ޒުވާނުންނަށް ކްލައިމެޓް ކްރައިސިސް އާ ބެހޭ ނިންމުންތަކުގައި ބައިވެރިވެވެން ޖެހޭ

ތިމާވެއްޓަކީ ތިމާގެ ވަށައިގެންވާ މާހައުލެވެ. ތިމާވެއްޓަށް އަޅާނުލެވުމުގެ ސަބަބުން މޫސުމަށް ގިނަ ބަދަލުތަކެއް އާދެއެވެ. މިކަމުގެ ޒިންމާ އަހަރެމެން ނަގަންޖެހެއެވެ. މޫސުމަށް އަންނަ ބަދަލުތަކަކީ އިންސާނުންގެ އަމަލުތަކުގެ ސަބަބުން ކުރިމަތިވާ ކަންކަމެވެ.

ޒުވާނުންނަކީ ހަމަޤައިމުވެސް ޤައުމެއްގެ މުސްތަޤްބަލެވެ. ކޮންމެ ކަމެއްގައިވެސް ޒުވާނުންގެ ދައުރު ނުހަނު ބޮޑެވެ. އެހެންކަމުން މޫސުމަށް އަންނަ ބަދަލުތަކާއި މިކަމަށް ނަގާ ފިޔަވަޅުތަކުގައިވެސް ޒުވާނުންގެ ދައުރު އެހާމެބޮޑެވެ.

advertisement

މޫސުމަށް އަންނަ ބަދަލުތަކުގެ ސަބަބުން އަހަރެމެންނަށް ބޮޑެތި ގެއްލުންތަކެއް ލިބެއެވެ. އަހަރެމެންގެ ހައްޤުތަކަށް މޫސުމީ ބަދަލުތަކުގެ ސަބަބުން އަސަރުކުރެއެވެ. އޭގެތެރޭގައި ކާނާ ލިބުމާއި، ސާފު ވައި، ފެން ލިބުމަށް އަސަރުކުރެއެވެ. އަދި ތައުލީމާއި، ސިއްހަތާއި، ތަރައްޤީއަށްވެސް ހުރަސްއެޅިގެންދެއެވެ.

މޫސުމީ ބަދަލުތަކުގެ ސަބަބުން އަހަރެމެންގެ ގިނަ ހައްޤުތަކެއް ގެއްލިގެންދާތީ މިކަމަށް އަޑުއުފުލައި މިކަމާއިމެދު މީހުން ހޭލުންތެރިކުރުވުމަށް ވަކާލާތުކުރެވިދާނެއެވެ.

މޫސުމަށް އަންނަ ބަދަލުތަކުގެ ސަބަބުން އެންމެ ބޮޑު އަސަރެއްކުރާ ޤައުމަކަށް ރާއްޖެ ވާނެއެވެ. ރާއްޖެ އުފެދިފައިވާގޮތުން އެހެން ޤައުމުތަކާއި އަޅާބަލާއިރު ރާއްޖެއަށް މީގެ އަސަރު ބޮޑެވެ. އެހެންކަމުން މިކަމަށް އެންމެ ބޮޑަށް އަޑުއުފުލާ ބަޔަކަށް ވާންވާނީ ދިވެހިންނެވެ. އަދި މިކަމަށް ދިވެހިން އަޑުވެސް އުފުލައެވެ. ފަރުދީ ފެންވަރުގައާއި އަދި ސަރުކާރުގެ ފެންވަރުގައިވެސް މިކަމާއިމެދު ވަކާލާތުކުރެއެވެ.

މޫސުމީ ބަދަލުތަކުން ރައްކާތެރިވުމަށް ކޮންމެ މީހަކަށްވެސް ކުރެވިދާނެ ފަރުދީ ކަންކަން އެބަހުއްޓެވެ. އެގޮތުން ޕްލާސްޓިކް ބޭނުންކުރާ މީނަވަރު ދަށްކުރެވިދާނެއެވެ. ގޯތިތެރޭގައާއި ހުސްތަންތަނުގައި ގަސްއިންދިދާނެއެވެ. ކަރަންޓް ބޭނުންކުރާ މިންވަރު ދަށްކުރެވިދާނެއެވެ. މިއީ ފަރުދީ ފެންވަރުގައިވެސް ކުރެވިދާނެ ވަރަށް ކުދިކުދި ކަންކަމެވެ.