ތާރީހަށް ބަލާލިނަމަވެސް ރާއްޖޭގައި ކުޑަކުދިންނާ ބެހުމުގެ “ސަގާފަތެއް” އޮވޭ

ރާއްޖޭގެ ތާރީހަށް ބަލާލިނަމަވެސް ރާއްޖޭގައި ކުޑަކުދިންނާ ބެހުމުގެ ސަގާފަތެއް އޮތްކަން ފެނިގެންދާނެއެވެ. ދިރާސާތަކުން ދައްކާ ގޮތުގައި ރާއްޖޭގެ 12 ޕަސެންޓު އަންހެނުންނަށް އުމުރުން ފަސް އަހަރު ފުރުމުގެ ކުރިން ޖިންސީ ގޯނާކޮށްފައިވެ އެވެ. ޖުމްލަކޮށް ބަލާނަމަ އެއީ ކޮންމެ ތިން އަންހެނަކުން އެކަކެވެ. އަދި ފިރިހެނުންގެ ތެރެއިން 20 ޕަސެންޓު މީހުންނަށް ޅަ އުމުރުގައި ހުރީ ޖިންސީ ގޯނާކޮށްފަ އެވެ.

ރާއްޖޭގައި ކުޑަކުދިންނަށް ކުރާ އަނިޔާތަށް ބެލުމަށް ޔުނިސެފުން 2009 ވަނަ އަހަރު ކުރި ދިރާސާއަކުން ދައްކާ ގޮތުގައި ސެކަންޑަރީ ސްކޫލުގައި ކިޔަވާ ކުދިންގެ ތެރެއިން ކޮންމެ ހަތް ކުއްޖަކުން އެއް ކުއްޖަކު ހުރީ ގަދަކަމުން ބެހިފަ އެވެ. އެ ދިރާސާއިން ދައްކާ ގޮތުގައި އެންމެ ގިނައީ ކުޑަ އަންހެން ކުދިންނަށް ކުރާ ޖިންސީ ގޯނާ އެވެ.

advertisement

ރާއްޖޭގެ އަންހުންގެ ސިއްހަތު ދަނެގަތުމަށް 2016 ވަނަ އަހަރު ޔޫއެންއެފްޕީއޭ އިން ކުރި ދިރާސާއަކުން ދައްކާ ގޮތުގައި ކުޑަކުދިންނާ އެންމެ ގިނައިން ބެހެނީ އެމީހުން ގާތް ތިމާގެ މީހުންނެވެ. އެގޮތުން އެންމެ ގިނަ ފަހަރު ޖިންސީ ގޯނާ ކޮށްފައި ހުންނަނީ އާއިލާގެ ފިރިހެން މެމްބަރެކެވެ. ދެން އެންމެ ގިނައިން ބެހެނީ ދަންނަ ފިރިހެނުންނާއި ނުދަންނަ ފިރިހެނުންނެވެ.

މިހުރިހައި ތަފާސްހިސާބަކުން މިހެން ދައްކާއިރު ރާއްޖޭގައި ކުޑަކުދިންނަށް ބެހުމުގެ ސަޤާފަތެއް އޮތްކަން ހާމަވެގެންދެއެވެ. މިފަދަ އަނިޔާއެއް ލިބުމަކީ އޭގެ ގެއްލުން އެތައް ޖީލަކަށް ދެމިގެންދާކަމެކެވެ. މިފަދަ އަނިޔާތައް ލިބުމުން ނަފްސާނީ މައްސަލަތަކާއި ޖިސްމާނީ މައްސަލަތައްވެސް އެ ކުއްޖަކަށް ދިމާވެއެވެ. އެކަމަކު ރާއްޖޭގައި އެކަންކަމަށް ފަރުވާ ލިބިފައި ހުންނަ މިންވަރު މަދު ކަމަށް ތަޖުރިބާކާރުން ދެކެ އެވެ. ޖިންސީ ގޯނާ ލިބިފައިވާ ކުދިންނަށް ޑިޕްރެޝަން ނުވަތަ އެންޒައިޓީ ފަދަ ކަންކަން ކުރިމަތިވުން ގާތެވެ.

ކުޑަކުދިންނަށް ލިބޭ ޖިންސީ ގޯނާގެ މިފަދަ މައްސަލަތައް ދެނެގަތުމަށް މައިންބަފައިން ދަރިފުޅާ ގާތްގުޅުމެއް ބޭއްވުން ވަރަށް މުހިންމެވެ. އަބަދުވެސް ތެދު ހެދުމަށް ކުއްޖާއަށް ބާރުއަޅަންވާނެ އެވެ. އެއިރުން ގޯސް ކަމެއް ދިމާވި ނަމަވެސް ހަގީގަތާ އެއްގޮތަށް އެކަމެއް ކިޔައިދޭން ކުއްޖާއަށް އެނގޭނެ އެވެ. މީގެއިތުރުން ހަށިގަނޑުގެ ބައިތައް އެހެން މީހަކު އަތްލާޏް ނުޖެހޭނެ ތަންތަން ކަމަށް ކުއްޖާއަށް ކިޔައިދޭންޖެހެ އެވެ. އަދި ގެއަށް އަންނަ މީހުން، ތަންތަނުން ބައްދަލުވާ މީހުންނާމެދު ސަމާލުވާންޖެހެއެވެ.