އުނގެނުމުގެ ހައްޤުން ކުއްޖާ މަހުރޫމްވުމަކީ ބަލައިގަނެވޭނެކަމެއްނޫން: ކުދިންނާއި ޓީޗަރުންގެ ބުލީކުރުމުގެ ޝިކާރައަކަށްވީ ކުއްޖެއްގެ ވާހަކަ

ސްކޫލްގެ މާހައުލަކީ ގިނަ ކުދިންނަށް އުފާވެރި މާހައުލެކެވެ. ގިނަ އައު ރަހުމަތްތެރިންތަކަކާއި ދިމާވެ އެކުދިންގެ ދިރިއުޅުމުގެ މުހިންމު ބަޔަކަށް މި ރަހުމަތްތެރިވެގެންދެއެވެ. އަދި މުދަރިއްސުންނަކީ ދަރިވަރުންގެ 2 ވަނަ މައިންބަފައިންނެވެ. އެއީ ކުދިންގެ ދިރިއުޅުމުގައި ނުހަނު މުހިންމު ބަޔަކަށް ވަނީ ވެފައެވެ. މިއީ ގިނަފަހަރު ކަންކަން ވެގެންދާގޮތެވެ. ނަމަވެސް ބައެއް ފަހަރު މިއާއި ހިލާފަށްވެސް ކަންކަން ހިނގާފައި އެބަހުއްޓެވެ. ސްކޫލް މާހައުލަކީ ކުއްޖާއަށް ބިރުވެރި އަދި ދުވަހަކުވެސް ހަނދާނުން ފިލުވާލަން ދަތި ދުވަސްތަކަކަށްވެސްވެފައި އެބަހުއްޓެވެ.

ނަމަވެސް އުމުރުން 13 އަހަރުގެ ކުއްޖަކަށް ސްކޫލްގެ ދިރިއުޅުން ވެފައިވީ ވަރަށް ބިރުވެރި މާހައުލަކަށެވެ. އޭނާއަށް ސްކޫލްގެ ޓީޗަރުންނާއި ކުދިން ވަނީ ބުލީކޮށްފައެވެ. މީގެ ސަބަބުން މިހާރު އޭނާ ސްކޫލަށް ދާކަށް ބޭނުމެއްނުވެއެވެ. މިހާރު އޭނާ އަންނަނީ ހޯމްސްކޫލިންގ ހަދަމުންނެވެ.

advertisement

“އޭނާގެ ނެތް ސްކޫލަށް ދާނެ ހިތްވަރެއް. އޭނައަކީ ވަރަށް ބޮޑަށް އެންޒައިޓީ ހުންނަ ކުއްޖެއް. ޑޮކްޓަރަށް ދެއްކީމައި އޭނާ ޑައިގްނޯޒްކުރީ ސިވިއަރ ސޯސިއަލް އެންޒައިޓީ، ޑިޕްރެޝަން އަދި ސުއިސައިޑަލް ތޯޓްސް ހުންނަކަމަށް.” އަޙްމަދުގެ މަންނަ ބުންޏެވެ.

އަނބުރާ ސްކޫލަށް ދާންޖެހިދާނެކަމުގެ ބިރުވެރިކަން މިހާރުވެސް އޭނާގެ އޮވެއެވެ. އަދި ނިދަންވެސް އޭނާއަށް އުނދަގުލެވެ. އޭނާގެ މަންމަ ބުނީ ސްކޫލްގައި ޗީޓަރުންނާއި ދަރިވަރުން ވަރަށް ބޮޑަށް ބުލީކޮށްފައިވާކަމަށެވެ. އެގޮތުން ކްލާހުން ބޭރަށްވެސް ލާފައިވާކަމަށެވެ. އަދި އެއްދުވަހު ސްކޫލަށް ފޮތެއް ނުގެންދެވުނު ދުވަހެއްގައި އެހެން ފޮތަކުން ގަނޑެއްގައި ފިލާވަޅު ހަދައިގެން ޓީޗަރަށް ދައްކަން ދިޔައީމަ އޭތި ވީދާލާފައި ޑަސްޓްބިނަށް ލާފައި ކްލާހުގެ ކަނެއްގައި ކޮޅަށްވެސް ބެހެއްޓިކަމަށެވެ.

“އެންޒައިޓީ ހުންނަ ކުއްޖަކަށްވެ ހުރެ އެދުވަހު އެހެން ހެދީމަ ވަރަށް ލަދުގަނެ ވަރަށް ސެލްފް ބްލޭމްކޮށް އެހުރިހައި ކަމެއް ވެފަހުރީ.” އޭނާގެ މަންމަ ބުންޏެވެ.

