ހެނދުނު ނާސްތާ ނަގައިގެން ދާކުދިންނަށް ކިޔެވުމަށް ސަމާލުކަން ދެވޭނެ މިންވަރު އިތުރު

ހެނދުނުގެ ނާސްތާއަކީ ދުވަހުގެ އެންމެ މުހިންމު އެއް ކެއުމެވެ. މިއީ ގިނަވަގުތު ނުކައި ހުރުމަށްފަހު އެންމެ ފުރަތަމަ ކެއުންވެސް ވެއެވެ. ރޭގަނޑުގެ ނިންޖަށްފަހު 8 ނުވަތަ 10 ގަޑިއިރު ފަހުން ކާއިރު ކޮންމެ ދުވަހެއްގެ ހެނދުނުގެ ނާސްތާ ރަނގަޅަށް ނެގުމަކީ ހަށިގަނޑަށް އަދި ދުވަހުގެ ކުރިއަށް ހުރި ކަންކަން ކާމިޔާބުވުމަށް އެޅޭ މުހިންމު ފިޔަވަޅެކެވެ.

ނަމަވެސް ގިނަ ސްކޫލްކުދިން ސްކޫލަށް ދާއިރު ހެނދުނުގެ ނާސްތާ ނުނަގާކަން ފާހަގަކޮށްލެވެއެވެ. ނަމަވެސް ސްކޫލް ކުދިންނަށްވެސް ސްކޫލަށް ދިއުމުގެ ކުރިން ރަނގަޅު ނާސްތާއެއް ނަގަން ކުދިންނަށް އާދަކޮށްދޭންޖެހެއެވެ.

advertisement

ސްކޫލް ކުދިންނަށް ހެނދުނުގެ ނާސްތާ މުހިންމު ވަނީ ކީތްވެ ހެއްޔެވެ؟ ހެނދުނުގެ ނާސްތާއިން ދުވަސް ފުރިހަމަކުރަން ބޭނުންވާ ގިނަ މާއްދާތަކެއް ހަށިގަނޑަށް ލިބެއެވެ. އޭގެތެރޭގައި އަޔަން، ކެލްސިއަމް، ވިޓަމިން ބީ އަދި ވިޓަމިން ސީ ލިބެއެވެ. މިއީ ހަޑިގަނޑު ހެދިބޮޑުވުމަށާއި ރަނގަޅު ސިއްހަތެއްގައި ހުރުމަށް ވަރަށް މުހިންމު މާއްދާތަކެވެ. ހެނދުނުގެ ނާސްތާ ނުނަގާނަމަ ކޮންމެ ދުވަހެއްގެ ކެއުމުން އެކުއްޖަކަށް ހަށިގަނޑު ހެދިބޮޑުވުމަށް ލިބިދޭންޖެހޭ ވަރަށް މުހިންމު މާއްދާތަކެއް އެދަނީ މިސްވެގެންނެވެ.

ގަވައިދުން ހެނދުނުގެ ނާސްތާ ނަގާކުދިން ފަލަވުމުންވެސް ދުރުކޮށްދެއެވެ. މީގެ ސަބަބަކީ ހެނދުނުގެ ނާސްތާ ނުނަގާނަމަ ދުވަހުގެ އެހެން ވަގުތުތަކުގައި މާގިނައިން ކެއުމުގެ ސަބަބުން ބަރުދަން އިތުރުވުމަށް މަގުފަހިވުމެވެ.

ހެނދުނުގެ ނާސްތާ ނަގައިގެން ސްކޫލަށްދާ ކުދިންނާ ނާސްތާ ނުނަގާ ކުދިންނާއި އަޅަބަލާއިރު ކިޔެވުމުގައިވެސް ކާމިޔާބެވެ. ސަބަބަކީ ނާސްތާ ނަގައިގެން ދާކުދިންނަށް ކިޔެވުމަށް ސަމާލުކަން ދެވޭނެ މިންވަރު އިތުރުވެ ތޫނުފިލިކަން އިތުރުވެގެންދާތީއެވެ.