އަމިއްލައަށް މަރުވުމާއި އަމިއްލަ ނަފްސަށް ގެއްލުންދިނުމުގެ ވާހަކަ އަހަރުމެން ނުދައްކަނީ ކީއްވެ؟

ދިރިއުޅުމުގައި ދިމާވާ ކަންތައްތަކެއްގެ ސަބަބުން ބައެއް މީހުން އަމިއްލަ ނަފްސަށް ގެއްލުން ދެއެވެ. މިއީ ހިތާމަހުރި ކަމެކެވެ. އަދި މިވާހަކަތަކަކީ ދައްކަންޖެހޭ ވާހަކަތަކެކެވެ.

މިމަހުގެ 10 ވަނަ ދުވަހަކީ ދުނިޔޭގައި ފާހަގަކުރާ “ސުއިސައިޑް ޕްރިވެންޝަން ޑޭ” އެވެ. މިއަހަރުގެ މިދުވަހުގެ ޝިއާރަކީ އަމަލުތަކުން އުންމީދު އާކޮށްދިނުމެވެ. މި ޝިއާރުގެ ދަށުން އަމިއްލައަށް މަރުވާ މީހުންގެ ނިސްބަތް މަދުކުރުމަށް ބާރުއަޅާނެއެވެ.

advertisement

މުޖްތަމައުގެ ތެރޭގައި މިކަމަށް މިހާރަށްވުރެ ބޮޑަށް ހޭލުންތެރިކަން އިތުރުކުރަންޖެހެއެވެ. އެއިރުން އަމިއްލަ ނަފްސަށް ގެއްލުން ދިނުމުގެ މައްސަލަތައް ހައްލުކުރެވޭނެއެވެ. އަމިއްލަ ނަފްސަށް ގެއްލުންދޭ މީހާ ކުއްވެރިކުރުމުގެ ބަދަލުގައި އެމީހާއަށް ލިބެންޖެހޭ އަޅާލުމާއި އެހީތެރިކަން ފޯރުކޮށްދޭންޖެހެއެވެ. މިއީ މިފަދަ މައްސަލަތައް މަދުކުރުމަށް ކުރެވޭނެ އެންމެ މުހިންމު ކަމެވެ.

ދީނީގޮތުން މިފަދަ ކަންކަމަށް މުޖްތަމައު ހޭލުންތެރިކުރުވުމަކީވެސް މިފަދަ މައްސަލަތައް މަދުކުރުމަށް ކުރެވޭނެ ވަރަށް މުހިންމު ކަމެކެވެ. މިކަމަށް ދީނުގައި އޮންނަ ގޮތް ރަނގަޅަށް އެނގުމުގެ ސަބަބުން އަމިއްލަ ނަފްސަށް ގެއްލުން ދިނުމަށް ބިރުގަންނާނެއެވެ. ދިރިއުޅުމުގައި ކޮންމެފަދަ ކަމެއް ދިމާވިނަމަވެސް މިއީ އަމިއްލަ ނަފްސަށް ގެއްލުންދޭންޖެހޭ ކަމެއްނޫންކަން އިނގޭނެއެވެ.

ޖެންޑަރ މިނިސްޓްރީގެ ތަފާސްހިސާބުތައް ދައްކާގޮތުންވެސް އެ މިނިސްޓްރީއަށް ހުށައަޅާ މައްސަލަތަކުގެ ތެރޭގައި އަމިއްލަ ނަފްސަށް ގެއްލުން ދިނުމުގެ މައްސަލަތައް ގިނައެވެ. އެހެންކަމުން މިފަދަ މައްސަލަތަކާއިމެދު މުޖްތަމައުގައި ވާހަކަދައްކައި މިކަންކަން ހައްލުކުރުމަށް މުޅި މުޖްތަމައުގައި ވާހަކަދައްކަންޖެހެއެވެ.