ދިވެހި ޓީޗަރެއް ނަމޫނާދައްކާ، ބޭރު ގައުމެއްގެ އެވޯޑެއްގެ ރަނަރއަޕްއަށް

ބިލަބޮންގް ހައި އިންޓަނޭޝަނަލް ސްކޫލުގެ ޓީޗަރ މަރިޔަމް އިނާޝާ ރަފީއު ގަދަ ދިހައިން ޖާގަހޯދައި، މިއަހަރުގެ ލައިޓްހައުސް ލާނިން އެޑިޔުކޭޓަރ އިމްޕެކްޓް އެވޯރޑްގެ ރަނަރއަޕްކަން ހޯދައިފިއެވެ. ލައިޓްހައުސް ލާނިން އެޑިޔުކޭޓަރ އިމްޕެކްޓް އެވޯރޑަކީ  އިންޑިޔާގެ ލީޑިން އެޑިޔުކޭޝަން ކުންފުންޏެއް ކަމަށްވާ ލައިޓްހައުސް ލާނިން ގެ ފަރާތުން ބޭއްވާ އެވޯޑެކެވެ. މިއަހަރުގެ އެވޯޑްގައި 1،242 އަށްވުރެ ގިނަ އިންޓަނޭޝަނަލް ސްކޫލުގައި ކިޔަވައިދެމުން އަންނަ ގިނަ މުދައްރިސުން ވަނީ ވާދަކޮށްފައެވެ.

 ލައިޓްހައުސް ލާނިން އެޑިޔުކޭޓަރ އިމްޕެކްޓް އެވޯރޑަކީ، މުދައްރިސެއްގެ ހައިސިއްޔަތުން ދަރިވަރުންނާއި، މުޖުތަމައަށް ޚިދުމަތްކުރުމުގައި އާދަޔާޚިލާފު މޮޅު މަސައްކަތްތަކެއް ކުރަމުން އަންނަ މުދައްރިސުންގެ އަގުވަޒަންކޮށް އެފަދަ މުދައްރިސުންނަށް ހައްޤު ޝަރަފުދިނުމަށްޓަކައި އިންޑިޔާގެ ލައިޓްހައުސް ލާނިން ގެ ފަރާތުން ދޭ އެވޯޑެކެވެ. މިގޮތުން މިއަހަރުގެ އެވޯޑް ލިބޭ ފަރާތްތައް ހޮވާފައިވަނީވެސް މުދައްރިސެއްގެ ޒިންމާ އަދާކުރުމުގައި ލާމަސީލު ދަރަޖައަކަށް މަސައްކަތްކޮށްފައިވާ މިންވަރު ޚާއްސަ ކްރައިޓީރިއާއެއްގެ ދަށުން ބަލާ ވަޒަންކުރުމަށްފަހު، ޝޯޓްލިސްޓްވާ މުދައްރިސުންނަށް ލައިޓްހައުސް ލާނިންގެ ޖަޖުންގެ ޕެނަލަކުން ބޭއްވި އިންޓަވިއު މަރުހަލާއަކަށްފަހުއެވެ. މިގޮތުން ޓޮޕް ޓެން އެޑިޔުކޭޓަރުން ހޮވުމަށްފަހު، އޭގެތެރެއިން ޝަރަފުވެރި 1ވަނަ، 2ވަނަ އަދި 3ވަނަ ހޮވާ އެފަރާތްތަކަށް ފައިސާގެ އިނާމް ހުށަހަޅާފައިވެއެވެ.

advertisement

އިނާ ވިދާޅުވިގޮތުގައި ބައިނަލްއަޤްވާމީ ޕްލެޓްފޯމެއްގައި އެހާ ގިނައަދަދެއްގެ މުދައްރިސުންނާއި ވާދަކޮށް މިފަދަ ޝަރަފެއް ލިބުމަކީ ވަރަށް އުފާ ކުރާ ކަމެކެވެ. “އެންމެ ބޮޑަށް ހިތްހަމަޖެހެނީ ޕެންޑެމިކްގެ ތެރޭގައި އަޅުގަނޑަށް ސްކޫލުގެ ފަރާތުން ދަސްވި ކިޔަވައިދިނުމުގެ އިތުރު އުކުޅުތަކާއި ވަސީލަތްތައް ބޭނުން ކޮށްގެން ގޭތެރޭގައި ބަންދުވެފަ ތިބި ދަރިވަރުންނާއި ޓީޗަރުންނަށް އެހީ ފޯރުކޮއްދެވުނީމަ. އަދި ބޭރުގެ ފަރާތަކުން އަޅުގަނޑުމެން ޓީޗަރުންކުރާ މަސައްކަތް ބަލައިގަނެ ފާހަގަ ކުރި  ކުރުމަކީވެސް ވަރަށް އުފާވިކަމެއް ” އިނާ ވިދާޅުވިއެވެ.

އިނާގެ އިތުރުން ބިލަބޮންގް ހައި އިންޓަނޭޝަނަލް ސްކޫލުގައި ކޯޑިނޭޓަރެއްގެ ގޮތުގައި މަސައްކަތްކުރަމުން އަންނަ ފާތިމަތު އަޙްމަދު (ފާތުން މިސް) ވެސް ވަނީ ލައިޓްހައުސް ލާނިން އެޑިޔުކޭޓަރ އިމްޕެކްޓް އެވޯރޑްގެ ގަދަ ދިހައެއްގައި ހިމެނިފައެވެ.

މިއަހަރުގެ ލާނިން އެޑިޔުކޭޓަރ އިމްޕެކްޓް އެވޯރޑްގައި އޭޝިޔާސަރަހައްދުގައި މަޝްހޫރު ބައެއް އިންޓަނޭޝަނަލް ސްކޫލް ބްރޭންޑްތައްކަމަށްވާ ޔޫރޯ ކިޑްސް އިންޓަނޭޝަނަލް، ބިލަބޮންގް ހައި އަދި ކެންގަރޫކިޑްސް ހިމެނެއެވެ.