ލާމަރުކަޒީ ނިޒާމް ގެނަޔަސް ރަށުތެރޭ މީހުންގެ ބަހެއް އަދިވެސް ނުވިކޭ

ރާއްޖޭގެ އިޤްތިޞާދުގައި އެންމެ މުހިންމު ސިނާއަތަކީ ފަތުރުވެރިކަމެވެ. ކޯވިޑް19 އާއިއެކު މިކަން ވަރަށް ބޮޑަށްވެސް އަޅުގަނޑުމެންނަށް އިނގި ހާމަވެގެންދިޔައެވެ. ރާއްޖެއަންނަ ފަތުރުވެރިންގެ އަދަދުތައް ދަށްވުމާއިއެކު މިކަމުގެ އަސަރު ރާއްޖެއަށް ކުރިއެވެ. އެހެންކަމުން ސަރުކާރުގެ ވިސްނުމަކަށްވީ ވީހާވެސް އަވަހަކަށް ރާއްޖެގެ ފަތުރުވެރިކަން ފެށޭނެ ގޮތެއް ފަހިކުރުމެވެ.

ކޮންމެ ސަރުކާރަކުންވެސް ރާއްޖޭގެ ފަތުރުވެރިކަން ކުރިއެރުވުމަށް ގިނަ މަސައްކަތްތަކެއް ކުރެއެވެ. ރަށްތަކާއި ފަޅުތައް ފަތުރުވެރިކަމަށް ބޮޑުއަގުގައި ހުޅުވާލައެވެ. މިދިޔަ ސަރުކާރުންވެސް އަދި މި ސަރުކާރުންވެސް ފެނިގެންދިޔައީ ފަތުރުވެރިކަމަށް މުޅިން އަލަށް ރަށްރަށާއި ފަޅުތައް ހުޅުވާލިތަނެވެ.

advertisement

މިކަމާއި ގުޅިގެން ގިނަ ފަރާތްތަކުން ކަންބޮޑުވުންވެސް ފާޅުކުރިއެވެ. ރާއްޖޭގެ ހުރިހައި ރަށަކާއި ފަޅެއް ފަތުރުވެރިކަމަށް ދޫކުރުމުން ދެން މީހުން ދިރިއުޅެނީ ކޮންތަނެއްގައިތޯއެވެ. އަދި ރަށްރަށާއި ކައިރީގައި ހުރި ފަޅުރައްތައް ފަތުރުވެރިކަމަށް ދޫކުރުމުގެ ސަބަބުން އެރަށްރަށުގެ މީހުން ޕިކްނިކް ގޮސްލާ މަޖާކޮށްލާނެ ތަނެއް ނޯންނާނެ ކަމުގެ ޝަކުވާވެސް ގިނަބަޔަކު ކުރިއެވެ.

މިފަހުންވެސް ދިމާވެގެން މިއުޅެނީ މިކަހަލަ ކަމެކެވެ. ހއ. ފިއްލަދޫގެ ބައެއްގެ ގޮތުގައި ކަނޑައަޅާފައިވާ ދައްޕަރުގެ މައްސަލައެވެ. ހއ. ފިއްލަދޫގެ ބައެއް ކަމަށްވާ ދައްޕަރު އެ ރަށުގެ އިހްތިސާސުން ވަކިކުރަން ރައީސުލްޖުމްހޫރިއްޔާގެ ގަރާރަކުން މިހާރު ވަނީ ނިންމަވާފައެވެ. މިއީ ލާމަރުކަޒީ ގާނޫނުގެ ދަށުން ރަށްތަކުގެ އިހްތިސާސް ކަނޑައެޅުމަށް ރައީސަށް އޮންނަ ބާރުގެ ދަށުން ނިންމެވި ނިންމެވުމެކެވެ.

ދައްޕަރު ފިއްލަދޫގެ އިހްތިސާސުން ނަގާފައިވަނީ އެރަށުގައި ރިސޯޓެއް ތަރައްޤީކުރުމަށެވެ. ދައްޕަރަކީ ކުރީގެ ސަރުކާރުތަކުގައި ވެސް ރިޒޯޓު ތަރައްގީކުރަން ކަނޑައެޅި ސަރަހައްދެކެވެ.

އަދި ފަހުން މި ސަރުކާރުގައި ވެސް އެ އެތަން ރިޒޯޓު ތަރައްގީކުރަން ދޫކުރަން ނިންމި ނަމަވެސް އެތަން ފިއްލަދޫގެ އިހްތިސާސްގެ ތެރޭގައި ހިމެނީ ވެސް ރައީސް އިބްރާހިމް މުހައްމަދު ސޯލިހުގެ ގަރާރަކުން، މިދިޔަ އަހަރުގެ މާޗް މަހު އެވެ. ނަމަވެސް މިހާރު އަނެއްކާވެސް މިވަނީ ދައްޕަރު ފިއްލަދޫގެ އިހްތިސާސުން ނަގާފައެވެ.

ލާމަރުކަޒީ ނިޒާމްގެ ބޭނުމަކީ މައިސަރުކާރަށް ބަރޯސާވުމެއް ނެތި ކަންކަން ނިންމާ ހިންގުމުގެ ބާރު ރައްޔިތުންނަށް އޮތުމެވެ. މާލޭ އޮފީހުގައި އިންނަ ސަރުކާރުގެ ބޮޑަކަށް ފިއްލަދޫގެ ދައްޕަރުން ނަފާހޯދާނެގޮތެއް ނޭންގޭނެއެވެ. އެކަން އެނގޭނީ އެ ރަށުގައި އުޅެ ބޮޑުވި އަދި ދިރިއުޅެމުންދާ ރައްޔިތުންނަށެވެ.

މިކަމާއި ގުޅިގެން އެރަށުގެ ރައްޔިތުންގެ ކަންބޮޑުތައްވެސް ގިނައެވެ. އެރަށުގެ ކައުންސިލުން ވިދާޅުވީ، ސަރުކާރުން އެ ނިންމެވުން ނިންމެވި އިރު ރަށުގެ ކައުންސިލާ މަޝްވަރާ ނުކުރާ ކަމަށެވެ. އެތަން އަތުލި އިރު ކައުންސިލުން ގެންދިޔައީ އެތަނުން މަންފާ ލިބޭނެ ގޮތްތަކެއް ހޯދައި ރަށުގެ ލޭންޑް ޔޫސް ޕްލޭން އެކުލަވާލުމުގެ މަސައްކަތް ކުރަމުންކަމަށްވެސް ކައުންސިލުން ވަނީ ބުނެފައެވެ.

ތެދެކެވެ. ރާއްޖޭގެ އިޤްތިޞާދުގައި ފަތުރުވެރިކަމަކީ ވަރަށް މުހިންމު ސިނާއަތެކެވެ. ނަމަވެސް ކޮންމެ ރަށެއްގައި އަދި ފަޅެއްގައި ރިސޯޓެއް ތަރައްޤީކުރުމަކީ އެންމެ އެދެވޭގޮތެއްނޫނެވެ. މި ވިސްނުމަކީ ދޫކޮށްލަންޖެހޭ ވިސްނުމެއްވެސް މެއެވެ.