކަށް އިހްތިރާމްކުރާ ތަނެއް ފެނިގެނެއް ނުދެއެވެ.

މަގުމައްޗަކީ ހުރިހައި އުމުރެއްގެ މީހުން ބޭނުންކުރާ ތަނަކަށް ވުމުގެ ސަބަބުން ބަސްމަގު ބޭނުންކުރުމުގައި ހަޑިހުތުރު ބަހުން ވާހަކަނުދެއްކުމަށް ސަމާލުކަންދޭންޖެއެވެ. ނަމަވެސް ބައެއް ޒުވާން ކުދިން މަގުމަތީގައި އުޅޭއިރު ހިތުހުރި ބަހަކުން ވާހަކަދައްކާތަން ފެނިގެންދެއެވެ. މިއީ ވަރަށް ދަށު ދަރަޖައިގެ އަމަލެކެވެ.

advertisement

ކުޑަކުދިންނަކީ ވަރަށް އަވަހަށް ކަންކަން ދަސްކުރާ ބަޔަކަށް ވުމުގެ ސަބަބުން މި ބަސްތައް މަގުމަތީގައި އުޅޭ ކުޑަ ކުދިންނަށް އަޑުއިވުމުގެ ސަބަބުން އެކުދިން މިފަދަ ބަސްތައް ބޭނުންކުރަން ދަސްކުރެއެވެ. އަދި ބައެއް ކުދިން ބެލެނިވެރިންނަށްވެސް މިކަންކަމާއި ގުޅޭގޮތުން ސުވާލުކޮށް ހަދައެވެ. އަދި ބައެއް ފަހަރު މިގޮތައް އަޑިއިވޭ ބަސްތައް ގޭތެރެއާއި ސްކޫލް މާހައުލުގައިވެސް ބޭނުންކުރެއެވެ. މަގުމަތިން އަޑުއިވޭ ނޭދެވޭ ބަސްތަކުގެ ސަބަބުން ކުޑަކުދިންގެ ތަރުބިއްތަކަށް ނޭދެވޭ އަސަރުކުރެއެވެ.

އެހެންކަމުން މަގުމަތީގައި އުޅޭއިރު ކޮންމެ މީހަކުވެސް ވިސްނަންވީ މިއީ ތިމާ އެކަނި ބޭނުންކުރާތަނެއް ނޫންކަމެވެ. އެހެންކަމުން މަގުމަތީގައި އުޅޭ އެހެންމީހުންނަށް ތިމާގެ ސަބަބުން އުނދަގޫ ނުވާނެފަދަ ގޮތަކަށް ތިމާގެ އަމަލްތައް ބެހެއްޓުމަށެވެ. އަދި މަގުމަތީގެ އަދަބުތަކަށް އިހްތިރާމު ކުރުމަށެވެ.