ބައެއް ޗީޓަރުން ވަރަށް ރޫޑްކޮށް ވާހަކަދައްކާކަމަށް އޭނާގެ މަންމަ ބުންޏެވެ. ފަހުން ފަހުން ސްކޫލުން އަންނައިރު ދަރިފުޅު ހުންނަނީ ވަރަށް ރުޅިދަދަވެފައިކަމަށާއި މަޑުން ހުންނާތީ އެންމެން އެޓޭކްކުރާ ކުއްޖަކަށް ދަރިފުޅު ވެފައިވާކަމަށް ވަނީ ބުނެފައެވެ. އަދި ހަށިގަނޑުން ބޮޑުކޮށް ހުންނާތީ އެކަމާވެސް ބުލީކުރާކަމަށް ވަނީ ބުނެފައެވެ.

“މިހާރުވެސް ނޯޓް ފޮތުގައި ލިޔެފަ ހުރޭ އަންހެން ކުއްޖަކަށް ވީނަމައޭ ހަށިގަނޑު ކުޑަކޮށް ހުންނަނަމައޭ. ފަހުން ވަރަށް ކާންވެސް ނޫޅޭނެ.” އޭނާގެ މަންމަ ބުންޏެވެ.

އޭނާގެ މަންމަ ބުނީ ސްކޫލުން ބްލީކުރަން ފަށާފައިވަނީ ދަރިފުޅުގެ އުމުރުން 9 ނުވަތަ 10 އަހަރުގައިކަމަށެވެ. މިހާރު ތެރަޕީވެސް އޮންލައިންކޮށް ގެންދާކަމަށާއި، ދަރިފުޅުގެ ހާލަތު މިހާރު ރަނގަޅު ވަމުން އަންނަކަމަށެވެ. އެކަމަކު އަނބުރާ ސްކޫލަށް ދާންޖެހިދާނެތީ އެ ބިރުވެރިކަން ދަރިފުޅުގެ މިހާރުވެސް އޮންނަކަމަށް އޭނާގެ މަންމަ ވަނީ ބުނެފައެވެ. އެހެންކަމުން މިހާރު ދަރިފުޅު ގަދަކަމުން ސްކޫލަށް ފޮނުވާން ނުކެރޭކަމަށް ވަނީ ބުނެފައެވެ.

އަހްމަދުގެ މަންމަ އަދި ބުނަނީ މި ބުލީންގެ ކޭސް އެޗްއާރްސީއެމް އަށް ހުށަހެޅުމަށް ނިންމާފައިވާ ކަމަށެވެ. ސަބަބަކީ އެޑިއުކޭޝަން މިނިސްޓްރީން ބުލީންނާ ދެކޮޅަށް ހަރުދަނާ ޕޮލިސީތައް ހަދާފައި ނެތުމުން އެކުދިންގެ އިންސާނީ ހައްގުތަށް ކަށަވަރުނުވުމުން ހިނގާ ކަންކަން ކަމުގައި ވާތީއެވެ.

ރާއްޖޭގެ ސުކޫލްތަކުގައި މާހައުލުގައި ނަފްސާނީ ދުޅަހެޔޮކަމަށް ރަނގަޅު އަހަންމިއްޔަތުކަންވެސް ނުދޭކަމަށް އަހުމަދުގެ މަންމަވަނީ ފާހަގަ ކޮށްފައެވެ.

ސްކޫލްގެ މާހައުލަކީ ކޮންމެ ކުއްޖަކަށްވެސް ރައްކާތެރިކަން ލިބިދޭންޖެހޭ މާހައުލެކެވެ. އަދި ސްކޫލަށްގޮސް އުނގެނުމުގެ ހައްޤަކީ ހަމަ ކޮންމެ ކުއްޖަކަށްވެސް ލިބެންޖެހޭ ހައްޤެކެވެ. ނަމަވެސް ސްކޫލްގައި މަސައްކަތްކުރާ ބައެއް މީހުންގެ ސަބަބުން މި ހައްޤުން ބައެއް ކުދިން މަހުރޫމްވުމަކީ ބަލައިގަނެވޭނެކަމެއްނޫނެވެ. އަދި މިއީ ކަމާގުޅުންހުރި އިދާރާތަކުން އެކަން ބަލާ ފިޔަވަޅުވެސް އަޅަންޖެހޭނެކަމެކެވެ.