ދަރިން ޒިންމާދާރުކުުރުވުމަށް ކުރެވިދާނެ ކަންތައްތަކެއް

ދަރިފުޅު ކުޅޭ ސާމާނު އަބަދު ގޭތެރެއަށް އުކާލާފައި ހުރޭހެއްޔެވެ؟ ތަންތަން ތަރުތީބުކޮށް ވަރުބަލިވޭހެއްޔެވެ؟ ދަރިފުޅުގެ އަމިއްލަ ކަންކަން ދަރިފުޅު ކުރުމަށް ތަރުބިއްޔަތުކޮށްދިނުމަކީ އޭގެ ސަބަބުން ބެލެނިވެރިޔާއަށްވެސް ފަސޭހަވެ ކުއްޖާ ބޮޑުވެގެންއަންނަ އިރު އޭނާއަށް ޒިންމާނަގަން ދަސްވެގެންދާނެކަމެކެވެ. މި އާޓިކަލްގައި މި ހިއްސާކޮށްލަނީ ދަރިފުޅުގެ އަމިއްލަ ތަކެއްޗަށް ޒިންމާ ނަގަން ދަރިފުޅަށް ދަސްކޮށްދޭނެ ބައެއް ގޮތްތަކެވެ.

ދަރިފުޅަށް މާގިނަ ތަކެތި ގަނެނުދީ

advertisement

ތިމާ ދަރިފުޅަށް ގަނެދޭ ތަކެއްޗާއިމެދު ވިސްނާލާށެވެ. ދަރިފުޅު ބޭނުންވިއަސް ކޮންމެ އެއްޗެއް ގަނެނުދޭށެވެ. މަދު ތަކެތި ގަނެދިނުމުގެ ސަބަބުން އެތަކެއްޗަށް އޮންނަ ލޯބި އިތުރުވެ އަމިއްލައަށް އެތަކެއްޗަށް ޒިންމާ ނަގަން ދަރިފުޅަށް ދަސްވެގެންދާނެއެވެ.

ދަރިފުޅަށް ތަކެތި ގަނެދިނުމަށް އުސޫލެއް ކަނޑައެޅުން

ދަރިފުޅަށް ތަކެތި ގަނެދިނުމުގައި ވަކި ޙާއްސަ އުސޫލެއް ކަނޑައެޅިދާނެއެވެ. މިސާލަކަށް ވަކި ޙާއްސަ މުނާސަބަތަކާއި ނުވަތަ ދުވަހަކާއި ގުޅުވައިގެން ތަކެތި ގަނެވިދާނެއެވެ. މީގެ ސަބަބުން ކޮންމެ ދުވަހަކު ތަކެތި ގަތުމުގެ ބަދަލުގައި އެކުދިން ގެންގުޅޭ މަދު ކުޅޭ ސާމާނަށް އޮންނަ ލޯތްބާއި އެތަކެތި ރައްކާތެރިކަމާއިއެކު ބެލެހެއްޓުމަށް ދަރިފުޅު ތަރުބިއްޔަތު ވެގެންދާނެއެވެ. އަދި އެތަކެތި ގަންނަން ޖެހެނީ އެކުދިންގެ ސޭވިންއިން ކަމަށްވެސް ކަނޑައެޅިދާނެއެވެ. މީގެ ސަބަބުން އަމިއްލަ ޒިންމާ ނަގައި ބޭކާރު ހަރަދުކުރުމާއި ކުދިން ދުރުވާނެއެވެ.

ކޮލެޓީ ރަނގަޅު ތަކެތި ގަތުން

ރަނގަޅު ކޮލެޓީގެ މަދު ތަކެތި ގަތުމަކީ ދަށް ކޮލެޓީގެ ގިނަ ތަކެތި ގަތުމަށްވުރެ މުހިންމު ކަމެކެވެ. އަގުޑޮޑުވި ނަމަވެސް ރަނގަޅު ކޮލެޓީގެ ތަކެތި ގަތުމަށް އިސްކަންދޭށެވެ. ރަނގަޅު ކޮލެޓީގެ އަގުބޮޑު ތަކެތި މަދުން ގަތުމުން ދަރިފުޅަށް އެ ބުނެދެވެނީ އެއީ އަގުބޮޑު ތަކެތިކަމާއި ރައްކާތެރިކަމާއި އެކު އެތަކެތި ބެލެހެއްޓުމަށެވެ.

ތަކެތި ބަހައްޓަން ވަކި ތަނެއް ކަނޑައެޅުން

ދަރިފުޅުގެ ތަކެތި ބަހައްޓަން ވަކި ތަނެއް ކަނޑައަޅާށެވެ. އެއިރުން އެތަކެތި ހުންނާނީ އެތަނުގައިކަން ދަރިފުޅަށް ޔަޤީންވާނެއެވެ. އަދި ބޭނުންކުރުމަށްފަހު އަލުން އެތަނުގައި އެތަކެތި ބެހެއްޓުމަށް ދަރިފުޅަށް އާދަވާނެއެވެ.

އޮގަނައިޒް ކުރުމުގެ ރޫޓީންއެއް ކަނޑައެޅުން

ހަފްތާގެ ކޮންމެވެސް އެއް ދުވަހެއް ނުވަތަ ދުވާލުގެ ކޮންމެވެސް އެއް ގަޑިއެއް ސާފުކުރުމާއި ތަކެތި އޮގަނައިޒްކުރުމަށް ކަނޑައަޅާށެވެ. މިކަން ބެލެނިވެރިޔާއާއި ދަރިފުޅާ އެކުގައިވެސް ކުރެވިދާނެއެވެ. މީގެ ސަބަބުން ތަކެތި ހުންނަންވާނީ އަބަދުވެސް ތަރުތީބުންކަން ދަރިފުޅަށް ބުނެދެވޭނެއެވެ.

ބެލެނިވެރިޔާ ފުރަތަމަ ނަމޫނާ ދައްކާ

ދަރިފުޅަށް ޒިންމާދާރުވާން ބުނެދޭއިރު ފުރަތަމަ ބެލެނިވެރިޔާވެސް ވާންވާނީ ޒިންމާދާރު މީހަކަށެވެ. އެހެންކަމުން މިވެނި އެވެނި ކަމެއް ކުރަން ދަރިފުޅު ކައިރީގައި ބުނުމުގެ ބަދަލުގައި ފުރަތަމަ އެކަން ބެލެނިވެރިޔާކޮށް ދަރިފުޅަށް ނަމޫނާ ދައްކާށެވެ. އެއިރުން ދަރިފުޅު އެކަން ކުރާލެއް އަވަސްވާނެއެވެ.