ހައްދެއްގެ ދަށުން ކޮފީ ބޯނަމަ ހަށިގަނޑަށް އެތަށް ފައިދާތަކެއް

ކޮފީ ބުއިމުގެ ޓްރެންޑެއް މިހާރު ވަނީ ރާއްޖޭގައި އުފަންވެފައެވެ. ކޮފީ ތައްޓެއް ބޮއެނުލައިފިނަމަ ދުވަސް އުޖާލާ ނުވާ މީހުން ވަރަށް ގިނައެވެ. ކޮފީއަކީ ގެއްލުން ލިބޭ ބުއިމެއްކަމަށް ބައެއް މީހުން ބުނެއެވެ. ބޯންވާވަރަށްވުރެ އިތުރަށް ބުއިމުން ހަށިގަނޑަށް ގެއްލުންތަކެއް ލިބުނު ނަމަވެސް ކޮފީއަކީ ހަށިގަނޑަށް ފައިދާ ކުރާ އެއްޗެއްކަން މިހާރު ވަނީ ހާމަވެފައެވެ.

ކޮފީގެ މިންވަރެއް ގަވާއިދުން ކޮންމެ ދުވަހަކު ބޯ މީހާ އަށް ހިތުގެ މައްސަލަތައް ދިމާވާ ނިސްބަތް ދަށްކޮށްލެވޭނެ ކަމަށް ސިއްހީ ހުރިހާ ތަޖުރިބާކާރުން ބުނެ އެވެ. މިކަން ބެލުމަށް ހިންގާފައިވާ ދިރާސާތަކުން އެނގިފައި ވަނީ ދުވާލެއްގެ މައްޗަށް ތިން ތައްޓާއި ފަސް ތަށީގެ ކޮފީ ގަވާއިދުން ބޯ މީހާ ހިތުގެ ބަލިތަކުން ސަލާމަތްވުމުގެ ފުރުސަތު ވަރަށް ބޮޑު ކަމަށެވެ. ނަމަވެސް ކޮންމެ ދުވަހަކު ފަސް ތައްޓަށް ވުރެ ގިނައިން ކޮފީ ބޯ ނަމަ ނަތީޖާ އަނެއްކޮޅަށް ނުކުތުމުގެ ބިރު ވެސް އެބައޮތެވެ.

advertisement

ގަވާއިދުން ކޮފީ ބޯ މީހުންނާއި އެއްގޮތަކަށް ވެސް ކޮފީ ނުބޯ މީހުން އެއްކޮށްގެން ކުރިއަށް ގެންގޮސްފައިވާ ދިރާސާތަކުން އެނގިފައިވާ ގޮތުން އެއްވެސް ވަރަކަށް ކޮފީ ނުބޯ މީހާ އަށް ސްޓްރޯކެއް ޖެހުމަށް އޮންނަ ފުރުސަތަށް ވުރެ، ގަވާއިދުން ކޮފީ ބޯ މީހާ އަށް ސްޓްރޯކެއް ޖެހުމުގެ ފުރުސަތު ދަށްވާކަމަށެވެ.

ދިރާސާތަކުން އެނގިފައިވާ ގޮތުން ކޮފީބޯނަމަ ހަކުރު ބަލީގެ ނުރައްކާވެސް ކުޑައެވެ. ދުވާލެއްގެ މައްޗަށް ކެފިނޭޓެޑް ނުވަތަ ޑީކެފިނޭޓެޑް ކޮފީގެ ހަ ތަށި ނުވަތަ ހަތް ތަށި ގަވާއިދުން ބޯ މީހާ އަށް ޓައިޕް 2 ޑައިބެޓީސްގެ ނުރައްކާ ތިން ގުނަ އަށް ކުޑަކޮށްދޭކަމަށް ދިރާސާއަކުން ވަނީ ދައްކާފައެވެ. ސައިންސްވެރިން ބުނަނީ ދުވާލެއްގެ މައްޗަށް ދެ ތަށި ކޮފީ ގަވާއިދުން ބޯ މީހާ އަށް ފުރަމޭގެ ކެންސަރު ޖެހުމުގެ ބިރު 40 ޕަސެންޓަށް ދަށްކޮށްދޭ ކަމަށެވެ. މީގެ އިތުރުން އުރަމަތީގެ ކެންސަރާއި ޕްރޮސްޓޭޓް ކެންސަރާ ދެކޮޅަށް ވެސް ކޮފީ ރަނގަޅު ކަމަށް ބުނެވެ އެވެ. އަދި ދުންފަތުގެ އިސްތިއުމާލު ކުރުމުގެ ސަބަބުން ފުއްޕާމެ އަށް ގެއްލުން ލިބިފައިވާ މީހާ ފުއްޕާމޭގެ ކެންސަރުން ސަލާމަތްކުރުމުގައި ވެސް ކޮފީގެ ދައުރު ބޮޑު ކަމަށް ސައިންސް ހެކިވެ އެވެ.

މާޔޫސް ވުމާއި ޑިޕްރެޝަން ފަދަ ނަފުސާނީ ބަލިތައް ކޮފީގެ ސަބަބުން ދުރުކޮށްދެއެވެ. ދުވާލެއްގެ މައްޗަށް 3-4 ތަށި ކޮފީ ބޯނަމަ، މޫޑު ރަނގަޅުވެ، ހެލިފެލިވެ އުޅުމަށް އެހީތެރިވެދެއެވެ. ނަމަވެސް ޑިޕްރެޝަން ފަދަ ބައްޔަކަށް ބޭސްކުރާ މީހެއް ނަމަ، ކޮފީ ބޯ މިންވަރު އިތުރުވިޔަ ނުދީ ވަކި ލިމިޓެއްގައި އަބަދުވެސް ހިފެހެއްޓުމަށް ސަމާލުކަން ދޭން ވާނެއެވެ.

މިހުރިހައި ފައިދާތަކަކާއިއެކު ކޮފީއަކީ ނުބޮއެ ދޫކޮށްލެވޭވަރު އެއްޗެއް ނޫނެވެ. ނަމަވެސް ވިސްނަންވީ ކޮފީއަކީވެސް ވަކި ހައްދެއްގެ ދަށުން ބޯންޖެހޭ އެއްޗެއްކަމެވެ. އޭގެ ހައްދުން ނައްޓާލައިފިނަމަ މިކަމުން ގެއްލުންތަކެއް ލިބިގެން ހިނގައިދާނެއެވެ. ބައެއް މީހުންނަށް ކޮފީއާއިނުލާ ނޫޅެވުނު ނަމަވެސް އެއްވެސް ވަރަކަށް ކޮފީ ނުބޯ މީހުންވެސް އަހަރެމެންގެ ތެރޭގައި އެބައުޅެއެވެ.